ਮੀਟਰਾਂ ’ਤੇ ਚਿੱਪ ਲਗਾਉਣ ਆਈ ਪਾਵਰਕੌਮ ਦੀ ਟੀਮ ਬੇਰੰਗ ਪਰਤੀ

ਗੁਰਬਖਸ਼ਪੁਰੀ

ਤਰਨ ਤਾਰਨ, 5 ਫਰਵਰੀ

ਇਲਾਕੇ ਪਿੰਡ ਖਾਰਾ ਵਿੱਚ ਅੱਜ ਖਪਤਕਾਰਾਂ ਦੇ ਬਿਜਲੀ ਦੇ ਮੀਟਰਾਂ ’ਤੇ ਚਿੱਪ ਲਗਾਉਣ ਆਈ ਪਾਵਰਕੌਮ ਦੀ ਟੀਮ ਨੂੰ ਕਿਸਾਨਾਂ ਅਤੇ ਆਮ ਲੋਕਾਂ ਵੱਲੋਂ ਕੀਤੇ ਤਿੱਖੇ ਵਿਰੋਧ ਕਰਕੇ ਬੈਰੰਗ ਪਰਤਣਾ ਪਿਆ| ਪਾਵਰਕੌਮ ਦੀ ਟੀਮ ਅੱਜ ਐਤਵਾਰ ਛੁੱਟੀ ਦੇ ਦਿਨ ਖਾਰਾ ਪਿੰਡ ਵਿੱਚ ਪੁਲੀਸ ਨੂੰ ਨਾਲ ਲੈ ਕੇ ਬਿਜਲੀ ਦੀ ਚੋਰੀ ਰੋਕਣ ਲਈ ਬਿਜਲੀ ਦੇ ਮੀਟਰਾਂ ’ਤੇ ਚਿੱਪ ਲਗਾਉਣ ਲਈ ਆਈ ਸੀ| ਟੀਮ ਦੇ ਆਉਣ ਦੀ ਜਿਵੇਂ ਹੀ ਸੂਚਨਾ ਕਿਸਾਨ ਮਜ਼ਦੂਰ ਸੰਘਰਸ਼ ਕਮੇਟੀ ਪੰਜਾਬ ਦੇ ਬਾਬਾ ਦੀਪ ਸਿੰਘ ਜ਼ੋਨ ਇਕਾਈ ਦੇ ਆਗੂਆਂ ਤੱਕ ਪਹੁੰਚੀ ਤਾਂ ਮੌਕੇ ’ਤੇ ਜਥੇਬੰਦੀ ਦੇ ਆਗੂ ਹਰਪਾਲ ਸਿੰਘ ਪੰਡੋਰੀ ਸਿੱਧਵਾਂ, ਮਨਜਿੰਦਰ ਸਿੰਘ ਗੋਹਲਵੜ, ਹਰਦੀਪ ਸਿੰਘ ਜੌਹਲ, ਬਾਬਾ ਸਵਿੰਦਰ ਸਿੰਘ ਖਾਰਾ ਅਤੇ ਬਲਜੀਤ ਸਿੰਘ ਰਟੌਲ ਦੀ ਅਗਵਾਈ ਵਿੱਚ ਕਿਸਾਨਾਂ ਦੀਆਂ ਟੋਲੀਆਂ ਵੱਡੀ ਗਿਣਤੀ ਵਿੱਚ ਮੌਕੇ ’ਤੇ ਇਕੱਤਰ ਹੋ ਗਈਆਂ ਅਤੇ ਮੌਕੇ ’ਤੇ ਧਰਨਾ ਸ਼ੁਰੂ ਕਰ ਦਿੱਤਾ| ਧਰਨਾਕਾਰੀਆਂ ਨੇ ਚਿੱਪ ਲਗਾਉਣ ਦੀ ਕਾਰਵਾਈ ਦਾ ਤਿੱਖਾ ਵਿਰੋਧ ਕਰਦਿਆਂ ਨਾਅਰੇਬਾਜ਼ੀ ਕੀਤੀ| ਇਸ ਮੌਕੇ ਜਥੇਬੰਦੀ ਦੇ ਆਗੂਆਂ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਜਥੇਬੰਦੀ ਪੰਜਾਬ ਸਰਕਾਰ ਦੀਆਂ ਕਾਰਪੋਰੇਟ ਪੱਖੀ ਨੀਤੀਆਂ ਨੂੰ ਕਾਮਯਾਬ ਨਹੀਂ ਦੇਵੇਗੀ| ਆਗੂਆਂ ਕਿਹਾ ਕਿ ਆਮ ਆਦਮੀ ਦੇ ਹਿੱਤਾਂ ਦੀ ਰਾਖੀ ਕਰਨ ਦਾ ਢਿੰਡੋਰਾ ਪਿੱਟ ਕੇ ਬਣੀ ਆਮ ਆਦਮੀ ਸਰਕਾਰ ਗਰੀਬ ਲੋਕਾਂ ਨੂੰ ਤੰਗ ਕਰਨ ’ਤੇ ਉਤਾਰੂ ਹੈ ਜਿਸ ਨੂੰ ਉਹ ਕਦੇ ਵੀ ਬਰਦਾਸ਼ਤ ਨਹੀਂ ਕਰਨਗੇ| ਲੋਕਾਂ ਦੇ ਤਿੱਖੇ ਵਿਰੋਧ ਕਰਕੇ ਪੁਲੀਸ ਪਾਵਰਕੌਮ ਦੀ ਟੀਮ ਨੂੰ ਮੌਕੇ ਤੋਂ ਵਾਪਸ ਲੈ ਕੇ ਚਲੇ ਗਈ| ਇਸ ਮੌਕੇ ਨਵਜੀਤ ਸਿੰਘ ਗੋਹਲਵੜ, ਦਰਬਾਰਾ ਸਿੰਘ ਗੋਹਲਵੜ, ਅਮਰੀਕ ਸਿੰਘ ਬਾਲਾਚੱਕ, ਗੁਰਮੀਤ ਸਿੰਘ ਜੌਹਲ ਨੇ ਵੀ ਸੰਬੋਧਨ ਕੀਤਾ|