ਪਾਕਿਸਤਾਨੀ ਫ਼ੌਜ ਦੇ ਲੋਕ ਸੰਪਰਕ ਵਿਭਾਗ ਦੇ ਮੁਖੀ ਮੇਜਰ ਜਨਰਲ ਬਾਬਰ ਇਫ਼ਤਿਖਾਰ ਖ਼ਾਨ ਨੇ ਕੁਝ ਦਿਨ ਪਹਿਲਾਂ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਸੀ 9 ਮਾਰਚ ਨੂੰ ਭਾਰਤ ਤੋ ਇਕ ਤੇਜ਼ ਰਫ਼ਤਾਰ ਵਸਤੂ ਹਵਾਈ ਰਸਤੇ ਰਾਹੀਂ ਪਾਕਿਸਤਾਨ ਵਿਚ ਦਾਖ਼ਲ ਹੋਈ ਅਤੇ ਲਹਿੰਦੇ ਪੰਜਾਬ ਦੇ ਖਾਨੇਵਾਲ ਜ਼ਿਲ੍ਹੇ ਦੇ ਮੀਆਂ ਛੰਨੂ ਨਾਂ ਦੇ ਪਿੰਡ ਦੇ ਨਜ਼ਦੀਕ ਖੇਤਾਂ ਵਿਚ ਡਿੱਗੀ; ਇਸ ਕਾਰਨ ਕੋਈ ਧਮਾਕਾ ਜਾਂ ਜਾਨੀ ਨੁਕਸਾਨ ਤਾਂ ਨਹੀਂ ਹੋਇਆ ਪਰ ਪਾਕਿਸਤਾਨ ਦੇ ਨਾਗਰਿਕਾਂ ਦੀ ਨਿੱਜੀ ਜਾਇਦਾਦ ਦਾ ਨੁਕਸਾਨ ਜ਼ਰੂਰ ਹੋਇਆ। ਪਾਕਿਸਤਾਨ ਦੀਆਂ ਅਖ਼ਬਾਰਾਂ ਵਿਚ ਵੱਖ ਵੱਖ ਤਰ੍ਹਾਂ ਦੇ ਅੰਦਾਜ਼ੇ ਲਗਾਏ ਗਏ ਕਿ ਇਹ ‘ਵਸਤੂ’ ਕੋਈ ਜਹਾਜ਼ ਜਾਂ ਕੁਝ ਹੋਰ ਸੀ। ਘਟਨਾ ਤੋਂ ਦੋ ਦਿਨ ਬਾਅਦ ਭਾਰਤ ਸਰਕਾਰ ਨੇ ਦੱਸਿਆ ਕਿ ਇਹ ਤੇਜ਼ ਰਫ਼ਤਾਰ ਵਸਤੂ ਇਕ ਮਿਜ਼ਾਈਲ ਸੀ ਜੋ ਰੱਖ-ਰਖਾਅ ਕਰਦਿਆਂ ਅਚਾਨਕ ਚੱਲ ਗਈ ਅਤੇ ਪਾਕਿਸਤਾਨ ਵਿਚ ਜਾ ਡਿੱਗੀ। ਸਰਕਾਰੀ ਬੁਲਾਰੇ ਨੇ ਇਸ ਘਟਨਾ ’ਤੇ ਅਫ਼ਸੋਸ ਜਤਾਇਆ ਹੈ। ਘਟਨਾ ਦੀ ਜਾਂਚ ਕਰਨ ਲਈ ਉੱਚ-ਅਧਿਕਾਰੀਆਂ ਦੀ ਜਾਂਚ ਕਮੇਟੀ (Court of Enquiry) ਬਣਾਈ ਗਈ ਹੈ।
