* ਯੂਰੋਪ ਨੇ ਇੰਗਲੈਂਡ ਨਾਲੋਂ ਸੰਪਰਕ ਤੋੜਿਆ
* ਨਾਲ ਲੱਗਦੇ ਮੁਲਕਾਂ ਵੱਲੋਂ ਸਰਹੱਦਾਂ ਸੀਲ
* ਲਾਗ ਦਾ ਨਵਾਂ ਰੂਪ ਵਧੇਰੇ ਘਾਤਕ ਹੋਣ ਦਾ ਖ਼ਦਸ਼ਾ
ਲੰਡਨ, 21 ਦਸੰਬਰ
ਕਰੋਨਾਵਾਇਰਸ ਦੇ ਨਵੇਂ ਰੂਪ ਦੇ ਫੈਲਾਅ ਨਾਲ ਇੰਗਲੈਂਡ ਲਈ ਸੰਕਟ ਖੜ੍ਹਾ ਹੋ ਗਿਆ ਹੈ ਅਤੇ ਯੂਰੋਪੀ ਮੁਲਕਾਂ ਨੇ ਉਸ ਨਾਲ ਸੰਪਰਕ ਤੋੜ ਲਿਆ ਹੈ। ਯੂਰੋਪੀ ਮੁਲਕਾਂ ਨੇ ਕਰੋਨਾਵਾਇਰਸ ਦੇ ਨਵੇਂ ਰੂਪ ਤੋਂ ਡਰਦਿਆਂ ਇੰਗਲੈਂਡ ਨਾਲ ਆਵਾਜਾਈ ਬੰਦ ਕਰ ਦਿੱਤੀ ਹੈ। ਕ੍ਰਿਸਮਸ ਨੇੜੇ ਹੋਣ ਕਰਕੇ ਕਈ ਪਰਿਵਾਰਾਂ, ਟਰੱਕ ਵਾਲਿਆਂ ਅਤੇ ਸੁਪਰ ਮਾਰਕਿਟਾਂ ’ਚ ਹਫੜਾ-ਦਫੜੀ ਦਾ ਮਾਹੌਲ ਬਣ ਗਿਆ ਹੈ। ਫਰਾਂਸ ਨਾਲ ਲੱਗਦੀ ਸਰਹੱਦ ’ਤੇ ਵਾਹਨਾਂ ਦੀ ਕਤਾਰ ਲੱਗ ਗਈ ਹੈ। ਟਰੱਕ ਅਤੇ ਹੋਰ ਢੋਆ-ਢੁਆਈ ਵਾਲੇ ਵਾਹਨਾਂ ਦੇ ਦਾਖ਼ਲੇ ਨੂੰ ਵੀ ਰੋਕ ਦਿੱਤਾ ਗਿਆ ਹੈ। ਉਧਰ ਇੰਗਲੈਂਡ ’ਚ ਕਰੋਨਾ ਦੇ ਨਵੇਂ ਸਰੂਪ ਦਾ ਤੇਜ਼ੀ ਨਾਲ ਪਸਾਰ ਹੋਣ ਦਰਮਿਆਨ 326 ਹੋਰ ਮਰੀਜ਼ਾਂ ਦੀ ਮੌਤ ਹੋ ਗਈ ਹੈ ਜਿਸ ਨਾਲ ਮ੍ਰਿਤਕਾਂ ਦੀ ਗਿਣਤੀ ਵੱਧ ਕੇ 67,401 ਹੋ ਗਈ ਹੈ।
ਫਰਾਂਸ, ਜਰਮਨੀ, ਇਟਲੀ, ਨੀਦਰਲੈਂਡਜ਼, ਆਸਟਰੀਆ, ਸਵਿਟਜ਼ਰਲੈਂਡ, ਆਇਰਲੈਂਡ, ਬੈਲਜੀਅਮ, ਇਜ਼ਰਾਈਲ, ਹਾਂਗਕਾਂਗ, ਇਰਾਨ, ਕ੍ਰੋਏਸ਼ੀਆ, ਅਰਜਨਟੀਨਾ, ਚਿਲੀ, ਮੋਰੱਕੋ, ਕੁਵੈਤ ਅਤੇ ਕੈਨੇਡਾ ਨੇ ਇੰਗਲੈਂਡ ਦੇ ਸਫ਼ਰ ਅਤੇ ਉਥੋਂ ਆਉਣ ਵਾਲੀਆਂ ਉਡਾਣਾਂ ’ਤੇ ਪਾਬੰਦੀ ਲਗਾ ਦਿੱਤੀ ਹੈ। ਸਾਊਦੀ ਅਰਬ ਨੇ ਸਾਰੀਆਂ ਕੌਮਾਂਤਰੀ ਉਡਾਣਾਂ ’ਤੇ ਇਕ ਹਫ਼ਤੇ ਲਈ ਰੋਕ ਲਗਾ ਦਿੱਤੀ ਹੈ। ਇੰਗਲੈਂਡ ਦੇ ਸਿਹਤ ਮੰਤਰੀ ਮੈਟ ਹੈਨਕੌਕ ਨੇ ਕਿਹਾ ਕਿ ਲੋਕਾਂ ਖਾਸ ਕਰਕੇ ਟੀਅਰ 4 ਇਲਾਕਿਆਂ ਦੇ ਵਸਨੀਕਾਂ ਨੂੰ ਵਾਇਰਸ ਹੋਣ ’ਤੇ ਚੌਕਸ ਰਹਿਣ ਦੀ ਸਲਾਹ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਕਰੋਨਾ ਦੇ ਨਵੇਂ ਰੂਪ ਨਾਲ ਅਜੇ ਘਰਾਂ ਅੰਦਰ ਰਹਿ ਕੇ ਹੀ ਨਜਿੱਠਿਆ ਜਾ ਸਕਦਾ ਹੈ। ਕਰੋਨਾਵਾਇਰਸ ਦੀ ਨਵੀਂ ਕਿਸਮ 70 ਫ਼ੀਸਦੀ ਵਧੇਰੇ ਲਾਗ ਫੈਲਾਉਣ ਵਾਲੀ ਮੰਨੀ ਜਾ ਰਹੀ ਹੈ। ਉਂਜ ਸਿਹਤ ਮਾਹਿਰਾਂ ਨੇ ਕਿਹਾ ਹੈ ਕਿ ਇਸ ਦਾ ਅਜੇ ਕੋਈ ਸਬੂਤ ਨਹੀਂ ਮਿਲਿਆ ਹੈ ਕਿ ਨਵਾਂ ਰੂਪ ਵਧੇਰੇ ਘਾਤਕ ਹੈ ਜਾਂ ਇਹ ਵੈਕਸੀਨ ’ਤੇ ਵੱਖਰੇ ਢੰਗ ਨਾਲ ਅਸਰ ਪਾਏਗਾ। ਲੰਡਨ ਦੇ ਇੰਪੀਰੀਅਲ ਕਾਲਜ ਦੇ ਡਾਕਟਰ ਐਰਿਕ ਵੋਲਜ਼ ਨੇ ਕਿਹਾ ਕਿ ਕੋਵਿਡ-19 ਨਾਲੋਂ ਲਾਗ ਦਾ ਨਵਾਂ ਰੂਪ ਕਿਤੇ ਵੱਧ ਤੇਜ਼ੀ ਨਾਲ ਫੈਲ ਰਿਹਾ ਹੈ। ‘ਅਜੇ ਫੌਰੀ ਇਸ ਬਾਰੇ ਕੁਝ ਨਹੀਂ ਕਿਹਾ ਜਾ ਸਕਦਾ ਹੈ ਪਰ ਉਸ ’ਤੇ ਨਜ਼ਰ ਰੱਖਣਾ ਅਹਿਮ ਹੋਵੇਗਾ।’ ਅਜੇ ਇਹ ਪਤਾ ਲਾਇਆ ਜਾ ਰਿਹਾ ਹੈ ਕਿ ਯੂਕੇ ’ਚ ਕਿਸੇ ਮਰੀਜ਼ ਤੋਂ ਕਰੋਨਾ ਦਾ ਨਵਾਂ ਰੂਪ ਫੈਲਿਆ ਹੈ ਜਾਂ ਕਿਸੇ ਦੂਜੇ ਮੁਲਕ ਤੋਂ ਆਏ ਮਰੀਜ਼ ਨੇ ਇਥੇ ਹਾਲਾਤ ਗੰਭੀਰ ਬਣਾ ਦਿੱਤੇ ਹਨ। ਨੌਰਦਰਨ ਆਇਰਲੈਂਡ ਨੂੰ ਛੱਡ ਕੇ ਨਵੀਂ ਲਾਗ ਦਾ ਅਸਰ ਲੰਡਨ, ਦੱਖਣ-ਪੂਰਬ ਅਤੇ ਪੂਰਬੀ ਇੰਗਲੈਂਡ ’ਚ ਵਧੇਰੇ ਦੇਖਣ ਨੂੰ ਮਿਲ ਰਿਹਾ ਹੈ। ਮੁਲਕ ਦੇ ਹੋਰ ਹਿੱਸਿਆਂ ’ਚ ਇੰਨੀ ਤੇਜ਼ੀ ਨਾਲ ਕਰੋਨਾ ਦੇ ਨਵੇਂ ਰੂਪ ਦੇ ਕੇਸ ਸਾਹਮਣੇ ਨਹੀਂ ਆਏ ਹਨ। ਲੋਕਾਂ ਨੂੰ ਪਾਬੰਦੀਆਂ ਦਾ ਪਾਲਣ ਕਰਨ ਲਈ ਆਖਦਿਆਂ ਸਰਕਾਰ ਨੇ ਕਿਹਾ ਹੈ ਕਿ ਉਹ ਘਰਾਂ ਅੰਦਰ ਹੀ ਰਹਿਣ। ਇਸ ਦੇ ਨਾਲ ਗ਼ੈਰ-ਜ਼ਰੂਰੀ ਵਸਤਾਂ ਵਾਲੀਆਂ ਦੁਕਾਨਾਂ ਅਤੇ ਕਾਰੋਬਾਰ ਬੰਦ ਰਹਿਣਗੇ। ਵਿਰੋਧੀ ਧਿਰ ਲੇਬਰ ਪਾਰਟੀ ਦੇ ਆਗੂ ਸਰ ਕੀਰ ਸਟਾਰਮਰ ਨੇ ਪ੍ਰਧਾਨ ਮੰਤਰੀ ਬੋਰਿਸ ਜੌਹਨਸਨ ’ਤੇ ‘ਵੱਡੀ ਅਣਗਹਿਲੀ’ ਦਾ ਦੋਸ਼ ਲਾਇਆ ਹੈ ਅਤੇ ਉਨ੍ਹਾਂ ਮੰਗ ਕੀਤੀ ਹੈ ਕਿ ਉਹ ਲੋਕਾਂ ਤੋਂ ਮੁਆਫ਼ੀ ਮੰਗਣ।
ਵਾਸ਼ਿੰਗਟਨ ’ਚ ਭਾਰਤੀ-ਅਮਰੀਕੀ ਡਾਕਟਰ ਵਿਵੇਕ ਮੂਰਤੀ ਨੇ ਕਿਹਾ ਹੈ ਕਿ ਯੂਕੇ ’ਚ ਕਰੋਨਾਵਾਇਰਸ ਦੇ ਨਵੇਂ ਰੂਪ ਦੇ ਵਧੇਰੇ ਘਾਤਕ ਹੋਣ ਦੇ ਅਜੇ ਸਬੂਤ ਨਹੀਂ ਮਿਲੇ ਹਨ। ਉਨ੍ਹਾਂ ਕਿਹਾ ਕਿ ਇਹ ਆਖਣਾ ਸਹੀ ਨਹੀਂ ਹੋਵੇਗਾ ਕਿ ਵਿਕਸਤ ਕੀਤੀਆਂ ਗਈਆਂ ਕਰੋਨਾਵਾਇਰਸ ਵੈਕਸੀਨਾਂ ਲਾਗ ਦੇ ਨਵੇਂ ਮਾਮਲਿਆਂ ’ਤੇ ਅਸਰਦਾਰ ਨਹੀਂ ਹੋਣਗੀਆਂ। -ਪੀਟੀਆਈ
ਆਸਟਰੇਲੀਆ ’ਚ ਇੰਗਲੈਂਡ ਦੇ ਦੋ ਮੁਸਾਫ਼ਰਾਂ ’ਚ ਮਿਲੀ ਕਰੋਨਾ ਦੀ ਨਵੀਂ ਲਾਗ
