ਗਗਨਦੀਪ ਅਰੋੜਾ
ਲੁਧਿਆਣਾ, 23 ਸਤੰਬਰ
ਆਮ ਆਦਮੀ ਪਾਰਟੀ ਦੇ ਵੀਆਈਪੀ ਸਭਿਆਚਾਰ ਖ਼ਤਮ ਕਰਨ ਦੇ ਦਾਅਵੇ ਦੇ ਬਾਵਜੂਦ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਅੱਜ ਇੱਥੇ ਦੌਰੇ ਮੌਕੇ ਸਾਰਾ ਸਨਅਤੀ ਸ਼ਹਿਰ ਜਾਮ ਹੋ ਗਿਆ ਅਤੇ ਲੁਧਿਆਣਾ ਵਾਸੀ, ਰਾਹਗੀਰ ਅਤੇ ਸਕੂਲੀ ਬੱਸਾਂ ਸਵੇਰੇ ਦਸ ਤੋਂ ਦੁਪਹਿਰ ਤਿੰਨ ਵਜੇ ਤੱਕ ਜਾਮ ਵਿੱਚ ਫਸੀਆਂ ਰਹੀਆਂ।
ਇੱਥੇ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ (ਪੀਏਯੂ) ਵਿੱਚ ਲੱਗਣ ਵਾਲੇ ਕਿਸਾਨ ਮੇਲੇ ਦੌਰਾਨ ਮੁੱਖ ਮੰਤਰੀ ਭਗਵੰਤ ਮਾਨ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਣ ਆਏ ਸਨ। ਸਨਅਤੀ ਸ਼ਹਿਰ ਦੀ ਪੁਲੀਸ ਨੇ ਮੁੱਖ ਮੰਤਰੀ ਦੀ ਸੁਰੱਖਿਆ ਦੇ ਮੱਦੇਨਜ਼ਰ ਸਾਰੇ ਸ਼ਹਿਰ ਦੀਆਂ ਸੜਕਾਂ ਜਾਮ ਕਰਵਾ ਦਿੱਤੀਆਂ, ਜਦੋਂਕਿ ਭਗਵੰਤ ਮਾਨ ਆਪਣੇ ਹੈਲੀਕਾਪਟਰ ਰਾਹੀਂ ਪੀਏਯੂ ਪਹੁੰਚ ਗਏ। ਜਾਮ ਦੀ ਸਭ ਤੋਂ ਵੱਧ ਪ੍ਰੇਸ਼ਾਨੀ ਸ਼ਹਿਰ ਦੇ ਲੋਕਾਂ ਤੇ ਸਕੂਲ ਬੱਚਿਆਂ ਨੂੰ ਝੱਲਣੀ ਪਈ। ਸਕੂਲੀ ਬੱਚੇ ਤਾਂ ਘੰਟਿਆਂਬੱਧੀ ਜਾਮ ਵਿੱਚ ਫਸੇ ਰਹੇ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਆਮ ਲੋਕਾਂ ਦਾ ਖਿਆਲ ਛੱਡ ਪੁਲੀਸ ਨੂੰ ਵੀ ਆਪਣੇ ਅਧਿਕਾਰੀਆਂ ਤੇ ਵਿਧਾਇਕਾਂ ਦੀ ਫਿਕਰ ਪਈ ਰਹੀ। ਸ਼ਹਿਰ ਦੇ ਵਿਧਾਇਕਾਂ ਅਤੇ ਅਧਿਕਾਰੀਆਂ ਨੇ ਪੀਏਯੂ ਵਿੱਚ ਮੁੱਖ ਮੰਤਰੀ ਤੋਂ ਪਹਿਲਾਂ ਪਹੁੰਚਣਾ ਸੀ। ਇਸ ਲਈ ਉਨ੍ਹਾਂ ਲਈ ਬਾਕਾਇਦਾ ਰਸਤਾ ਖਾਲੀ ਕਰਵਾਇਆ ਗਿਆ ਤਾਂ ਕਿ ਉਨ੍ਹਾਂ ਨੂੰ ਪੁੱਜਣ ਵਿੱਚ ਦੇਰੀ ਨਾ ਹੋ ਸਕੇ। ਮੁੱਖ ਮੰਤਰੀ ਮਾਨ ਦੇ ਕਿਸਾਨ ਮੇਲੇ ਦੇ ਉਦਘਾਟਨ ਲਈ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਵਿੱਚ ਸਵੇਰੇ 11 ਵਜੇ ਪੁੱਜਣ ਦਾ ਪ੍ਰੋਗਰਾਮ ਸੀ, ਪਰ ਸ਼ਹਿਰ ਦੀ ਪੁਲੀਸ ਨੇ ਪਹਿਲਾਂ ਹੀ ਟ੍ਰੈਫਿਕ ਰੂਟ ਤੈਅ ਕਰ ਦਿੱਤੇ। ਜਦੋਂਕਿ ਮੁੱਖ ਮੰਤਰੀ ਨੇ ਹਵਾਈ ਰਸਤਿਓਂ ਪੀਏਯੂ ਵਿੱਚ ਪੁੱਜਣਾ ਸੀ। ਮੁੱਖ ਮੰਤਰੀ ਦੇ ਆਉਣ ਤੋਂ ਪਹਿਲਾਂ ਹੀ ਸ਼ਹਿਰ ਦੀਆਂ ਸੜਕਾਂ ’ਤੇ ਲੰਮਾ ਜਾਮ ਲੱਗਣਾ ਸ਼ੁਰੂ ਹੋ ਗਿਆ। ਮੇਲੇ ਦੌਰਾਨ ਪਾਰਕਿੰਗ ਦਾ ਵੀ ਕੋਈ ਢੁਕਵਾਂ ਪ੍ਰਬੰਧ ਨਜ਼ਰ ਨਹੀਂ ਆਇਆ, ਜਿਸ ਕਾਰਨ ਕਿਸਾਨਾਂ ਨੇ ਆਪਣੇ ਵਾਹਨ ਸੜਕ ’ਤੇ ਖੜ੍ਹਾਉਣੇ ਸ਼ੁਰੂ ਕਰ ਦਿੱਤੇ। ਜਿਸਨੂੰ ਜਿੱਥੇ ਜਗ੍ਹਾ ਮਿਲੀ, ਉਥੇ ਗੱਡੀ ਖੜ੍ਹੀ ਕਰ ਕੇ ਮੇਲਾ ਦੇਖਣ ਚਲਾ ਗਿਆ। ਉਧਰ, ਪੁਲੀਸ ਨਾਕਾਬੰਦੀ ਕਰ ਕੇ ਕਿਸਾਨਾਂ ਤੇ ਲੋਕਾਂ ਨੂੰ ਇੱਧਰ-ਉਧਰ ਭੇਜਦੀ ਰਹੀ ਤੇ ਤਰਕ ਦਿੱਤਾ ਗਿਆ ਕਿ ਰਸਤਾ ਬਦਲ ਦਿੱਤਾ ਗਿਆ ਹੈ। ਫਿਰੋਜ਼ਪੁਰ ਰੋਡ ਦੀ ਗੱਲ ਕੀਤੀ ਜਾਵੇ ਤਾਂ ਉਥੇ ਵੀ ਲੰਮਾਂ ਜਾਮ ਲੱਗਿਆ ਰਿਹਾ, ਜਦੋਂਕਿ ਰੋਜ਼ ਗਾਰਡਨ ਰੋਡ ਜਿੱਥੇ ਪੀਏਯੂ ਗੇਟ ਨੰਬਰ ਚਾਰ ਤੋਂ ਐਂਟਰੀ ਰੱਖੀ ਗਈ ਸੀ। ਉਸ ਸੜਕ ’ਤੇ ਕਾਫ਼ੀ ਬੁਰੇ ਹਾਲਾਤ ਰਹੇ ਸਨ। ਉਥੇ ਪੁਲੀਸ ਦਾ ਇੱਕ ਵੀ ਮੁਲਾਜ਼ਮ ਦੇਖਣ ਨੂੰ ਨਹੀਂ ਮਿਲਿਆ, ਜਦੋਂਕਿ ਉਥੋਂ ਦੋ ਕਿਲੋਮੀਟਰ ਤੱਕ ਲੰਬਾ ਜਾਮ ਲੱਗਿਆ ਹੋਇਆ ਸੀ। ਲੋਕ ਆਪਣੀ ਮੰਜ਼ਿਲ ’ਤੇ ਪੁੱਜਣ ਲਈ ਇੱਧਰ-ਉਧਰ ਦੇ ਰਸਤਾ ਅਪਣਾਉਂਦੇ ਰਹੇ, ਜਿਸ ਕਾਰਨ ਜਾਮ ਦੀ ਸਥਿਤੀ ਹੋਰ ਵੀ ਜ਼ਿਆਦਾ ਖ਼ਰਾਬ ਹੋ ਗਈ।