ਲੱਦਾਖ: ਭਾਰਤ-ਚੀਨ ਵਿਚਾਲੇ ਪੰਜਵੇਂ ਗੇੜ ਦੀ ਗੱਲਬਾਤ

* ਸਰਹੱਦੀ ਵਿਵਾਦ ਸੁਲਝਾਉਣ ਲਈ ਫ਼ੌਜੀ ਕਮਾਂਡਰ ਪੱਧਰ ਦੀ ਗੱਲਬਾਤ * ਪੈਂਗੌਂਗ ਦੇ ਫਿੰਗਰ ਇਲਾਕਿਆਂ ’ਚੋਂ ਚੀਨੀ ਫ਼ੌਜ ਨੂੰ ਹਟਣ ਲਈ ਕਹਿਣ ’ਤੇ ਜ਼ੋਰ

ਲੱਦਾਖ: ਭਾਰਤ-ਚੀਨ ਵਿਚਾਲੇ ਪੰਜਵੇਂ ਗੇੜ ਦੀ ਗੱਲਬਾਤ

ਨਵੀਂ ਦਿੱਲੀ, 2 ਅਗਸਤ

ਭਾਰਤ ਤੇ ਚੀਨ ਦੇ ਸੀਨੀਅਰ ਫ਼ੌਜੀ ਕਮਾਂਡਰਾਂ ਵਿਚਾਲੇ ਗੱਲਬਾਤ ਦਾ ਤਾਜ਼ਾ ਗੇੜ ਜਾਰੀ ਹੈ। ਗੱਲਬਾਤ ਕਰ ਕੇ ਅਸਲ ਕੰਟਰੋਲ ਰੇਖਾ ਦੇ ਨਾਲ ਟਕਰਾਅ ਵਾਲੀਆਂ ਥਾਵਾਂ ’ਤੇ ਦੋਵਾਂ ਦੇਸ਼ਾਂ ਦੀਆਂ ਫ਼ੌਜਾਂ ਨੂੰ ਇਕ-ਦੂਜੇ ਤੋਂ ਦੂਰ ਕਰਨ ਦੀ ਪ੍ਰਕਿਰਿਆ ਤੇਜ਼ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ। ਕੋਰ ਕਮਾਂਡਰ ਪੱਧਰ ਦੇ ਫ਼ੌਜੀ ਅਧਿਕਾਰੀਆਂ ਵਿਚਾਲੇ ਗੱਲਬਾਤ ਦਾ ਇਹ ਪੰਜਵਾਂ ਗੇੜ ਹੈ। ਪੰਜ ਮਈ ਨੂੰ ਹੋਏ ਟਕਰਾਅ ਤੋਂ ਬਾਅਦ ਸਰਹੱਦੀ ਤਣਾਅ ਘਟਾਉਣ ਲਈ ਲਗਾਤਾਰ ਗੱਲਬਾਤ ਦੇ ਦੌਰ ਚਲਾਏ ਜਾ ਰਹੇ ਹਨ। ਮੀਟਿੰਗ ਅੱਜ ਅਸਲ ਕੰਟਰੋਲ ਰੇਖਾ ਦੇ ਚੀਨ ਵਾਲੇ ਪਾਸੇ ਮੋਲਡੋ ਵਿਚ ਹੋਈ। ਸੂਤਰਾਂ ਮੁਤਾਬਕ ਭਾਰਤੀ ਧਿਰ ਪੈਂਗੌਂਗ ਝੀਲ ਇਲਾਕੇ ’ਚੋਂ ਚੀਨੀ ਫ਼ੌਜ ਨੂੰ ਪੂਰੀ ਤਰ੍ਹਾਂ ਕੱਢਣ ’ਤੇ ਜ਼ੋਰ ਦੇ ਰਹੀ ਹੈ। ਇਸ ਤੋਂ ਇਲਾਵਾ ਗੱਲਬਾਤ ਹੋਰਨਾਂ ਇਲਾਕਿਆਂ ’ਚ ਫ਼ੌਜਾਂ ਨੂੰ ਦੂਰ ਕਰਨ ਉਤੇ ਕੇਂਦਰਿਤ ਹੈ। ਪਿਛਲੀ ਵਾਰ ਗੱਲਬਾਤ 14 ਜੁਲਾਈ ਨੂੰ ਹੋਈ ਸੀ ਤੇ ਕਰੀਬ 15 ਘੰਟੇ ਚੱਲੀ। ਭਾਰਤੀ ਧਿਰ ਨੇ ‘ਸਪੱਸ਼ਟ ਸ਼ਬਦਾਂ’ ਵਿਚ ਕਿਹਾ ਸੀ ਕਿ ਚੀਨ ਪੂਰਬੀ ਲੱਦਾਖ ਵਿਚ ਪਹਿਲਾਂ ਵਾਲੀ ਸਥਿਤੀ ਬਹਾਲ ਕਰੇ। ਇਲਾਕੇ ਵਿਚ ਸ਼ਾਂਤੀ ਬਹਾਲੀ ਲਈ ਸਰਹੱਦੀ ਪ੍ਰਬੰਧਨ ਬਾਰੇ ਦੋਵਾਂ ਮੁਲਕਾਂ ਵਿਚ ਹੋਏ ਸਮਝੌਤਿਆਂ ਉਤੇ ਅਮਲ ਕੀਤਾ ਜਾਵੇ। ਚੀਨ ਦੀ ਫ਼ੌਜ ਗਲਵਾਨ ਵਾਦੀ ਤੇ ਹੋਰਨਾਂ ਟਕਰਾਅ ਵਾਲੀਆਂ ਥਾਵਾਂ ਤੋਂ ਪਹਿਲਾਂ ਹੀ ਪਿੱਛੇ ਹਟ ਚੁੱਕੀ ਹੈ। ਪਰ ਪੈਂਗੌਂਗ ਦੇ ਫਿੰਗਰ ਇਲਾਕਿਆਂ ਵਿਚ ਉਹ ਹਾਲੇ ਵੀ ਜੰਮੇ ਹੋਏ ਹਨ।