ਸਿੰਗਾਪੁਰ: ਇੰਗਲੈਂਡ ਤੋਂ ਆਸਟਰੇਲੀਆ ’ਚ ਆਏ ਦੋ ਮੁਸਾਫ਼ਰਾਂ ’ਚ ਕਰੋਨਾਵਾਇਰਸ ਦੇ ਨਵੇਂ ਰੂਪ ਦੇ ਲੱਛਣ ਮਿਲੇ ਹਨ। ਨਿਊ ਸਾਊਥ ਵੇਲਜ਼ ’ਚ ਆਏ ਇਨ੍ਹਾਂ ਵਿਅਕਤੀਆਂ ਨੂੰ ਹੋਟਲ ’ਚ ਇਕਾਂਤਵਾਸ ’ਚ ਰੱਖਿਆ ਗਿਆ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਸਿਡਨੀ ’ਚ ਲਾਗ ਦੇ ਵਧੇ ਮਾਮਲਿਆਂ ਦਾ ਇਸ ਨਾਲ ਕੋਈ ਸਬੰਧ ਨਹੀਂ ਹੈ। ਆਸਟਰੇਲੀਆ ਨੇ ਦਰਜਨਾਂ ਘਰੇਲੂ ਉਡਾਣਾਂ ਨੂੰ ਸੋਮਵਾਰ ਨੂੰ ਰੱਦ ਕਰ ਦਿੱਤਾ ਹੈ। ਸਿਡਨੀ ਦੇ ਬੀਚਾਂ ’ਤੇ ਲੌਕਡਾਊਨ ਲਗਾ ਦਿਤਾ ਗਿਆ ਹੈ ਅਤੇ ਲੋਕਾਂ ਨੂੰ ਬੇਨਤੀ ਕੀਤੀ ਗਈ ਹੈ ਕਿ ਉਹ ਕਰੋਨਾਵਾਇਰਸ ਵਾਲੇ ਇਲਾਕਿਆਂ ’ਚ ਨਾ ਜਾਣ। ਉਨ੍ਹਾਂ ਨੂੰ ਟੈਸਟ ਕਰਾਉਣ ਅਤੇ ਇਕਾਂਤਵਾਸ ’ਚ ਰਹਿਣ ਲਈ ਵੀ ਕਿਹਾ ਗਿਆ ਹੈ। -ਰਾਇਟਰਜ਼
ਭਾਰਤ ਵੱਲੋਂ ਅੱਜ ਤੋਂ ਯੂਕੇ ਦੀਆਂ ਸਾਰੀਆਂ ਉਡਾਣਾਂ ਰੱਦ
ਨਵੀਂ ਦਿੱਲੀ: ਇੰਗਲੈਂਡ ’ਚ ਕਰੋਨਾ ਦਾ ਨਵਾਂ ਰੂਪ ਫੈਲਣ ਮਗਰੋਂ ਭਾਰਤ ਨੇ ਭਲਕੇ ਰਾਤ 11.59 ਵਜੇ ਤੋਂ ਉਥੋਂ ਆਉਣ ਅਤੇ ਇਥੋਂ ਜਾਣ ਵਾਲੀਆਂ ਸਾਰੀਆਂ ਉਡਾਣਾਂ 31 ਦਸੰਬਰ 11.59 ਵਜੇ ਤੱਕ ਰੱਦ ਕਰ ਦਿੱਤੀਆਂ ਹਨ। ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਕਿਹਾ ਕਿ ਇੰਗਲੈਂਡ ਤੋਂ ਹਵਾਈ ਜਹਾਜ਼ ਰਾਹੀਂ ਆਉਣ ਵਾਲੇ ਮੁਸਾਫ਼ਰਾਂ ਦਾ ਹਵਾਈ ਅੱਡਿਆਂ ’ਤੇ ਕੋਵਿਡ-19 ਦਾ ਟੈਸਟ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਇੰਗਲੈਂਡ ’ਚ ਮੌਜੂਦਾ ਹਾਲਾਤ ਕਾਰਨ ਇਹ ਫ਼ੈਸਲਾ ਲਿਆ ਹੈ। -ਪੀਟੀਆਈ
