ਪੱਤਰ ਪ੍ਰੇਰਕ
ਤਰਨ ਤਾਰਨ, 26 ਮਈ
ਇਲਾਕੇ ਦੇ ਪਿੰਡ ਦੋਬੁਰਜੀ ਦੇ ਸੋਖੀ ਗਾਰਡਨ ਵਿੱਚ ਅੱਜ ਇਲਾਕੇ ਦੇ 30 ਦੇ ਕਰੀਬ ਪਿੰਡਾਂ ਦੇ ਕਿਸਾਨਾਂ ਨੇ ਇੱਕ ਭਰਵਾਂ ਇਕੱਠ ਕਰ ਕੇ ਲੋਕ ਸਭਾ ਹਲਕਾ ਖਡੂਰ ਸਾਹਿਬ ਤੋਂ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਕੁਲਬੀਰ ਸਿੰਘ ਜ਼ੀਰਾ ਨੂੰ ਸਮਰਥਨ ਦੇਣ ਦਾ ਯਕੀਨ ਦਿਵਾਇਆ| ਇਕੱਠ ਵਿਚ ਦੋਬੁਰਜੀ ਪਿੰਡ ਤੋਂ ਇਲਾਵਾ ਗੋਹਲਵੜ੍ਹ, ਰਟੌਲ, ਬਹਿਲਾ, ਪੰਡੋਰੀ ਰਨ ਸਿੰਘ, ਪੰਡੋਰੀ ਸਿਧਵਾਂ, ਪੰਡੋਰੀ ਹਸਨ, ਕੋਟ ਦੌਸੰਧੀ ਮੱਲ, ਠੱਠੀ ਖਾਰਾ, ਨੂਰਦੀ, ਠਰੂ ਆਦਿ ਦੇ ਕਿਸਾਨ ਇਸ ਇਕੱਠ ਵਿਚ ਸ਼ਾਮਲ ਹੋਏ| ਇਕੱਠ ਨੂੰ ਸੰਬੋਧਨ ਕਰਦਿਆਂ ਕੁਲਬੀਰ ਸਿੰਘ ਜ਼ੀਰਾ ਨੇ ਕਿਹਾ ਕਿ ‘ਇੰਡੀਆ’ ਬਲਾਕ ਦੇ ਭਾਈਵਾਲਾਂ ਦੀ ਕੇਂਦਰ ਵਿੱਚ ਸਰਕਾਰ ਬਣਨ ’ਤੇ ਉਹ ਕਿਸਾਨਾਂ ਦੀਆਂ ਜਿਨਸਾਂ ’ਤੇ ਐੱਮਐੱਸਪੀ ਨੂੰ ਕਾਨੂੰਨੀ ਗਾਰੰਟੀ ਦੇ ਘੇਰੇ ਵਿੱਚ ਲਿਆਉਣਗੇ| ਉਨ੍ਹਾਂ ਕਿਹਾ ਕਿ ਉਹ ਕਿਸਾਨ-ਮਜ਼ਦੂਰ ਦਾ ਕਰਜ਼ਾ ਮੁਆਫ ਕਰਨ ਤੋਂ ਇਲਾਵਾ ਨਰੇਗਾ ਮਜ਼ਦੂਰ ਦੀ ਦਿਹਾੜੀ 400 ਰੁਪਏ ਕੀਤੇ ਜਾਣ ਆਦਿ ’ਤੇ ਵੀ ਜੋਰ ਦੇਣਗੇ| ਉਨ੍ਹਾਂ ਲੋਕਾਂ ਨੂੰ ਕੇਂਦਰ ਦੀ ਭਾਜਪਾ ਦੀ ਅਗਵਾਈ ਵਾਲੀ ਸਰਕਾਰ ਦੀਆਂ ਦੇਸ਼ ਦੇ ਲੋਕਾਂ ਨੂੰ ਵੰਡਣ ਵਾਲੀਆਂ ਨੀਤੀਆਂ ਤੋਂ ਵੀ ਜਾਣੂ ਕਰਾਇਆ|