ਪੱਤਰ ਪ੍ਰੇਰਕ
ਰਤੀਆ, 3 ਮਈ
ਨੇੜਲੇ ਪਿੰਡ ਸਹਿਨਾਲ ਗੁਰੂਸਰ ਰੋਡ ’ਤੇ ਟਰੈਕਟਰ ਪਲਟਣ ਕਾਰਨ ਚਾਲਕ ਟਰੈਕਟਕ ਹੇਠਾਂ ਆ ਗਿਆ। ਲੋਕਾਂ ਨੇ ਬੜੀ ਮੁਸ਼ੱਕਤ ਉਪਰੰਤ ਜੇਸੀਬੀ ਮਸ਼ੀਨ ਨਾਲ ਟਰੈਕਟਰ ਦੇ ਹੇਠਾਂ ਆਏ ਚਾਲਕ ਨੂੰ ਬਾਹਰ ਕੱਢਿਆ ਅਤੇ ਗੰਭੀਰ ਹਾਲਤ ਵਿਚ ਰਤੀਆ ਦੇ ਸਰਕਾਰੀ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ। ਸਿਵਲ ਹਸਪਤਾਲ ਦੇ ਡਾਕਟਰਾਂ ਨੇ ਮੁੱਢਲੇ ਇਲਾਜ ਉਪਰੰਤ ਜ਼ਖ਼ਮੀ ਚਾਲਕ ਗੁਰਲੀਨ ਸਿੰਘ ਪੁੱਤਰ ਜਗਰਾਜ ਸਿੰਘ ਨਿਵਾਸੀ ਗੁਰੂਸਰ ਨੂੰ ਰੈਫਰ ਕਰ ਦਿੱਤਾ। ਲੋਕਾਂ ਨੇ ਦੱਸਿਆ ਕਿ ਪਿੰਡ ਗੁਰੂਸਰ ਦਾ ਗੁਰਲੀਨ ਸਿੰਘ ਅੱਜ ਸ਼ਾਮ ਨੂੰ ਆਪਣੇ ਟਰੈਕਟਰ ਰਾਹੀਂ ਪਿੰਡ ਦੇ ਸਹਿਨਾਲ ਰੋਡ ’ਤੇ ਸਥਿਤ ਖੇਤ ਵਿਚ ਜਾ ਰਿਹਾ ਸੀ। ਪਰਿਵਾਰਕ ਮੈਂਬਰਾਂ ਨੇ ਦੱਸਿਆ ਕਿ ਉਕਤ ਮਾਰਗ ਦਾ ਕੁੱਝ ਹਿੱਸਾ ਨਿੱਜੀ ਹੋਣ ਕਾਰਨ ਸਬੰਧਤ ਜ਼ਮੀਨ ਮਾਲਕ ਨੇ ਉਥੇ ਕੱਟ ਮਾਰਿਆ ਹੋਇਆ ਹੈ, ਜਿਸ ਕਾਰਨ ਉਸ ਮੋੜ ’ਤੇ ਟਰੈਕਟਰ ਪਲਟ ਗਿਆ।