ਸਰਕਾਰ ਚੌਕਸ; ਘਬਰਾਉਣ ਦੀ ਲੋੜ ਨਹੀਂ: ਹਰਸ਼ ਵਰਧਨ
ਨਵੀਂ ਦਿੱਲੀ: ਇੰਗਲੈਂਡ ’ਚ ਕਰੋਨਾਵਾਇਰਸ ਦਾ ਨਵਾਂ ਰੂਪ ਤੇਜ਼ੀ ਨਾਲ ਫੈਲਣ ਦਰਮਿਆਨ ਕੇਂਦਰੀ ਸਿਹਤ ਮੰਤਰੀ ਹਰਸ਼ ਵਰਧਨ ਨੇ ਕਿਹਾ ਹੈ ਕਿ ਸਰਕਾਰ ਪੂਰੀ ਤਰ੍ਹਾਂ ਚੌਕਸ ਹੈ ਅਤੇ ਲੋਕਾਂ ਨੂੰ ਘਬਰਾਉਣ ਦੀ ਲੋੜ ਨਹੀਂ ਹੈ। ਕੇਂਦਰੀ ਸਿਹਤ ਮੰਤਰਾਲੇ ਨੇ ਕਰੋਨਾ ਦੇ ਨਵੇਂ ਰੂਪ ਦੇ ਵਿਚਾਰ ਵਟਾਂਦਰੇ ਲਈ ਅੱਜ ਸਾਂਝੇ ਨਿਗਰਾਨ ਗਰੁੱਪ ਦੀ ਹੰਗਾਮੀ ਮੀਟਿੰਗ ਸੱਦੀ ਸੀ। ਯੂਕੇ ਜਾਣ ਵਾਲੀਆਂ ਸਾਰੀਆਂ ਉਡਾਣਾਂ ਰੱਦ ਕਰਨ ਬਾਰੇ ਪੱਤਰਕਾਰਾਂ ਵੱਲੋਂ ਪੁੱਛੇ ਗਏ ਸਵਾਲ ਦੇ ਜਵਾਬ ’ਚ ਹਰਸ਼ ਵਰਧਨ ਨੇ ਕਿਹਾ ਸੀ ਕਿ ਇਹ ਸਾਰੇ ਕਾਲਪਨਿਕ ਹਾਲਾਤ ਹਨ ਅਤੇ ਫਿਕਰ ਕਰਨ ਦੀ ਲੋੜ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਪੂਰੀ ਤਰ੍ਹਾਂ ਚੌਕਸ ਹੈ। ਇਸ ਤੋਂ ਪਹਿਲਾਂ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਨੇ ਮੰਗ ਕੀਤੀ ਸੀ ਕਿ ਕੇਂਦਰ ਯੂਕੇ ਜਾਣ ਵਾਲੀਆਂ ਸਾਰੀਆਂ ਉਡਾਣਾਂ ’ਤੇ ਰੋਕ ਲਗਾਵੇ। -ਪੀਟੀਆਈ
ਵਾਇਰਸ ਦਾ ਖੌਫ਼: ਵਿਸ਼ਵ ਭਰ ਦੇ ਸ਼ੇਅਰ ਬਾਜ਼ਾਰ ਮੂੰਹ ਦੇ ਭਾਰ ਡਿੱਗੇ
