ਟ੍ਰਿਬਿਊਨ ਨਿਊਜ਼ ਸਰਵਿਸ
ਲੁਧਿਆਣਾ, 30 ਸਤੰਬਰ
ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਤੋਂ ਬਾਅਦ ਹੁਣ ਕਮਿਨਸ਼ਰੇਟ ਪੁਲੀਸ ਜਲਦੀ ਹੀ ਉਸ ਦੇ ਨਜ਼ਦੀਕੀ ਸਾਥੀਆਂ ’ਚ ਗਿਣੇ ਜਾਂਦੇ ਗੈਂਗਸਟਰ ਐੱਸਕੇ ਖਰੌੜ ਨੂੰ ਲੁਧਿਆਣਾ ਲਿਆਵੇਗੀ। ਐੱਸਕੇ ਖਰੌੜ ਪਟਿਆਲਾ ਨੇੜਲੇ ਕਸਬਾ ਸਨੌਰ ਦਾ ਵਸਨੀਕ ਹੈ ਤੇ ਉਸ ’ਤੇ ਪਿੰਡ ਦੇ ਸਰਪੰਚ ਤਾਰਾ ਦੱਤ ਦੇ ਕਤਲ ਦਾ ਵੀ ਦੋਸ਼ ਹੈ। ਇਸ ਤੋਂ ਇਲਾਵਾ ਗੈਂਗਸਟਰ ਐੱਸਕੇ ਖਰੌੜ ਦੇ ਖਿਲਾਫ਼ ਕਤਲ, ਕਤਲ ਦੀ ਕੋਸ਼ਿਸ਼ ਸਣੇ 12 ਤੋਂ ਵੱਧ ਹੋਰ ਕੇਸ ਦਰਜ ਹਨ। ਤਿਹਾੜ ਜੇਲ੍ਹ ’ਚ ਬੈਠ ਕੇ ਹੀ ਉਸ ਨੇ ਲਾਰੈਂਸ ਬਿਸ਼ਨੋਈ ਦੇ ਕਹਿਣ ’ਤੇ ਸਿੱਧੂ ਮੂਸੇਵਾਲਾ ਕਤਲਕਾਂਡ ਨੂੰ ਅੰਜਾਮ ਦੇਣ ਲਈ ਮੁਲਜ਼ਮਾਂ ਨੂੰ ਹਥਿਆਰ ਮੁਹੱਈਆ ਕਰਵਾਏ ਸਨ। ਹਥਿਆਰ ਸਪਲਾਈ ਕਰਨ ਦੇ ਦੋਸ਼ ’ਚ ਕਮਿਸ਼ਨਰੇਟ ਪੁਲੀਸ ਨੇ ਬਲਦੇਵ ਚੌਧਰੀ ਨੂੰ ਵੀ ਗ੍ਰਿਫ਼ਤਾਰ ਕੀਤਾ ਸੀ। ਪ੍ਰਾਪਤ ਜਾਣਕਾਰੀ ਮੁਤਾਬਕ ਕਮਿਸ਼ਨਰੇਟ ਪੁਲੀਸ ਜਲਦੀ ਹੀ ਰਿਮਾਂਡ ’ਤੇ ਚੱਲ ਰਹੇ ਗੈਂਗਸਟਰ ਲਾਰੈਂਸ ਬਿਸ਼ਨੋਈ ਤੇ ਐੱਸਕੇ ਖਰੌੜ ਨੂੰ ਆਹਮੋ-ਸਾਹਮਣੇ ਬਿਠਾ ਕੇ ਪੁੱਛ-ਪੜਤਾਲ ਕਰੇਗੀ।