ਅਗਰਤਲਾ, 28 ਨਵੰਬਰ
ਤ੍ਰਿਪੁਰਾ ਵਿੱਚ ਅਗਰਤਲਾ ਨਗਰ ਨਿਗਮ (ਏਐੱਮਸੀ) ਅਤੇ ਹੋਰ ਨਗਰ ਕੌਂਸਲਾਂ ਤੇ ਨਿਗਮਾਂ ਦੀਆਂ 200 ਤੋਂ ਵੱਧ ਸੀਟਾਂ ਲਈ ਹੋਈਆਂ ਚੋਣਾਂ ਲਈ ਵੋਟਾਂ ਦੀ ਗਿਣਤੀ ਜਾਰੀ ਹੈ।ਨਤੀਜਿਆਂ ਵਿੱਚ ਸੱਤਾਧਾਰੀ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਸ਼ਾਨਦਾਰ ਜਿੱਤ ਵੱਲ ਵਧ ਰਹੀ ਹੈ। ਰਾਜ ਚੋਣ ਕਮਿਸ਼ਨ ਦੇ ਅਧਿਕਾਰੀਆਂ ਨੇ ਦੱਸਿਆ ਕਿ ਭਾਜਪਾ ਨੇ 51 ਮੈਂਬਰੀ ਏਐੱਮਸੀ ਵਿੱਚ 37 ਸੀਟਾਂ ਜਿੱਤ ਕੇ ਪੂਰਨ ਬਹੁਮਤ ਹਾਸਲ ਕਰ ਲਿਆ ਹੈ। ਬਾਕੀ ਸੀਟਾਂ ‘ਤੇ ਵੋਟਾਂ ਦੀ ਗਿਣਤੀ ਜਾਰੀ ਹੈ। ਖੋਵਾਈ ਨਗਰ ਪਰਿਸ਼ਦ, ਕੁਮਾਰਘਾਟ ਨਗਰ ਪਰਿਸ਼ਦ, ਸਬਰੂਮ ਨਗਰ ਪੰਚਾਇਤ ਅਤੇ ਅਮਰਪੁਰ ਨਗਰ ਪੰਚਾਇਤ ਵਿੱਚ ਵੀ ਭਾਜਪਾ ਨੇ ਜਿੱਤ ਹਾਸਲ ਕੀਤੀ ਹੈ। ਪਾਰਟੀ ਕੈਲਾਸ਼ਹਿਰ, ਤੇਲੀਆਮੁਰਾ, ਮੇਲਾਘਰ ਅਤੇ ਬੇਲੋਨੀਆ ਨਗਰ ਕੌਂਸਲਾਂ ਤੋਂ ਇਲਾਵਾ ਧਰਮਪੁਰ ਅਤੇ ਅੰਬਾਸਾ ਨਗਰ ਪਾਲਿਕਾਵਾਂ, ਪਾਣੀਸਾਗਰ, ਜੀਰਾਨੀਆ ਅਤੇ ਸੋਨਾਪੁਰਾ ਨਗਰ ਕੌਂਸਲਾਂ ਵਿੱਚ ਆਪਣੇ ਵਿਰੋਧੀਆਂ ਤੋਂ ਕਾਫੀ ਅੱਗੇ ਹੈ। ਰਾਜ ਵਿੱਚ ਮਿਉਂਸਿਪਲ ਚੋਣਾਂ ਵਿੱਚ ਧਾਂਦਲੀ ਅਤੇ ਰਾਜਸੀ ਵਿਰੋਧੀਆਂ ਉੱਤੇ ਹਮਲੇ ਕਰਨ ਦੇ ਦੋਸ਼ ਲੱਗੇ ਹਨ।