ਨਾਗਪੁਰ, 5 ਅਕਤੂਬਰ
ਮੁੱਖ ਅੰਸ਼
- ਸੰਘ ਦੇ ਦਸਹਿਰਾ ਸਮਾਗਮ ’ਚ ਉੱਘੀ ਪਰਬਤਾਰੋਹੀ ਸੰਤੋਸ਼ ਯਾਦਵ ਮੁੱਖ ਮਹਿਮਾਨ ਵਜੋਂ ਹੋਈ ਸ਼ਾਮਲ
ਰਾਸ਼ਟਰੀ ਸਵੈਮਸੇਵਕ ਸੰਘ (ਆਰਐੱਸਐੱਸ) ਦੇ ਮੁਖੀ ਮੋਹਨ ਭਾਗਵਤ ਨੇ ਅੱਜ ਕਿਹਾ ਕਿ ਘੱਟਗਿਣਤੀਆਂ ਨੂੰ ਦੇਸ਼ ਵਿੱਚ ਕੋਈ ਖ਼ਤਰਾ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਕੁਝ ਲੋਕਾਂ ਵੱਲੋਂ ਡਰ ਫੈਲਾਇਆ ਜਾ ਰਿਹਾ ਹੈ ਕਿ ਘੱਟਗਿਣਤੀ ਖ਼ਤਰੇ ਵਿੱਚ ਹਨ, ਪਰ ਉਨ੍ਹਾਂ ਜ਼ੋਰ ਦੇ ਕੇ ਆਖਿਆ ਕਿ ਨਾ ਸੰਘ ਤੇ ਨਾ ਹਿੰਦੂਆਂ ਦੀ ਅਜਿਹੀ ਕੋਈ ਖ਼ਸਲਤ ਹੈ। ਇਥੇ ਆਰਐੈੱਸਐੱਸ ਦੀ ਦਸਹਿਰਾ ਰੈਲੀ ਨੂੰ ਸੰਬੋਧਨ ਕਰਦਿਆਂ ਭਾਗਵਤ ਨੇ ਕਿਹਾ ਕਿ ਸੰਘ ਭਾਈਚਾਰੇ, ਸੰਦਭਾਵਨਾ ਤੇ ਸ਼ਾਂਤੀ ਦੇ ਪੱਖ ਵਿੱਚ ਖੜਨ ਲਈ ਦ੍ਰਿੜ ਸੰਕਲਪ ਹੈ। ਭਾਗਵਤ ਨੇ ਕਿਹਾ ਕਿ ਭਾਰਤ ਕੌਮੀ ਸੁਰੱਖਿਆ ਦੇ ਮੋਰਚੇ ’ਤੇ ਆਤਮ-ਨਿਰਭਰ ਬਣ ਰਿਹਾ ਹੈ। ਭਾਰਤ ਨੇ ਜਿਸ ਤਰੀਕੇ ਨਾਲ ਹਾਲ ਹੀ ਵਿੱਚ ਸੰਕਟ ’ਚ ਘਿਰੇ ਸ੍ਰੀਲੰਕਾ ਦੀ ਬਾਂਹ ਫੜ੍ਹੀ ਤੇ ਯੂਕਰੇਨ-ਰੂਸ ਜੰਗ ਬਾਰੇ ਸਟੈਂਡ ਲਿਆ, ਉੁਸ ਤੋਂ ਸਾਫ਼ ਹੈ ਕਿ ਭਾਰਤ ਦੀ ਆਲਮੀ ਪੱਧਰ ’ਤੇ ਗੱਲ ਸੁਣੀ ਜਾਂਦੀ ਹੈ।
ਭਾਗਵਤ ਨੇ ਨਾ-ਬਰਾਬਰੀ ਬਾਰੇ ਫ਼ਿਕਰਾਂ ਦੀ ਗੱਲ ਕਰਦਿਆਂ ਕਿਹਾ, ‘‘ਜਦੋਂ ਤੱਕ ਮੰਦਿਰ, ਜਲ ਦੇ ਸੋਮੇ ਤੇ ਸ਼ਮਸ਼ਾਨਘਾਟ ਸਾਰੇ ਹਿੰਦੂਆਂ ਲਈ ਖੁੱਲ੍ਹੇ ਨਹੀਂ ਹਨ, ਉਦੋਂ ਤੱਕ ਬਰਾਬਰੀ ਦੀ ਗੱਲ ਕਰਨਾ ਮਹਿਜ਼ ਸੁਪਨਾ ਰਹੇਗੀ।’’ ਸੰਘ ਮੁਖੀ ਨੇ ਕਿਹਾ ਕਿ ਉਦੈਪੁਰ ਤੇ ਅਮਰਾਵਤੀ ਜਿਹੀਆਂ ਘਟਨਾਵਾਂ (ਜਿੱਥੇ ਭਾਜਪਾ ਦੀ ਮੁਅੱਤਲਸ਼ੁਦਾ ਤਰਜਮਾਨ ਨੂਪੁਰ ਸ਼ਰਮਾ ਦੀ ਹਮਾਇਤ ਕਰਨ ਵਾਲੇ ਦਰਜ਼ੀ ਤੇ ਫਾਰਮਾਸਿਸਟ ਦੀ ਹੱਤਿਆ ਕਰ ਦਿੱਤੀ ਗਈ ਸੀ) ਦਾ ਦੁਹਰਾਅ ਨਾ ਹੋਵੇ। ਉਨ੍ਹਾਂ ਕਿਹਾ ਕਿ ਕਿਸੇ ਘਟਨਾ ਲਈ ਪੂਰੇ ਭਾਈਚਾਰੇ ਨੂੰ ਉਸ ਦਾ ਮੂਲ ਕਾਰਨ ਨਾ ਮੰਨਿਆ ਜਾਵੇ। ਭਾਗਵਤ ਨੇ ਕਿਹਾ ਕਿ ‘ਹਿੰਦੂ ਰਾਸ਼ਟਰ’ ਦੇ ਸੰਕਲਪ ਨੂੰ ਗੰਭੀਰਤਾ ਨਾਲ ਲਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ, ‘‘ਹੁਣ ਜਦੋਂ ਸੰਘ ਨੂੰ ਲੋਕਾਂ ਦਾ ਸਨੇਹ ਤੇ ਭਰੋਸਾ ਮਿਲ ਰਿਹਾ ਹੈ ਤੇ ਉਹ ਹੋਰ ਮਜ਼ਬੂਤ ਹੋ ਗਿਆ ਹੈ, ਹਿੰਦੂ ਰਾਸ਼ਟਰ ਦੇ ਸੰਕਲਪ ਨੂੰ ਸੰਜੀਦਗੀ ਨਾਲ ਲਿਆ ਜਾਣ ਲੱਗਾ ਹੈ।’’
ਭਾਗਵਤ ਨੇ ਕਿਹਾ, ‘‘ਕਈ ਲੋਕ ਇਸ ਧਾਰਨਾ ਨਾਲ ਸਹਿਮਤ ਹਨ, ਪਰ ‘ਹਿੰਦੂ’ ਸ਼ਬਦ ਦਾ ਵਿਰੋਧ ਕਰਦੇ ਹਨ ਤੇ ਉਹ ਹਰ ਸ਼ਬਦ ਵਰਤਣ ਨੂੰ ਤਰਜੀਹ ਦਿੰਦੇ ਹਨ। ਸਾਨੂੰ ਇਸ ਨਾਲ ਕੋਈ ਫ਼ਰਕ ਨਹੀਂ ਪੈਂਦਾ। ਪਰ ਸੰਕਲਪ ਦੀ ਸਪਸ਼ਟਤਾ ਲਈ- ਅਸੀਂ ਆਪਣੇ ਲਈ ਹਿੰਦੂ ਸ਼ਬਦ ’ਤੇ ਜ਼ੋਰ ਦਿੰਦੇ ਰਹਾਂਗੇ।’’ ਸੰਘ ਮੁਖੀ ਨੇ ਆਪਣੀ ਤਕਰੀਰ ਵਿੱਚ ਮਹਿਲਾਵਾਂ ਨੂੰ ਸਸ਼ਕਤ ਬਣਾਉਣ ਉੱਤੇ ਵੀ ਜ਼ੋਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਮਹਿਲਾਵਾਂ ਬਿਨਾਂ ਸਮਾਜ ਤਰੱਕੀ ਨਹੀਂ ਕਰ ਸਕਦਾ। ਸਮਾਗਮ ਵਿੱਚ ਉੱਘੀ ਪਰਬਤਾਰੋਹੀ ਸੰਤੋਸ਼ ਯਾਦਵ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਈ। ਯਾਦਵ ਪਹਿਲੀ ਮਹਿਲਾ ਹੈ, ਜਿਸ ਨੂੰ ਵਿਸ਼ਵ ਦੀ ਸਭ ਤੋਂ ਉੱਚੀ ਚੋਟੀ ਮਾਊਂਟ ਐਵਰੈਸਟ ’ਤੇ ਦੋ ਵਾਰ ਚੜ੍ਹਨ ਦਾ ਮਾਣ ਹਾਸਲ ਹੈ।
ਭਾਗਵਤ ਨੇ ਕਿਹਾ ਕਿ ਉਦੈਪੁਰ ਕਾਂਡ ਤੋਂ ਬਾਅਦ ਮੁਸਲਿਮ ਸਮਾਜ ਦੇ ਕੁਝ ਪ੍ਰਮੁੱਖ ਵਿਅਕਤੀਆਂ ਨੇ ਇਸ ਦਾ ਵਿਰੋਧ ਕੀਤਾ ਸੀ। ਉਨ੍ਹਾਂ ਕਿਹਾ, ‘‘ਇਸ ਤਰ੍ਹਾਂ ਦਾ ਵਿਰੋਧ ਮੁਸਲਿਮ ਸਮਾਜ ਅੰਦਰ ਇਕ ਵੱਖਰਾ ਵਰਤਾਰਾ ਨਹੀਂ ਹੋਣਾ ਚਾਹੀਦਾ, ਸਗੋਂ ਇਹ ਉਨ੍ਹਾਂ ਦੇ ਵੱਡੇ ਵਰਗਾਂ ਦਾ ਸੁਭਾਅ ਬਣ ਜਾਣਾ ਚਾਹੀਦਾ ਹੈ।’’ ਉਨ੍ਹਾਂ ਕਿਹਾ, ‘‘ਆਮ ਤੌਰ ’ਤੇ ਹਿੰਦੂ ਸਮਾਜ ਅਜਿਹੀਆਂ ਘਟਨਾਵਾਂ ਤੋਂ ਬਾਅਦ ਜ਼ੋਰਦਾਰ ਢੰਗ ਨਾਲ ਆਪਣਾ ਵਿਰੋਧ ਅਤੇ ਸਖ਼ਤ ਪ੍ਰਤੀਕਰਮ ਪ੍ਰਗਟ ਕਰਦਾ ਹੈ, ਭਾਵੇਂ ਦੋਸ਼ੀ ਹਿੰਦੂ ਵਿਅਕਤੀ ਹੀ ਕਿਉਂ ਨਾ ਹੋਣ।’’ ਉਨ੍ਹਾਂ ਕਿਹਾ, ‘‘ਭੜਕਾਹਟ ਦੀ ਹੱਦ ਜੋ ਵੀ ਹੋਵੇ, ਵਿਰੋਧ ਪ੍ਰਦਰਸ਼ਨ ਹਮੇਸ਼ਾ ਕਾਨੂੰਨ ਅਤੇ ਸੰਵਿਧਾਨ ਦੀਆਂ ਸੀਮਾਵਾਂ ਦੇ ਅੰਦਰ ਹੋਣੇ ਚਾਹੀਦੇ ਹਨ। ਸਾਡੇ ਸਮਾਜ ਨੂੰ ਟੁੱਟਣ ਤੇ ਲੜਨ ਝਗੜਨ ਦੀ ਥਾਂ ਇਕਜੁਟ ਹੋਣਾ ਚਾਹੀਦਾ ਹੈ।’’ -ਪੀਟੀਆਈ
ਨਵੀਂ ਆਬਾਦੀ ਨੀਤੀ ਭਾਈਚਾਰਿਆਂ ’ਤੇ ਇਕਸਾਰ ਲਾਗੂ ਕਰਨ ਦੀ ਵਕਾਲਤ
