ਲਖਵੀਰ ਸਿੰਘ ਚੀਮਾ
ਟੱਲੇਵਾਲ, 3 ਅਗਸਤ
ਪੰਜਾਬੀ ਯੂਨੀਵਰਸਿਟੀ ਪਟਿਆਲਾ ਦੇ ਗੈਰ ਅਧਿਆਪਨ ਕਰਮਚਾਰੀ ਸੰਘ ਦੇ ਸੀਨੀਅਰ ਆਗੂ ਕੌਰ ਸਿੰਘ ਸੇਖੋਂ ਦਾ ਅੱਜ ਦੇਹਾਂਤ ਹੋ ਗਿਆ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਜੱਦੀ ਪਿੰਡ ਭੋਤਨਾ ਵਿੱਚ ਕੀਤਾ ਗਿਆ। ਕੌਰ ਸਿੰਘ ਸੇਖੋਂ ਨੂੰ ਅੰਤਿਮ ਵਿਦਾਇਗੀ ਦੇਣ ਮੌਕੇ ਉਨ੍ਹਾਂ ਦੇ ਸੰਗੀ ਸਾਥੀ ਅਤੇ ਉਨ੍ਹਾਂ ਦੀ ਵਿਚਾਰਧਾਰਾ ਨਾਲ ਜੁੜੇ ਹੋਏ ਸਾਥੀਆਂ ਵਿਚੋਂ ਨਰਭਿੰਦਰ ਜਮਹੂਰੀ ਅਧਿਕਾਰੀ ਸਭਾ, ਗੁਰਮੀਤ ਸੁਖਪੁਰ ਡੈਮੋਕਰੈਟਿਕ ਟੀਚਰਜ਼ ਫ਼ਰੰਟ, ਸੁਖਵਿੰਦਰ ਠੀਕਰੀਵਾਲ, ਡਾ. ਸੰਪੂਰਨ ਟੱਲੇਵਾਲ ਸਾਹਿਤਕਾਰ, ਹਰਚਰਨ ਚੰਨਾ, ਹਰਭਜਨ ਭੋਤਨਾ, ਰਜਿੰਦਰ ਭਦੌੜ ਤਰਕਸ਼ੀਲ ਆਗੂ ਮੌਜੂਦ ਸਨ। ਆਗੂਆਂ ਨੇ ਉਨ੍ਹਾਂ ਦੀ ਮ੍ਰਿਤਕ ਦੇਹ ’ਤੇ ਲਾਲ ਝੰਡਾ ਪਾ ਕੇ ਵਿਦਾਇਗੀ ਦਿੱੱਤੀ। ਆਗੂਆਂ ਨੇ ਕੌਰ ਸਿੰਘ ਦੇ ਵਿਛੋੜੇ ਨੂੰ ਇਨਕਲਾਬੀ ਜਮਹੂਰੀ ਲਈ ਵੱਡਾ ਘਾਟਾ ਦੱਸਦਿਆਂ ਉਨ੍ਹਾਂ ਦੇ ਸਮਾਜ ਵਿਚ ਪਾਏ ਯੋਗਦਾਨ ਨੂੰ ਸਦੀਵੀ ਦੱਸਿਆ। ਯਾਦ ਰਹੇ ਕਿ ਕੁਝ ਸਾਲ ਪਹਿਲਾਂ ਇੱਕ ਹਾਦਸੇ ਦਾ ਸ਼ਿਕਾਰ ਹੋਣ ਕਰਕੇ ਕੌਰ ਸਿੰਘ ਸੇਖੋਂ ਦੀ ਦਿਮਾਗੀ ਹਾਲਤ ਕਮਜ਼ੋਰ ਪੈ ਗਈ ਸੀ। ਉਹ ਹਮੇਸ਼ਾ ਲੋਕ ਹਿੱਤਾਂ ਲਈ ਅੱਗੇ ਹੋ ਕੇ ਲੜਾਈ ਲੜਦੇ ਰਹੇ।