ਪਟਨਾ: ਜਨਤਾ ਦਲ (ਯੂਨਾਈਟਿਡ) ਦੇ ਕੌਮੀ ਪ੍ਰਧਾਨ ਰਾਜੀਵ ਰੰਜਨ ਉਰਫ਼ ਲਲਨ ਸਿੰਘ ਨੇ ਦੋਸ਼ ਲਾਇਆ ਹੈ ਕਿ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਪਣੀ ਜਾਤ ਬਾਰੇ ਦੱਸਣ ਵੇਲੇ ਲੋਕਾਂ ਨਾਲ ਧੋਖਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਮੋਦੀ ਨੇ ਗੁਜਰਾਤ ਦਾ ਮੁੱਖ ਮੰਤਰੀ ਹੁੰਦਿਆਂ ਖ਼ੁਦ ਨੂੰ ਓਬੀਸੀ (ਹੋਰ ਪੱਛੜੇ ਵਰਗ) ਸੂਚੀ ਵਿਚ ਪਾਇਆ ਹੈ। ਇੱਥੇ ਜੇਡੀ(ਯੂ) ਪਾਰਟੀ ਮੈਂਬਰਾਂ ਨੂੰ ਸੰਬੋਧਨ ਕਰਦਿਆਂ ਉਨ੍ਹਾਂ ਕਿਹਾ ਕਿ 2014 ਵਿਚ ਨਰਿੰਦਰ ਮੋਦੀ ਨੇ ਦੇਸ਼ ’ਚ ਘੁੰਮ ਕੇ ਇਹ ਕਿਹਾ ਸੀ ਕਿ ਉਹ ਬੇਹੱਦ ਪੱਛੜੇ ਵਰਗਾਂ (ਈਬੀਸੀ) ਵਿਚੋਂ ਹਨ। ਲੱਲਨ ਸਿੰਘ ਨੇ ਕਿਹਾ ਕਿ ਗੁਜਰਾਤ ਵਿਚ ਕੋਈ ਈਬੀਸੀ ਨਹੀਂ ਹੈ, ਸਿਰਫ਼ ਓਬੀਸੀ ਹੈ। ਜਦ ਮੋਦੀ ਗੁਜਰਾਤ ਦੇ ਮੁੱਖ ਮੰਤਰੀ ਬਣੇ ਸਨ, ਉਦੋਂ ਉਨ੍ਹਾਂ ਖ਼ੁਦ ਨੂੰ ਓਬੀਸੀ ਸੂਚੀ ਵਿਚ ਪੁਆਇਆ। ਜੇਡੀ(ਯੂ) ਆਗੂ ਨੇ ਕਿਹਾ ਕਿ ਉਹ ਨਕਲੀ ਹਨ, ਅਸਲੀ ਨਹੀਂ ਹਨ। ਭਾਜਪਾ ਨੂੰ ‘ਖਿਲਾਰੇ ਵਾਲੀ ਥਾਂ’ ਦੱਸਦਿਆਂ ਲਲਨ ਸਿੰਘ ਨੇ ਕਿਹਾ ਕਿ ਜਿਹੜੇ ਭਾਜਪਾ ਛੱਡ ਜੇਡੀ(ਯੂ) ਵਿਚ ਆਏ ਹਨ, ਉਨ੍ਹਾਂ ਚੰਗਾ ਕੰਮ ਕੀਤਾ ਹੈ। ਲੱਲਨ ਸਿੰਘ ਨੇ ਕੇਂਦਰ ਨੂੰ ਬੇਰੁਜ਼ਗਾਰੀ ਤੇ ਮਹਿੰਗਾਈ ਦੇ ਮੁੱਦਿਆਂ ’ਤੇ ਵੀ ਨਿਸ਼ਾਨਾ ਬਣਾਇਆ। -ਪੀਟੀਆਈ