ਨਾਗਪੁਰ: ਸੰਘ ਮੁਖੀ ਮੋਹਨ ਭਾਗਵਤ ਨੇ ਆਪਣੇ ਸੰਬੋਧਨ ਦੌਰਾਨ ਆਬਾਦੀ ਨੂੰ ਕੰਟਰੋਲ ਕਰਨ ਲਈ ਵਿਆਪਕ ਨੀਤੀ ਦੀ ਵਕਾਲਤ ਕੀਤੀ, ਜੋ ਸਾਰੇ ਭਾਈਚਾਰਿਆਂ ’ਤੇ ਇਕਸਾਰ ਲਾਗੂ ਹੋਵੇ। ਉਨ੍ਹਾਂ ਕਿਹਾ ਕਿ ਭਾਰਤ ਆਬਾਦੀ ਨਾਲ ਜੁੜੀ ਨਵੀਂ ਨੀਤੀ ਨੂੰ ਵਿਆਪਕ ਸੋਚ ਵਿਚਾਰ ਮਗਰੋਂ ਤਿਆਰ ਕਰੇ, ਜੋ ਸਾਰੇ ਭਾਈਚਾਰਿਆਂ ’ਤੇੇ ਬਰਾਬਰ ਲਾਗੂ ਹੁੰਦੀ ਹੋਵੇ। ਭਾਗਵਤ ਨੇ ਕਿਹਾ ਕਿ ਭਾਈਚਾਰਿਆਂ ਕਰਕੇ ਆਬਾਦੀ ਦਾ ਤਵਾਜ਼ਨ ਵਿਗੜਨਾ ਅਹਿਮ ਵਿਸ਼ਾ ਹੈ ਤੇ ਇਸ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ, ਕਿਉਂਕਿ ਇਸ ਕਰਕੇ ਭੂਗੋਲਿਕ ਸੀਮਾਵਾਂ ਵਿੱਚ ਬਦਲਾਅ ਹੁੰਦਾ ਹੈ। ਸੰਘ ਮੁਖੀ ਨੇ ਕਿਹਾ, ‘‘75 ਸਾਲ ਪਹਿਲਾਂ ਅਸੀਂ ਇਸ ਬਦਲਾਅ ਦਾ ਅਨੁਭਵ ਕੀਤਾ ਸੀ। 21ਵੀਂ ਸਦੀ ਵਿੱਚ ਤਿੰਨ ਮੁਲਕ- ਈਸਟ ਤਿਮੋਰ, ਸਾਊਥ ਸੁਡਾਨ ਤੇ ਕੋਸੋਵੋ- ਹੋਂਦ ਵਿੱਚ ਆਏ ਅਤੇ ਇਹ ਇੰਡੋਨੇਸ਼ੀਆ, ਸੁਡਾਨ ਤੇ ਸਰਬੀਆ ਦੇ ਕੁਝ ਇਲਾਕਿਆਂ ਵਿੱਚ ਆਬਾਦੀ ਦੇ ਤਵਾਜ਼ਨ ਵਿੱਚ ਵਿਗਾੜ ਦਾ ਨਤੀਜਾ ਹਨ। ਇਸ ਤੋਂ ਇਲਾਵਾ ਜਨਮ ਦਰ ਵਿਚਲਾ ਫ਼ਰਕ, ਜਬਰੀ, ਵਰਗਲਾ ਕੇ ਜਾਂ ਫਿਰ ਲਾਲਚ ਦੇ ਕੇ ਧਰਮ ਪਰਿਵਰਤਨ ਤੇ ਘੁਸਪੈਠ ਵੀ ਇਸ ਦੇ ਵੱਡੇ ਕਾਰਨ ਹਨ। ਇਨ੍ਹਾਂ ਸਾਰੇ ਕਾਰਕਾਂ ’ਤੇ ਸੰਜੀਦਗੀ ਨਾਲ ਸੋਚ ਵਿਚਾਰ ਦੀ ਲੋੜ ਹੈ।’’ ਚੀਨ ਦੀ ‘ਇਕ ਪਰਿਵਾਰ ਇਕ ਬੱਚਾ’ ਨੀਤੀ ਵੱਲ ਇਸ਼ਾਰਾ ਕਰਦਿਆਂ ਭਾਗਵਤ ਨੇ ਕਿਹਾ, ‘ਜਦੋਂ ਅਸੀਂ ਆਬਾਦੀ ਨੂੰ ਕੰਟਰੋਲ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਾਂ, ਸਾਨੂੰ ਇਹ ਦੇਖਣਾ ਚਾਹੀਦਾ ਹੈ ਕਿ ਚੀਨ ਵਿੱਚ ਕੀ ਹੋਇਆ ਹੈ। ਉਹ ਦੇਸ਼ ਇਕ ਬੱਚਾ ਨੀਤੀ ਲਈ ਚੱਲਿਆ ਸੀ ਅਤੇ ਹੁਣ ਇਹ ਬੁੱਢਾ ਹੋ ਰਿਹਾ ਹੈ।” “ਭਾਰਤ ਵਿੱਚ 57 ਕਰੋੜ ਨੌਜਵਾਨਾਂ ਦੀ ਆਬਾਦੀ ਨਾਲ, ਅਸੀਂ ਅਗਲੇ 30 ਸਾਲਾਂ ਤੱਕ ਇੱਕ ਨੌਜਵਾਨ ਰਾਸ਼ਟਰ ਹੀ ਰਹਾਂਗੇ, ਪਰ 50 ਸਾਲਾਂ ਬਾਅਦ ਭਾਰਤ ਦਾ ਕੀ ਬਣੇਗਾ? ਆਬਾਦੀ ਦਾ ਢਿੱਡ ਭਰਨ ਲਈ ਕੀ ਸਾਡੇ ਕੋਲ ਕਾਫ਼ੀ ਭੋਜਨ ਹੈ?’ ’-ਪੀਟੀਆਈ
ਅਬਾਦੀ ਨੂੰ ਕੰਟਰੋਲ ਕਰਨ ਦੀ ਕੋਈ ਲੋੜ ਨਹੀਂ: ਓਵਾਇਸੀ
ਹੈਦਰਾਬਾਦ: ਏਆਈਐੱਮਆਈਐੱਮ ਮੁਖੀ ਅਸਦੂਦੀਨ ਓਵਾਇਸੀ ਨੇ ਆਰਐੱਸਐੱਸ ਮੁਖੀ ਮੋਹਨ ਭਾਗਵਤ ਦੀਆਂ ਟਿੱਪਣੀਆਂ ਦੇ ਹਵਾਲੇ ਨਾਲ ਕਿਹਾ ਕਿ ਆਬਾਦੀ ਨੂੰ ਕੰਟਰੋਲ ਕਰਨ ਦੀ ਕੋਈ ਲੋੜ ਨਹੀਂ ਹੈ ਕਿਉਂਕਿ ਦੇਸ਼ ਨੇ ਤਬਾਦਲਾ ਦਰ ਦੇ ਟੀਚੇ ਨੂੰ ਪਹਿਲਾਂ ਹੀ ਹਾਸਲ ਕਰ ਲਿਆ ਹੈ। ਓਵਾਇਸੀ ਨੇ ਟਵੀਟ ਕੀਤਾ, ‘‘ਜੇਕਰ ਹਿੰਦੂਆਂ ਤੇ ਮੁਸਲਮਾਨਾਂ ਦਾ ‘ਇਕੋ ਡੀਐੱਨਏ’ ਹੈ ਤਾਂ ਫਿਰ ਤਵਾਜ਼ਨ ਵਿਗੜਨ ਦੀ ਗੱਲ ਕਿੱਥੇ ਹੈ? ਆਬਾਦੀ ਕੰਟਰੋਲ ਕਰਨ ਦੀ ਕੋਈ ਲੋੋੜ ਨਹੀਂ ਹੈ, ਕਿਉਂਕਿ ਅਸੀਂ ਤਬਾਦਲਾ ਦਰ ਦੇ ਟੀਚੇ ਨੂੰ ਪਹਿਲਾਂ ਹੀ ਹਾਸਲ ਕਰ ਚੁੱਕੇ ਹਾਂ। ਫ਼ਿਕਰ ਤਾਂ ਬਜ਼ੁਰਗ ਵਸੋਂ ਤੇ ਬੇਰੁਜ਼ਗਾਰ ਨੌਜਵਾਨਾਂ ਦੀ ਹੈ, ਜੋ ਬਜ਼ੁਰਗਾਂ ਦਾ ਸਹਾਰਾ ਨਹੀਂ ਬਣ ਸਕੇ। ਮੁਸਲਮਾਨਾਂ ਦੀ ਜਣਨ ਦਰ ਤੇਜ਼ੀ ਨਾਲ ਡਿੱਗੀ ਹੈ।’’ -ਪੀਟੀਆਈ