-ਪੀਟੀਆਈ

ਹਵਾਈ ਜੰਗ ਹੋਣ ’ਤੇ ਤਿੱਬਤ ਵਿੱਚ ਰਾਫ਼ਾਲ ਤੋਂ ਮਿਲੇਗਾ ਵੱਡਾ ਫਾਇਦਾ: ਧਨੋਆ

ਨਵੀਂ ਦਿੱਲੀ: ਭਾਰਤੀ ਹਵਾਈ ਸੈਨਾ ਦੇ ਸਾਬਕਾ ਮੁੱਖੀ ਬੀ.ਐੱਸ. ਧਨੋਆ ਨੇ ਅੱਜ ਕਿਹਾ ਕਿ ਜੇਕਰ ਭਵਿੱਖ ਵਿੱਚ ਚੀਨ ਨਾਲ ਕਿਸੇ ਵੀ ਤਰ੍ਹਾਂ ਦੀ ਹਵਾਈ ਜੰਗ ਹੁੰਦੀ ਹੈ ਤਾਂ ਪਹਾੜੀ ਖੇਤਰ ਤਿੱਬਤ ਵਿੱਚ ਰਾਫ਼ਾਲ ਜੰਗੀ ਜਹਾਜ਼ ਦਾ ਵੱਡਾ ਲਾਭ ਮਿਲੇਗਾ। ਇਨ੍ਹਾਂ ਜੰਗੀ ਜਹਾਜ਼ਾਂ ਦਾ ਇਸਤੇਮਾਲ ਦੁਸ਼ਮਣ ਦੀ ਹਵਾਈ ਰੱਖਿਆ ਪ੍ਰਣਾਲੀ ਤਹਿਸ-ਨਹਿਸ ਕਰਨ ਅਤੇ ਉਸ ਦੀ ਹਵਾਈ ਮਿਜ਼ਾਈਲ ਦੀ ਸਮਰੱਥਾ ਖ਼ਤਮ ਕਰਨ ਲਈ ਕੀਤਾ ਜਾ ਸਕੇਗਾ। ਬਾਲਾਕੋਟ ਹਵਾਈ ਹਮਲੇ ਦੇ ਰਣਨੀਤੀਕਾਰ ਵਜੋਂ ਜਾਣੇ ਜਾਂਦੇ ਸ੍ਰੀ ਧਨੋਆ ਨੇ ਕਿਹਾ ਕਿ ਲੜਾਈ ਦੌਰਾਨ ਐੱਸ-400 ਮਿਜ਼ਾਈਲ ਪ੍ਰਣਾਲੀ ਨਾਲ ਲੈਸ ਰਾਫ਼ਾਲ ਜੰਗੀ ਜਹਾਜ਼ ਇਸ ਸਾਰੇ ਖੇਤਰ ਵਿੱਚ ਭਾਰਤੀ ਹਵਾਈ ਸੈਨਾ ਨੂੰ ਵੱਡਾ ਲਾਭ ਦੇਣਗੇ ਅਤੇ ਭਾਰਤ ਦੇ ਵਿਰੋਧੀ ਲੜਾਈ ਸ਼ੁਰੂ ਕਰਨ ਤੋਂ ਪਹਿਲਾਂ ਦੋ ਵਾਰ ਸੋਚਣਗੇ। ਉਨ੍ਹਾਂ ਕਿਹਾ ਕਿ ਪਾਕਿਸਤਾਨ ਦੇ ਮਾਮਲੇ ਵਿੱਚ ਐੱਸ-400 ਮਿਜ਼ਾਈਲ ਤੇ ਰਾਫ਼ਾਲ ਦਾ ਇਸਤੇਮਾਲ ਪਾਕਿਸਤਾਨੀ ਜਹਾਜ਼ਾਂ ਨੂੰ ਉਨ੍ਹਾਂ ਦੀ ਹਵਾਈ ਸੀਮਾ ਵਿੱਚ ਡੇਗਣ ਲਈ ਕੀਤਾ ਜਾ ਸਕਦਾ ਹੈ, ਨਾ ਕਿ ਉਦੋਂ ਜਦੋਂ ਉਹ ਭਾਰਤੀ ਹੱਦ ਵਿੱਚ ਹੋਣ। ਉਨ੍ਹਾਂ ਕਿਹਾ ਕਿ ਗੁਆਂਢੀ ਮੁਲਕ ਬਾਲਾਕੋਟ ਹਮਲੇ ਦਾ ਜਵਾਬ ਨਹੀਂ ਸੀ ਦੇ ਸਕਦਾ, ਜੇਕਰ ਉਸ ਵੇਲੇ ਭਾਰਤ ਕੋਲ ਫਰਾਂਸ ਦੇ ਬਣੇ ਹੋਏ ਰਾਫ਼ਾਲ ਜਹਾਜ਼ ਹੁੰਦੇ। ਪੀਟੀਆਈ ਨੂੰ ਦਿੱਤੇ ਇਕ ਇੰਟਰਵਿਊ ਵਿੱਚ ਸ੍ਰੀ ਧਨੋਆ ਨੇ ਕਿਹਾ ਕਿ ਆਪਣੇ ਵਧੀਆ ਇਲੈਕਟ੍ਰੌਨਿਕ ਜੰਗੀ ਉਪਕਰਨਾਂ ਦੀ ਮਦਦ ਨਾਲ ਰਾਫ਼ਾਲ ਤਿੱਬਤ ਵਿੱਚ ਪਹਾੜੀ ਇਲਾਕੇ ਦਾ ਇਸਤੇਮਾਲ ਕਰਦੇ ਹੋਏ ਭਾਰਤ ਦੇ ਹਵਾਈ ਹਮਲੇ ਵਿੱਚ ਕਾਫੀ ਸਹਾਈ ਸਾਬਿਤ ਹੋ ਸਕਦਾ ਹੈ।
-ਪੀਟੀਆਈ

ਸਭ ਤੋਂ ਵੱਧ ਪੜ੍ਹੀਆਂ ਖ਼ਬਰਾਂ

ਜ਼ਰੂਰ ਪੜ੍ਹੋ

ਸ਼ਹਿਰ

View All