ਸਤਵਿੰਦਰ ਬਸਰਾ
ਲੁਧਿਆਣਾ, 7 ਮਈ
ਲੁਧਿਆਣਾ ਵਿੱਚ ਕਰੋਨਾ ਮਰੀਜ਼ਾਂ ਦੇ ਸਸਕਾਰ ਲਈ ਸਥਾਨਕ ਢੋਲੇਵਾਲ ਸ਼ਮਸ਼ਾਨਘਾਟ ਵਿੱਚ ਹੁਣ ਕਰੀਬ ਢਾਈ ਲੱਖ ਦੀ ਲਾਗਤ ਵਾਲੀ ਨਵੀਂ ਭੱਠੀ ਲਗਾਈ ਜਾ ਰਹੀ ਹੈ। ਇਸ ਭੱਠੀ ਨਾਲ ਗੈਸ ਅਤੇ ਸਮੇਂ ਦੀ ਬਚਤ ਹੋਵੇਗੀ। ਇਸ ਤੋਂ ਪਹਿਲਾਂ ਇੱਥੇ ਸਸਕਾਰਾਂ ਲਈ ਤਿੰਨ ਗੈਸੀ ਭੱਠੀਆਂ ਚੱਲ ਰਹੀਆਂ ਹਨ। ਪਹਿਲੀ ਮਈ ਤੋਂ 6 ਮਈ ਤੱਕ ਇਸ ਸਮਸ਼ਾਨਘਾਟ ਵਿੱਚ 75 ਕਰੋਨਾ ਮਰੀਜ਼ਾਂ ਦੇ ਸਸਕਾਰ ਕੀਤੇ ਜਾ ਚੁੱਕੇ ਹਨ।
ਉਕਤ ਸਮਸ਼ਾਨਘਾਟ ਵਿੱਚ ਪੁਰਾਤਨ ਤਰੀਕੇ ਨਾਲ ਸਸਕਾਰ ਕਰਨ ਦੇ ਨਾਲ ਨਾਲ ਗੈਸੀ ਭੱਠੀਆਂ ਵੀ ਲਾਈਆਂ ਗਈਆਂ ਹਨ। ਪਿਛਲੇ ਸਾਲ ਇੱਥੇ ਇੱਕ ਹੀ ਗੈਸੀ ਭੱਠੀ ਸੀ ਪਰ ਕਰੋਨਾ ਮਰੀਜ਼ਾਂ ਦੀ ਮੌਤ ਦਰ ਵਧ ਜਾਣ ਕਰਕੇ ਇੱਥੇ ਗੈਸ ਭੱਠੀਆਂ ਦੀ ਗਿਣਤੀ ਦੋ ਕਰ ਦਿੱਤੀ ਗਈ ਅਤੇ ਇੱਕ ਭੱਠੀ ਇਸ ਸਾਲ ਲਾਈ ਗਈ ਹੈ। ਮਰੀਜ਼ਾਂ ਦੀ ਵਧੀ ਗਿਣਤੀ ਨੂੰ ਦੇਖਦਿਆਂ ਹੁਣ ਇੱਥੇ ਆਧੁਨਿਕ ਕਿਸਮ ਦੀ ਗੈਸ ਭੱਠੀ ਲਾਈ ਜਾ ਰਹੀ ਹੈ। ਸ਼ਮਸ਼ਾਨਘਾਟ ਦੇ ਪ੍ਰਧਾਨ ਰਣਜੋਧ ਸਿੰਘ ਨੇ ਦੱਸਿਆ ਕਿ ਇਹ ਭੱਠੀ ਸਟੀਲ ਦੀ ਬਣੀ ਹੈ ਅਤੇ ਇਸ ਵਿੱਚ ‘ਗਲਾਸ ਵੂਲ’ ਦੀ ਛੇ ਇੰਚ ਮੋਟੀ ਤਹਿ ਵਿਛਾਈ ਜਾਵੇਗੀ ਜਿਸ ਨਾਲ ਭੱਠੀ ਪੂਰੀ ਤਰ੍ਹਾਂ ਗਰਮ ਰਹੇਗੀ। ਉਨ੍ਹਾਂ ਦੱਸਿਆ ਕਿ ਆਮ ਗੈਸ ਭੱਠੀ ’ਤੇ ਇੱਕ ਸਸਕਾਰ ਲਈ ਢਾਈ ਤੋਂ ਤਿੰਨ ਗੈਸ ਸਿਲੰਡਰ ਅਤੇ ਡੇਢ ਘੰਟੇ ਦਾ ਸਮਾਂ ਲੱਗਦਾ ਹੈ। ਪਰ ਇਸ ਨਵੀਂ ਭੱਠੀ ਵਿੱਚ ਗੈਸ ਦੇ ਡੇਢ ਕੁ ਸਿਲੰਡਰ ਲੱਗਣਗੇ ਜਦਕਿ ਸਮਾਂ ਸਿਰਫ 45 ਮਿੰਟ ਲੱਗੇਗਾ। ਉਨ੍ਹਾਂ ਦੱਸਿਆ ਦੋ ਦਿਨ ਪਹਿਲਾਂ ਸਮਸ਼ਾਨਘਾਟ ਵਿੱਚ ਸਸਕਾਰ ਲਈ ਇੱਕ ਟਰਾਲੀ ਵੀ ਬਣਾਈ ਗਈ ਹੈ। ਇਸ ’ਤੇ ਸਸਕਾਰ ਤਾਂ ਭਾਵੇਂ ਲੱਕੜ ਨਾਲ ਹੀ ਕੀਤੇ ਜਾਂਦੇ ਹਨ ਪਰ ਇਸ ’ਤੇ ਜਮੀਨ ਦੇ ਮੁਕਾਬਲੇ ਇੱਕ ਦਿਨ ਵਿੱਚ ਦੋ ਸਸਕਾਰ ਹੋ ਸਕਦੇ ਹਨ ਅਤੇ ਇਸ ਨੂੰ ਇੱਕ ਥਾਂ ਤੋਂ ਦੂਜੀ ਥਾਂ ਤੇ ਸੌਖਿਆਂ ਲਿਜਾਇਆ ਜਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਕਰੋਨਾ ਮਰੀਜ਼ਾਂ ਦੇ ਸਸਕਾਰ ਲਈ ਪਿਛਲੇ ਸਾਲ ਤਾਂ ਕਾਰਪੋਰੇਸ਼ਨ ਅਤੇ ਫੂਡ ਸਿਵਲ ਸਪਲਾਈ ਵਿਭਾਗ ਵੱਲੋਂ ਗੈਸ ਸਿਲੰਡਰ ਮੁਹੱਈਆ ਕਰਵਾਏ ਜਾਂਦੇ ਸਨ ਪਰ ਇਸ ਵਾਰ ਇਹ ਸਹੂਲਤ ਨਹੀਂ ਮਿਲੀ। ਸਮਸ਼ਾਨਘਾਟ ਵਿੱਚ ਛੇ ਕੁ ਮੁਲਾਜ਼ਮਾਂ ਦੀ ਟੀਮ ਹੈ ਜਿਸ ਕਰਕੇ ਸਸਕਾਰ ਲਈ ਥੋੜ੍ਹੀ ਜਿਹੀ ਲਾਗਤ ਰਾਸ਼ੀ ਰੱਖੀ ਗਈ ਹੈ ਪਰ ਜਿਹੜੇ ਲੋਕ ਇਹ ਵੀ ਦੇਣ ਤੋਂ ਅਸਮਰੱਥ ਹਨ, ਉਨ੍ਹਾਂ ਤੋਂ ਸਸਕਾਰ ਲਈ ਕੋਈ ਪੈਸਾ ਨਹੀਂ ਲਿਆ ਜਾਂਦਾ।