ਮਨਧੀਰ ਦਿਓਲ/ ਜੋਗਿੰਦਰ ਸਿੰਘ ਮਾਨ
ਨਵੀਂ ਦਿੱਲੀ/ ਮਾਨਸਾ, 1 ਦਸੰਬਰ
ਕੇਦਰ ਸਰਕਾਰ ਵੱਲੋਂ ਦੇਸ਼ ਦੀਆਂ 32 ਕਿਸਾਨ ਜਥੇਬੰਦੀਆਂ ਨੂੰ 1 ਦਸੰਬਰ ਨੂੰ ਤਿੰਨ ਵਜੇ ਖੇਤੀਬਾੜੀ ਕਾਨੂੰਨਾਂ ਬਾਰੇ ਚਰਚਾ ਕਰਨ ਲਈ ਪੱਤਰ ਭੇਜ ਦਿੱਤਾ ਗਿਆ ਹੈ। ਇਹ ਬੈਠਕ ਵਿਗਿਆਨ ਭਵਨ ਵਿਖੇ ਕੀਤੇ ਜਾਣ ਬਾਰੇ ਖੇਤੀ ਮੰਤਰਾਲੇ ਦੇ ਅਧਿਕਾਰੀ ਸੰਜੇ ਅਗਰਵਾਲ ਵੱਲੋਂ ਪੱਤਰ ਭੇਜਿਆ ਗਿਆ। ਕਿਸਾਨ ਜਥੇਬੰਦੀਆਂ ਕੋਲ ਪਹਿਲਾਂ 3 ਦਸੰਬਰ ਲਈ ਗੱਲਬਾਤ ਵਾਸਤੇ ਅਜਿਹਾ ਇੱਕ ਪੱਤਰ ਖੇਤੀ ਮੰਤਰਾਲੇ ਦੇ ਸੱਕਤਰ ਸ੍ਰੀ ਸੁਦਾਂਸੂ ਪਾਂਡੇ ਵਲੋਂ ਭੇਜਿਆ ਗਿਆ ਹੈ। ਇਸ ਪੱਤਰ ਅਨੁਸਾਰ ਕਿਸਾਨ ਆਗੂਆਂ ਨੂੰ ਗੱਲਬਾਤ ਲਈ ਵਿਗਿਆਨ ਭਵਨ ਵਿਖੇ ਹਾਲ ਨੰਬਰ 2, ਨਵੀਂ ਦਿੱਲੀ ਵਿਚ ਬਾਅਦ ਦੁਪਹਿਰ 3 ਵਜੇ ਬੁਲਾਇਆ ਗਿਆ ਹੈ। ਇਸ ਪੱਤਰ ਸਬੰਧੀ ਜਾਣਕਾਰੀ ਭਾਰਤੀ ਕਿਸਾਨ ਯੂਨੀਅਨ (ਮਾਨਸਾ) ਦੇ ਸੂਬਾਈ ਪ੍ਰਧਾਨ ਬੋਘ ਸਿੰਘ ਨੇ ਦੱਸਿਆ ਕਿ ਜਥੇਬੰਦੀਆਂ ਵੱਲੋਂ ਗੱਲਬਾਤ ਲਈ ਅੱਜ ਬਲਾਉਣ ਦਾ ਸਵਾਗਤ ਕੀਤਾ ਜਾਂਦਾ ਹੈ। ਉਨ੍ਹਾਂ ਦੱਸਿਆ ਕਿ ਜਥੇਬੰਦੀਆਂ ਨੇ ਮੀਟਿੰਗ ਵਿੱਚ ਭਾਗ ਲੈਣ ਲਈ ਦੁਪਹਿਰ ਤੋਂ ਪਹਿਲਾਂ ਆਪਣੀ ਵੱਖਰੀ ਮੀਟਿੰਗ ਦਿੱਲੀ ਧਰਨੇ ਨੇੜੇ ਹੋਟਲ ਵਿੱਚ ਬੁਲਾ ਲਈ ਹੈ,ਜਿਸ ਵਿਚ ਕੇਂਦਰ ਸਰਕਾਰ ਨਾਲ ਹੋਣ ਵਾਲੀ ਮੀਟਿੰਗ ਦੀ ਤਿਆਰੀ ਅਤੇ ਕਿਸਾਨੀ ਪੱਖ ਰੱਖਣ ਵਾਲੇ ਬੁਲਾਰਿਆਂ ਦਾ ਨਿਰਣਾ ਲਿਆ ਜਾਵੇਗਾ।