ਮੁੰਬਈ: ਯੂਕੇ ਵਿੱਚ ਕਰੋਨਾਵਾਇਰਸ ਦੇ ਵੱਧ ਤੇਜ਼ੀ ਨਾਲ ਫੈਲਣ ਵਾਲੇ ਨਵੇਂ ਰੂਪ ਕਰਕੇ ਬਣੀ ਦਹਿਸ਼ਤ ਤੇ ਭਾਰਤ ਸਮੇਤ ਵੱਡੀ ਗਿਣਤੀ ਮੁਲਕਾਂ ਵੱਲੋੋਂ ਯੂਕੇ ਤੋਂ ਆਉਂਦੀਆਂ ਹਵਾਈ ਉਡਾਣਾਂ ਬੰਦ ਕੀਤੇ ਜਾਣ ਦੇ ਚਲਦਿਆਂ ਏਸ਼ੀਆ ਸਮੇਤ ਵਿਸ਼ਵ ਦੇ ਸ਼ੇਅਰ ਬਾਜ਼ਾਰਾਂ ਵਿੱਚ ਅੱਜ ਵੱਡੀ ਗਿਰਾਵਟ ਵੇਖਣ ਨੂੰ ਮਿਲੀ। ਭਾਰਤੀ ਸ਼ੇਅਰ ਬਾਜ਼ਾਰ 1407 ਅੰਕ ਡਿੱਗ ਗਿਆ। ਬੰਬੇ ਸਟਾਕ ਐਕਸਚੇਂਜ (ਬੀਐੱਸਈ) ਦਾ 30 ਸ਼ੇਅਰਾਂ ਵਾਲਾ ਸੂਚਕ ਅੰਕ 1406.73 ਨੁਕਤਿਆਂ ਜਾਂ 3 ਫੀਸਦ ਦੇ ਨਿਘਾਰ ਨਾਲ ਦਿਨ ਦੇ ਕਾਰੋਬਾਰ ਮਗਰੋਂ 45,553.96 ਅੰਕ ’ਤੇ ਬੰਦ ਹੋਇਆ। ਉਧਰ ਨੈਸ਼ਨਲ ਸਟਾਕ ਐਕਸਚੇਂਜ (ਐੱਨਐੱਸਈ) ਦਾ ਨਿਫਟੀ ਵੀ 432.15 ਨੁਕਤਿਆਂ ਦੇ ਨਿਘਾਰ ਨਾਲ 13,328.40 ਦੇ ਪੱਧਰ ’ਤੇ ਜਾ ਡਿੱਗਾ। ਓਐੱਨਜੀਸੀ ਜਿਹੀ ਮੋਹਰੀ ਕੰਪਨੀ, ਜੋ ਸੈਂਸੈਕਸ ਦਾ ਅਹਿਮ ਹਿੱਸਾ ਹੈ, ਦੇ ਸ਼ੇਅਰ 9 ਫੀਸਦ ਤੱਕ ਡਿੱਗ ਗਏ। ਇੰਡਸਇੰਡ, ਮਹਿੰਦਰਾ ਐਂਡ ਮਹਿੰਦਰਾ, ਐੱਸਬੀਆਈ, ਐੱਨਟੀਪੀਸੀ, ਆਈਟੀਸੀ, ਐਕਸਿਸ ਬੈਂਕ ਤੇ ਪਾਵਰਗਰਿੱਡ ਦੇ ਸ਼ੇਅਰਾਂ ਨੇ 7 ਫੀਸਦ ਦਾ ਨਿਘਾਰ ਦਰਜ ਕੀਤਾ। ਪੈਰਿਸ, ਫਰੈਂਕਫਰਟ ਤੇ ਪਹਿਲਾਂ ਦੇ ਮੁਕਾਬਲੇ ਸ਼ੇਅਰਾਂ ਦੀ ਵੇਚ ਵੱਟ ਵਿੱਚ ਕਮੀ ਦਰਜ ਕੀਤੀ ਗਈ। ਏਸ਼ੀਆ ਦੀ ਗੱਲ ਕਰੀਏ ਤਾਂ ਹਾਂਗ ਕਾਂਗ ਤੇ ਟੋਕੀਓ ਦੇ ਸ਼ੇਅਰ ਬਾਜ਼ਾਰਾਂ ਵਿੱਚ ਵੱਡੀ ਗਿਰਾਵਟ ਵੇਖਣ ਨੂੰ ਮਿਲੀ। ਸ਼ੰਘਾਈ ਤੇ ਸਿਓਲ ਦੇ ਸ਼ੇਅਰ ਬਾਜ਼ਾਰਾਂ ਨੇ ਥੋੜ੍ਹਾ ਬਹੁਤ ਮੁਨਾਫ਼ਾ ਖੱਟਿਆ। ਟੋਕੀਓ ਦਾ ਨਿੱਕੀ 225 ਅੰਕਾਂ ਦੇ ਨੁਕਸਾਨ ਨਾਲ 26,641.67 ਦੇ ਪੱਧਰ ’ਤੇ ਪੁੱਜ ਗਿਆ ਜਦੋਂਕਿ ਹਾਂਗ ਕਾਂਗ ਦੇ ਹੈਂਗ ਸੈਂਗ ਨੂੰ 0.2 ਫੀਸਦ ਦਾ ਨੁਕਸਾਨ ਹੋਇਆ। ਦੱਖਣੀ ਕੋਰੀਆ ਦੇ ਕੋਸਪੀ ਤੇ ਆਸਟਰੇਲੀਆ ਦੇ ਐੱਸਐਂਡਪੀ/ਏਐੱਸਐੱਕਸ 200 ਨੂੰ ਕ੍ਰਮਵਾਰ 0.2 ਤੇ 0.3 ਫੀਸਦ ਦੀ ਮਾਰ ਪਈ। ਆਸ ਤੋਂ ਉਲਟ ਸ਼ੰਘਾਈ ਦਾ ਕੰਪੋਜ਼ਿਟ ਸੂਚਕ ਅੰਕ 0.6 ਫੀਸਦ ਦੇ ਉਭਾਰ ਨਾਲ ਬੰਦ ਹੋਇਆ।
ਡਾਲਰ ਦੇ ਮੁਕਾਬਲੇ ਰੁਪੱਈਆ 23 ਪੈਸੇ ਡਿੱਗਿਆ, ਸੋਨਾ ਚਮਕਿਆ
ਮੁੰਬਈ: ਘਰੇਲੂ ਬਾਜ਼ਾਰ ’ਚ ਹੁੰਡੀਆਂ/ਸ਼ੇਅਰਾਂ ਦੀ ਵੱਡੇ ਪੱਧਰ ’ਤੇ ਖਰੀਦ ਤੇ ਅਮਰੀਕੀ ਕਰੰਸੀ ਦੇ ਵਿਦੇਸ਼ਾਂ ’ਚ ਮਜ਼ਬੂਤ ਹੋਣ ਕਾਰਨ ਡਾਲਰ ਦੇ ਮੁਕਾਬਲੇ ਭਾਰਤੀ ਰੁਪੱਈਆ ਅੱਜ 23 ਪੈਸੇ ਟੁੱਟ ਕੇ 73.70 ਦੇ ਪੱਧਰ ’ਤੇ ਪੁੱਜ ਗਿਆ। ਕੱਚੇ ਤੇਲ ਦੀ ਕੀਮਤਾਂ ’ਚ ਨਰਮੀ ਤੇ ਵਿਦੇਸ਼ੀ ਫੰਡਾਂ ਦੀ ਆਮਦ ਕਰਕੇ ਰੁਪਏ ਨੂੰ ਕੁਝ ਠੁੰਮਣਾ ਮਿਲਿਆ। ਇਸ ਦੌਰਾਨ ਕੌਮੀ ਰਾਜਧਾਨੀ ’ਚ ਸੋਨੇ ਦਾ ਭਾਅ 496 ਰੁਪਏ ਦੇ ਉਛਾਲ ਨਾਲ 50,297 ਰੁਪਏ ਪ੍ਰਤੀ ਤੋਲਾ (ਦਸ ਗ੍ਰਾਮ) ਦੇ ਭਾਅ ’ਤੇ ਪੁੱਜ ਗਿਆ। ਉਧਰ ਚਾਂਦੀ ਦੇ ਭਾਅ ਵਿੱਚ ਵੀ ਤੇਜ਼ੀ ਰਹੀ ਤੇ ਸਫ਼ੇਦ ਧਾਤ 2249 ਰੁਪਏ ਨੇ ਮੁਨਾਫ਼ੇ ਨਾਲ 69,477 ਰੁਪਏ ਪ੍ਰਤੀ ਕਿਲੋ ਦੇ ਭਾਅ ਵਿਕੀ। -ਪੀਟੀਆਈ