ਗੁਰਦੀਪ ਸਿੰਘ ਟੱਕਰ
ਮਾਛੀਵਾੜਾ, 15 ਜੁਲਾਈ
ਸੜਕਾਂ ਅਤੇ ਬਜ਼ਾਰਾਂ ਵਿਚ ਕਾਗਜ਼ ਤੇ ਹੋਰ ਸਮਾਨ ਇਕੱਠਾ ਕਰਨ ਵਾਲੀਆਂ ਔਰਤਾਂ ਫੜੇ ਜਾਣ ਦੇ ਡਰ ਤੋਂ ਅੱਜ ਚੋਰੀ ਕੀਤੀਆਂ ਬੈਟਰੀਆਂ ਛੱਡ ਕੇ ਫ਼ਰਾਰ ਹੋ ਗਈਆਂ। ਕਰੀਬ 8 ਤੋਂ 10 ਔਰਤਾਂ ਦਾ ਇੱਕ ਟੋਲਾ ਜੋ ਕਿ ਮੋਢਿਆਂ ਉਪਰ ਥੈਲੇ ਟੰਗ ਸੜਕਾਂ ’ਤੇ ਸਾਮਾਨ ਚੁੱਕਦੀਆਂ ਸਨ ਤਾਂ ਇੱਕ ਵਿਅਕਤੀ ਨੂੰ ਸ਼ੱਕ ਹੋਇਆ ਕਿ ਉਨ੍ਹਾਂ ਦੇ ਥੈਲੇ ਵਿਚ ਚੋਰੀ ਕੀਤਾ ਸਮਾਨ ਹੈ। ਸ਼ੱਕ ਪੈਣ ’ਤੇ ਊਸ ਵਿਅਕਤੀ ਨੇ ਮਾਛੀਵਾੜਾ ਪੁਲੀਸ ਨੂੰ ਸੂਚਿਤ ਕਰ ਦਿੱਤਾ ਪਰ ਇਸ ਤੋਂ ਪਹਿਲਾਂ ਹੀ ਔਰਤਾਂ ਨੂੰ ਭਿਣਕ ਲੱਗ ਗਈ ਕਿ ਉਨ੍ਹਾਂ ਦੀ ਚੋਰੀ ਫੜੀ ਗਈ। ਇਸ ਦੌਰਾਨ ਉਹ ਸਾਰੀਆਂ ਥੈਲਿਆਂ ਵਿਚ ਭਰਿਆ ਸਾਮਾਨ ਛੱਡ ਕੇ ਫ਼ਰਾਰ ਹੋ ਗਈਆਂ। ਮਾਛੀਵਾੜਾ ਪੁਲੀਸ ਜਦੋਂ ਮੌਕੇ ’ਤੇ ਆਈ ਤਾਂ ਥੈਲਿਆਂ ਦੀ ਤਲਾਸ਼ੀ ਦੌਰਾਨ ਉਸ ’ਚੋਂ 15 ਬੈਟਰੀਆਂ ਜੋ ਮੋਬਾਈਲ ਟਾਵਰਾਂ ’ਤੇ ਲੱਗੀਆਂ ਹੁੰਦੀਆਂ ਹਨ ਬਰਾਮਦ ਹੋਈਆਂ। ਪੁਲੀਸ ਵਲੋਂ ਬੈਟਰੀਆਂ ਨੂੰ ਕਬਜ਼ੇ ’ਚ ਲੈ ਲਿਆ ਹੈ ਅਤੇ ਸ਼ਹਿਰ ’ਚ ਇਨ੍ਹਾਂ ਸ਼ੱਕੀ ਔਰਤਾਂ ਦੀ ਤਲਾਸ਼ ਕੀਤੀ ਗਈ ਪਰ ਅਜੇ ਤੱਕ ਕੋਈ ਸੁਰਾਗ ਨਾ ਲੱਗਾ। ਇਸ ਤਰ੍ਹਾਂ ਕੁੱਝ ਮਹੀਨੇ ਪਹਿਲਾਂ ਵੀ ਇਹ ਕਾਗਜ਼ ਚੁੱਕਣ ਵਾਲੀਆਂ ਔਰਤਾਂ ਦਾ ਟੋਲਾ ਕਰਿਆਨੇ ਦੇ ਗੁਦਾਮ ’ਚੋਂ ਕਾਫ਼ੀ ਸਮਾਨ ਚੋਰੀ ਕਰਕੇ ਲੈ ਗਿਆ ਸੀ ਜਿਨ੍ਹਾਂ ਦਾ ਕੁੱਝ ਵੀ ਪਤਾ ਨਹੀਂ ਲੱਗਿਆ।