ਖੇਤਰੀ ਪ੍ਰਤੀਨਿਧ
ਪਟਿਆਲਾ, 25 ਅਕਤੂਬਰ
ਸ਼੍ਰੋਮਣੀ ਅਕਾਲੀ ਦਲ ਸੰਯੁਕਤ ਦੇ ਬੁਲਾਰੇ ਅਤੇ ਵਿਧਾਨ ਸਭਾ ਦੇ ਸਾਬਕਾ ਡਿਪਟੀ ਸਪੀਕਰ ਬੀਰਦਵਿੰਦਰ ਸਿੰਘ ਨੇ ਪਾਕਿਸਤਾਨੀ ਪੱਤਰਕਾਰ ਅਰੂਸਾ ਆਲਮ ਨੂੰ ਪਿਛਲੇ ਡੇਢ ਦਹਾਕੇ ਦੌਰਾਨ ਮਿਲੇ ਵੀਜ਼ੇ ਸਬੰਧੀ ਉੱਚ ਪੱਧਰੀ ਜਾਂਚ ਕੀਤੇ ਜਾਣ ਦੀ ਮੰਗ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਤਾਂ ਅਰੂਸਾ ਆਲਮ ਦੇ ਇਥੇ ਠਹਿਰਨ ਦੀ ਗੱਲ ਖੁੱਲ੍ਹੇਆਮ ਮੰਨ ਹੀ ਚੁੱਕੇ ਹਨ, ਪਰ ਲੋਕ ਵੀ ਜਾਨਣਾ ਚਾਹੁੰਦੇ ਹਨ ਕਿ ਇਹ ਵੀਜ਼ਾ ਕੌਣ ਦਿਵਾਉਂਦਾ ਸੀ? ਅਰੂਸਾ ਆਲਮ ਦੇ ਆਈਐਸਆਈ ਦੇ ਮੁਖੀ ਨਾਲ਼ ਕਥਿਤ ਗੂੜ੍ਹੀ ਸਾਂਝ ਹੋਣ ਦੇ ਦੋਸ਼ ਲਾਉਂਦਿਆਂ, ਉਨ੍ਹਾਂ ਕਿਹਾ ਕਿ ਵੀਜ਼ਾ ਦਿਵਾਉਣ ਵਾਲ਼ੇ ਇਹ ਗੱਲ ਨਹੀਂ ਸਨ ਜਾਣਦੇ। ਉਨ੍ਹਾਂ ਇਹ ਸਵਾਲ ਵੀ ਉਠਾਇਆ ਕਿ ਜੇਕਰ ਇਹ ਲੋਕ ਇਸ ਤੋਂ ਅਣਜਾਣ ਸਨ, ਤਾਂ ਭਾਰਤੀ ਖੁੂਫ਼ੀਆ ਤੰਤਰ ਨੂੰ ਪਹਿਲੇ ਝਟਕੇ ਹੀ ਫੇਲ੍ਹ ਮੰਨਿਆ ਜਾ ਸਕਦਾ ਹੈ। ਪਰ ਜੇਕਰ ਇਹ ਖੁਫ਼ੀਆ ਤੰਤਰ ਆਪਣੇ ਆਪ ਨੂੰ ਸਫ਼ਲ ਮੰਨਦਾ ਹੈ, ਤਾਂ ਫੇਰ ਇਹ ਵੀਜ਼ਾ ਕਿਵੇਂ ਲੱਗਦਾ ਰਿਹਾ। ਇਥੇ ਜਾਰੀ ਪ੍ਰੈਸ ਬਿਆਨ ਰਾਹੀਂ ਉਨ੍ਹਾਂ ਕਿਹਾ ਕਿ ਗੱਦੀ ਤੋਂ ਲਾਹੇ ਜਾਣ ਮਗਰੋਂ ਦੇਸ਼ ਦੀ ਸੁਰੱਖਿਆ ਦੀ ਗੁਹਾਰ ਲਾ ਕੇ ਪੰਜਾਬ ’ਚ ਬੀਐਸਐਫ਼ ਦਾ ਅਧਿਕਾਰ ਖੇਤਰ ਵਧਾਉਣ ਸਮੇਤ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਮੋਦੀ-ਸ਼ਾਹ ਜੁੰਡਲੀ ਦੇ ਪੰਜਾਬ ਵਿਰੋਧੀ ਫੈਸਲਿਆਂ ਦਾ ਅੰਨ੍ਹਾ ਸਮਰਥਨ ਨਾਲ਼ ਹੀ ਲੋਕ ਬਹੁਤ ਕੁਝ ਸਮਝਣ ਲੱਗੇ ਹਨ। ਪਰ ਇਸ ਗੋਰਖਧੰਦੇ ਨੂੰ ਅਧਿਕਾਰਤ ਤੌਰ ’ਤੇ ਨਸ਼ਰ ਕੀਤੇ ਜਾਣ ਦੀ ਲੋੜ ਹੈ, ਤਾਂ ਜੋ ਕੋਈ ਰਾਜਸੀ ਹਿਤਾਂ ਦੀ ਖ਼ਾਤਰ ਦੇਸ਼ ਦੀ ਸੁਰੱਖਿਆ ਨਾਲ ਖਿਲਵਾੜ ਨਾ ਕਰ ਸਕੇ। ਉਨ੍ਹਾਂ ਹੋਰ ਕਿਹਾ ਕਿ ਕੈਪਟਨ ਦੇ ਪਿਛਲੇ ਸਮੇਂ ਤੋਂ ਭਾਜਪਾ ਦਾ ਝੋਲ਼ੀ ਚੁੱਕ ਬਣੇ ਹੋਣ ਦਾ ਵਰਤਾਰਾ ਸਾਫ਼ ਹੋਣ ਨਾਲ਼ ਉਨ੍ਹਾਂ ਦੀ ਸਿਆਸਤ ਦੇ ਦਿਨ ਪੁੱਗ ਚੁੱਕੇ ਹਨ। ਬੀਰਦਵਿੰਦਰ ਸਿੰਘ ਨੇ ਗ੍ਰਹਿ ਮੰਤਰੀ ਸੁਖਜਿੰਦਰ ਰੰਧਾਵਾ ਪਾਸੋਂ ਮੰਗ ਕੀਤੀ ਹੈ ਕਿ ਉਹ ਕੈਪਟਨ-ਅਰੂਸਾ ਅਤੇ ਆਈਐਸਆਈ ਮੁਖੀ ਵਿਚਲੇ ਕਥਿਤ ਰਿਸ਼ਤਿਆਂ ਦੀ ਐਨਆਈਏ ਪਾਸੋਂ ਜਾਂਚ ਕਰਵਾਉਣ, ਤਾਂ ਕਿ ਕੈਪਟਨ ਦੀ ਅਖੌਤੀ ਦੇਸ਼ ਭਗਤੀ ਦਾ ਮਖੌਟਾ ਬੇਨਕਾਬ ਹੋ ਸਕੇ।