ਕਨੌਜ(ਉੱਤਰ ਪ੍ਰਦੇਸ਼), 2 ਜੁਲਾਈ
ਇਸ ਜ਼ਿਲ੍ਹੇ ਦੇ ਮੀਆਂਗੰਜ ਵਿੱਚ ਪਰਿਵਾਰ ਦੇ ਛੇ ਜੀਆਂ ਨੂੰ ਗੰਭੀਰ ਹਾਲਤ ਵਿੱਚ ਇਸ ਲਈ ਭਰਤੀ ਕਰਵਾਉਣਾ ਪਿਆ ਕਿਉਂਕਿ ਪਰਿਵਾਰ ਨੇ ਭੰਗ ਨੂੰ ਮੇਥੀ ਸਮਝ ਛਕ ਲਿਆ। ਪੁਲੀਸ ਅਨੁਸਾਰ ਮੰਗਲਵਾਰ ਨੂੰ ਨਵਲ ਕਿਸ਼ੋਰ ਨੇ ਆਪਣੇ ਗੁਆਂਢੀ ਓਮ ਪ੍ਰਕਾਸ਼ ਦੇ ਬੇਟੇ ਨਿਤਿਸ਼ ਨੂੰ ਇਹ ਕਹਿ ਕੇ ਬੂਟੀ ਦਿੱਤੀ ਕਿ ਇਹ ਸੁੱਕੀ ਮੇਥੀ ਹੈ। ਨਿਤੀਸ਼ ਨੇ ਪੱਤੇ ਆਪਣੀ ਭੈਣ ਪਿੰਕੀ ਨੂੰ ਦੇ ਦਿੱਤੇ ਤੇ ਉਸ ਨੇ ਮੇਥੀ ਚੁੱਲ੍ਹੇ ’ਤੇ ਧਰ ਦਿੱਤੀ। ਪਰਿਵਾਰ ਨੇ ਉਸ ਨੂੰ ਛਕਿਆ ਤਾਂ ਕੁੱਝ ਸਮੇਂ ਬਾਅਦ ਉਸ ਦੀ ਹਾਲਤ ਵਿਗੜ ਗਈ। ਓਮ ਪ੍ਰਕਾਸ਼ ਕਿਸੇ ਤਰ੍ਹਾਂ ਆਪਣੇ ਗੁਆਂਢੀਆਂ ਨੂੰ ਪਰਿਵਾਰ ਦੀ ਹਾਲਤ ਬਾਰੇ ਦੱਸਣ ਵਿੱਚ ਕਾਮਯਾਬ ਹੋ ਗਿਆ ਤੇ ਉਸ ਮਗਰੋਂ ਸਾਰਾ ਪਰਿਵਾਰ ਬੇਸੁਰਤ ਪਿਆ ਰਿਹਾ। ਗੁਆਂਢੀਆਂ ਨੇ ਪੁਲੀਸ ਨੂੰ ਸੂਚਿਤ ਕੀਤਾ ਅਤੇ ਪਰਿਵਾਰ ਨੂੰ ਹਸਪਤਾਲ ਪਹੁੰਚਾਇਆ ਗਿਆ।
ਪੁਲੀਸ ਨੇ ਬਾਕੀ ਬਚੀ ਭੰਗ ਜੋ ਪੈਕਟ ਵਿੱਚ ਪਈ ਸੀ ਨੂੰ ਜ਼ਬਤ ਕਰਕੇ ਨਵਲ ਕਿਸ਼ੋਰ ਨੂੰ ਗ੍ਰਿਫ਼ਤਾਰ ਕਰ ਲਿਆ ਗਿਆ ਹੈ।ਸੀਨੀਅਰ ਪੁਲੀਸ ਅਧਿਕਾਰੀ ਨੇ ਦੱਸਿਆ ਕਿ ਪਰਿਵਾਰ ਖ਼ਤਰੇ ਤੋਂ ਬਾਹਰ ਹੈ।