ਖੇਤਰੀ ਪ੍ਰਤੀਨਿਧ
ਪਟਿਆਲਾ, 24 ਸਤੰਬਰ
ਕਰੋਨਾ ਦੇ ਕਹਿਰ ਦੌਰਾਨ ਸੇਵਾਵਾਂ ਲੈਣ ਮਗਰੋਂ ਪੰਜਾਬ ਸਰਕਾਰ ਵੱਲੋਂ ਨੌਕਰੀਆਂ ਤੋਂ ਹਟਾਏ ਗਏ ਕਰੋਨਾ ਵਾਲੰਟੀਅਰਾਂ ਵੱਲੋਂ ਆਪਣੀਆਂ ਸੇਵਾਵਾਂ ਦੀ ਬਹਾਲੀ ਲਈ ਇਥੇ ਲਾਇਆ ਪੱਕਾ ਮੋਰਚਾ ਅੱਜ 52ਵੇਂ ਦਿਨ ਵੀ ਜਾਰੀ ਰਿਹਾ। ਪਿਛਲੇ ਦਿਨੀਂ ਕੀਤੇ ਗਏ ਪ੍ਰਦਰਸ਼ਨ ਦੌਰਾਨ ਸਥਾਨਕ ਅਧਿਕਾਰੀਆਂ ਵੱਲੋਂ ਲੋਕ ਸਭਾ ਮੈਂਬਰ ਪ੍ਰਨੀਤ ਕੌਰ ਨਾਲ਼ ਤੈਅ ਕਰਵਾਈ ਗਈ ਮੀਟਿੰਗ ਦੇ ਚੱੱੱਲਦਿਆਂ ਯੂਨੀਅਨ ਦੇ ਸੂਬਾਈ ਪ੍ਰਧਾਨ ਰਾਜਵਿੰਦਰ ਸਿੰਘ ਅਤੇ ਸੂਬਾ ਸਕੱਤਰ ਚਮਕੌਰ ਚੰਨੀ ਤੇ ਹੋਰ ਅੱਜ ਇਸ ਮੀਟਿੰਗ ਲਈ ਮੋਤੀ ਮਹਿਲ ਵੀ ਗਏ। ਪਰ ਅੱਗੇ ਪ੍ਰਨੀਤ ਕੌਰ ਦੇ ਦਿੱਲੀ ਚਲੇ ਜਾਣ ਕਾਰਨ ਇਹ ਮੀਟਿੰਗ ਨਾ ਹੋ ਸਕੀ। ਇਸ ਮਗਰੋਂ ਵਾਲੰਟੀਅਰਾਂ ਨੇ 30 ਸਤੰਬਰ ਨੂੰ ਮੁੱਖ ਮੰਤਰੀ ਚਰਨਜੀਤ ਸਿੰਘ ਚੰਨੀ ਦੀ ਖਰੜ ਸਥਿਤ ਕੋਠੀ ਦਾ ਘਿਰਾਓ ਕਰਨ ਦਾ ਐਲਾਨ ਕਰ ਦਿੱਤਾ।
ਰਾਜਵਿੰੰਦਰ ਸਿੰਘ ਅਤੇ ਚਮਕੌਰ ਚੰਨੀ ਨੇ ਦੱਸਿਆ ਕਿ ਕਰੋਨਾ ਦੇ ਕਹਿਰ ਦੌਰਾਨ ਸਰਕਾਰ ਨੇ ਕਰੋਨਾ ਵਲੰਟੀਅਰਾਂ ਵਜੋਂ ਡਾਕਟਰਾਂ, ਨਰਸਾਂ, ਪੈਰ ਮੈਡੀਕਲ ਸਟਾਫ਼ ਅਤੇ ਲੈਬ ਤਕਨੀਸ਼ੀਅਨਾਂ ਵਜੋਂ ਸਿਹਤ ਵਿਭਾਗ ’ਚ ਭਰਤੀ ਕੀਤਾ ਸੀ। ਇਸ ਦੌਰਾਨ ਉਨ੍ਹਾਂ ਨੇ ਕਈ ਮਹੀਨੇ ਜਾਨ ਜੋਖਮ ’ਚ ਪਾ ਕੇ ਸੇਵਾਵਾਂ ਨਿਭਾਈਆਂ। ਪਰ ਕਰੋਨਾ ਦਾ ਪ੍ਰਕੋਪ ਘਟਣ ਮਗਰੋਂ ਸਰਕਾਰ ਨੇ ਉਨ੍ਹਾਂ ਨੂੰ ਫਾਰਗ ਕਰਕੇ ਘਰੀਂ ਤੋਰ ਦਿੱਤਾ। ਜਦਕਿ ਇਨ੍ਹਾਂ ਕਰੋਨਾ ਵਾਲੰਟੀਅਰਾਂ ਦਾ ਤਰਕ ਹੈ ਕਿ ਸਰਕਾਰ ਭਾਵੇਂ ਉਨ੍ਹਾਂ ਤੋਂ ਖਾਲੀ ਪਈਆਂ ਅਸਾਮੀਆਂ ’ਤੇ ਕੰਮ ਲੈ ਲਵੇ ਤੇ ਉਹ ਪਹਿਲਾਂ ਦੀ ਤਰ੍ਹਾਂ ਹੀ ਨਿਗੂਣੀਆਂ ਤਨਖ਼ਾਹਾਂ ’ਤੇ ਵੀ ਕੰਮ ਕਰਨ ਨੂੰ ਤਿਆਰ ਹਨ। ਇਸ ਮੌਕੇ ਗੌਰਵ, ਗੁਰਬੀਰ, ਗੁਰਪਿਆਰ, ਪ੍ਰਭਜੋਤ, ਨੀਲਮ, ਬਲਜੀਤ ਕੌਰ, ਸਰਬਜੀਤ ਕੌਰ, ਬਲਵਿੰਦਰ ਸਿੰਘ ਆਦਿ ਵੀ ਮੌਜੂਦ ਸਨ।