ਜਲੰਧਰ: ਪੰਜਾਬ ਰੋਡਵੇਜ਼ ਨੇ ਜਲੰਧਰ ਬੱਸ ਸਟੈਂਡ ’ਤੇ ਵੋਲਵੋ ਬੱਸਾਂ ’ਚ ਸਫਰ ਕਰਨ ਵਾਲੇ ਯਾਤਰੀਆਂ ਲਈ ਏ.ਸੀ. ਵੇਟਿੰਗ ਰੂਮ ਦੀ ਸੁਵਿਧਾ ਸ਼ੁਰੂ ਕਰ ਦਿੱਤੀ ਹੈ। ਪਿਛਲੇ ਸਾਲ ਟਰਾਂਸਪੋਰਟ ਵਿਭਾਗ ਵੱਲੋਂ ਯਾਤਰੀਆਂ ਦੀ ਮੰਗ ਨੂੰ ਪੂਰਾ ਕਰਨ ਅਤੇ ਉਨ੍ਹਾਂ ਨੂੰ ਬੱਸ ਸਟੈਂਡ ’ਤੇ ਲਗਜ਼ਰੀ ਸਹੂਲਤਾਂ ਦੇਣ ਲਈ ਇਹ ਪ੍ਰਸਤਾਵ ਪਾਸ ਕੀਤਾ ਗਿਆ ਸੀ। ਇਸ ਤੋਂ ਬਾਅਦ ਜਲੰਧਰ ਰੋਡਵੇਜ਼ ਡਿੱਪੂ-1 ਨੇ 1.5 ਤੋਂ 2 ਲੱਖ ਰੁਪਏ ਖਰਚ ਕੇ ਜਲੰਧਰ ਬੱਸ ਸਟੈਂਡ ’ਤੇ ਵੇਟਿੰਗ ਰੂਮ ਤਿਆਰ ਕੀਤਾ ਹੈ। ਨਵਾਂ ਵੇਟਿੰਗ ਰੂਮ ਬੈਠਣ ਲਈ ਸੋਫੇ, ਖਾਣ ਲਈ ਕੈਫੇਟੇਰੀਆ ਅਤੇ ਹੋਰ ਸਹੂਲਤਾਂ ਨਾਲ ਲੈਸ ਹੈ। ਵੋਲਵੋ ਜਲੰਧਰ ਬੱਸ ਸਟੈਂਡ ਤੋਂ ਚੰਡੀਗੜ੍ਹ, ਅੰਮ੍ਰਿਤਸਰ, ਦਿੱਲੀ ਦੇ ਆਈਐਸਬੀਟੀ ਅਤੇ ਇੰਦਰਾ ਗਾਂਧੀ ਅੰਤਰਰਾਸ਼ਟਰੀ ਹਵਾਈ ਅੱਡੇ ਤੱਕ ਚੱਲਦੀ ਹੈ। ਪੀ.ਆਰ.ਟੀ.ਸੀ. ਵੱਲੋਂ ਰੋਜ਼ਾਨਾ ਕਰੀਬ 8 ਵੋਲਵੋਜ਼ ਦੀ ਸੇਵਾ ਚੱਲ ਰਹੀ ਹੈ। -ਪੱਤਰ ਪ੍ਰੇਰਕ