ਨਵੀਂ ਦਿੱਲੀ: ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਅੱਜ ਕਿਹਾ ਕਿ ਭਾਰਤ ਕਿਸੇ ਅਜਿਹੇ ਆਲਮੀ ਪ੍ਰਬੰਧ ‘ਚ ਯਕੀਨ ਨਹੀਂ ਰੱਖਦਾ ਜਿੱਥੇ ਕੁਝ ਲੋਕਾਂ ਨੂੰ ਦੂਜਿਆਂ ਤੋਂ ਸਰਵੋਤਮ ਸਮਝਿਆ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਮੁਲਕਾਂ ਦੇ ਕੰਮ ਮਨੁੱਖਾਂ ਦੀ ਬਰਾਬਰੀ ਤੇ ਸਨਮਾਨ ਦੇ ਸਾਰ ਤੱਤ ਤੋਂ ਅਗਵਾਈ ਲੈਣ ਵਾਲੇ ਹੋਣੇ ਚਾਹੀਦੇ ਹਨ ਜੋ ਪ੍ਰਾਚੀਨ ਕਦਰਾਂ-ਕੀਮਤਾਂ ਦਾ ਹਿੱਸਾ ਹਨ। ਹਿੰਦ ਪ੍ਰਸ਼ਾਂਤ ਖੇਤਰੀ ਵਾਰਤਾ (ਆਈਪੀਆਰਡੀ) 2022 ਪ੍ਰੋਗਰਾਮ ਨੂੰ ਸੰਬੋਧਨ ਕਰਦਿਆਂ ਰਾਜਨਾਥ ਸਿੰਘ ਨੇ ਕਿਹਾ ਕਿ ਭਾਰਤ ਨੇ ਸੁਰੱਖਿਆ ਤੇ ਖੁਸ਼ਹਾਲੀ ਨੂੰ ਹਮੇਸ਼ਾ ਸਾਰੀ ਮਨੁੱਖਤਾ ਦੇ ਸਾਂਝੇ ਮਕਸਦ ਦੇ ਰੂਪ ‘ਚ ਦੇਖਿਆ ਹੈ। ਉਨ੍ਹਾਂ ਕਿਹਾ, ‘ਮੇਰਾ ਪੱਕਾ ਭਰੋਸਾ ਹੈ ਕਿ ਜੇਕਰ ਸੁਰੱਖਿਆ ਸਹੀ ਮਾਇਨਿਆਂ ‘ਚ ਸਮੂਹਿਕ ਯਤਨ ਬਣ ਜਾਂਦੀ ਹੈ ਤਾਂ ਅਸੀਂ ਇੱਕ ਅਜਿਹਾ ਆਲਮੀ ਪ੍ਰਬੰਧ ਤਿਆਰ ਕਰਨ ਬਾਰੇ ਸੋਚ ਸਕਦੇ ਹਾਂ ਜੋ ਸਾਡੇ ਸਾਰਿਆਂ ਲਈ ਲਾਹੇਵੰਦ ਹੋਵੇ।’ ਉਨ੍ਹਾਂ ਕਿਹਾ, ‘ਭਾਰਤ ਬਹੁਪੱਧਰੀ ਗੱਠਜੋੜ ਦੀ ਨੀਤੀ ‘ਚ ਵਿਸ਼ਵਾਸ ਕਰਦਾ ਹੈ ਜਿਸ ਨੂੰ ਵੱਖ ਵੱਖ ਹਿੱਤਧਾਰਕਾਂ ਰਾਹੀਂ ਵੱਖ ਵੱਖ ਸੰਪਰਕਾਂ ਰਾਹੀਂ ਹਾਸਲ ਕੀਤਾ ਜਾ ਰਿਹਾ ਹੈ ਤਾਂ ਜੋ ਸਾਰਿਆਂ ਦੇ ਵਿਚਾਰਾਂ ਤੇ ਫਿਕਰਾਂ ਬਾਰੇ ਚਰਚਾ ਕੀਤੀ ਜਾ ਸਕੇ ਤੇ ਉਨ੍ਹਾਂ ਦਾ ਨਿਬੇੜਾ ਕੀਤਾ ਜਾ ਸਕੇ।’ -ਪੀਟੀਆਈ