ਫ਼ੌਜੀ ਮਾਹਿਰਾਂ ਅਨੁਸਾਰ ਭਾਰਤ ਸਰਕਾਰ ਨੂੰ ਪਾਰਦਰਸ਼ਤਾ ਤੋਂ ਕੰਮ ਲੈਂਦਿਆਂ ਮਿਜ਼ਾਈਲ ਦੇ ਚੱਲਣ ਵਾਲੀ ਥਾਂ ਅਤੇ ਹੋਰ ਵੇਰਵੇ ਪਾਕਿਸਤਾਨ ਅਤੇ ਲੋਕਾਂ ਨਾਲ ਸਾਂਝੇ ਕਰਨੇ ਚਾਹੀਦੇ ਹਨ। ਮਾਹਿਰਾਂ ਅਨੁਸਾਰ ਮਿਜ਼ਾਈਲ ਚੱਲਣ ਤੋਂ ਤੁਰੰਤ ਬਾਅਦ ਹੀ ਭਾਰਤੀ ਫ਼ੌਜ ਦੇ ਸੀਨੀਅਰ ਅਧਿਕਾਰੀਆਂ ਨੂੰ ਪਾਕਿਸਤਾਨ ਦੇ ਸੀਨੀਅਰ ਫ਼ੌਜੀ ਅਧਿਕਾਰੀਆਂ ਨਾਲ ਹਾਟਲਾਈਨ (Hotline) ’ਤੇ ਗੱਲਬਾਤ ਕਰਨੀ ਚਾਹੀਦੀ ਸੀ। ਗੱਲਬਾਤ ਨਾ ਕਰਨ ਕਾਰਨ ਗ਼ਲਤਫਹਿਮੀਆਂ ਅਤੇ ਕਈ ਹੋਰ ਤਰ੍ਹਾਂ ਦੀਆਂ ਸਮੱਸਿਆਵਾਂ ਪੈਦਾ ਹੋ ਸਕਦੀਆਂ ਹਨ। ਪਾਕਿਸਤਾਨੀ ਮੀਡੀਆ ਵਿਚ ਲੱਗ ਰਹੇ ਅੰਦਾਜ਼ਿਆਂ ਅਨੁਸਾਰ ਇਹ ਮਿਜ਼ਾਈਲ ਇਕ ਬ੍ਰਹਮੋਸ ਮਿਜ਼ਾਈਲ ਸੀ ਜੋ ਸਿਰਸਾ ਦੇ ਹਵਾਈ ਫ਼ੌਜ ਦੇ ਬੇਸ (base) ਤੋਂ ਅਚਾਨਕ ਫਾਇਰ ਹੋ ਗਈ। ਪਾਕਿਸਤਾਨ ਨੇ ਦੋਸ਼ ਲਗਾਇਆ ਹੈ ਕਿ ਭਾਰਤ ਅਜਿਹੇ ਨਾਜ਼ੁਕ ਮਾਮਲਿਆਂ ਵਿਚ ਸੁਰੱਖਿਆ ਦਾ ਖ਼ਿਆਲ ਨਹੀਂ ਰੱਖਦਾ। ਉਸ ਨੇ ਮੰਗ ਕੀਤੀ ਹੈ ਕਿ ਇਸ ਘਟਨਾ ਦੀ ਜਾਂਚ ਦੋਹਾਂ ਦੇਸ਼ਾਂ ਦੇ ਅਧਿਕਾਰੀਆਂ ਦੀ ਸਾਂਝੀ ਕਮੇਟੀ ਦੁਆਰਾ ਕੀਤੀ ਜਾਣੀ ਚਾਹੀਦੀ ਹੈ। ਪਾਕਿਸਤਾਨ ਦਾ ਕਹਿਣਾ ਹੈ ਕਿ ਮਾਮਲੇ ਨੂੰ ਇਕ ਸਾਧਾਰਨ ਜਿਹੇ ਸਪੱਸ਼ਟੀਕਰਨ ਰਾਹੀਂ ਨਹੀਂ ਨਿਪਟਾਇਆ ਜਾ ਸਕਦਾ।
ਕਈ ਫ਼ੌਜੀ ਮਾਹਿਰ ਇਸ ਨੂੰ ਵੱਡੀ ਗ਼ਲਤੀ ਦੱਸ ਰਹੇ ਹਨ ਕਿਉਂਕਿ ਜੇ ਗ਼ਲਤਫਹਿਮੀ ਕਾਰਨ ਜਵਾਬੀ ਕਾਰਵਾਈ ਹੋ ਜਾਵੇ ਤਾਂ ਦੋਹਾਂ ਦੇਸ਼ਾਂ ਵਿਚ ਤਣਾਉ ਵਧ ਸਕਦਾ ਹੈ। ਇਕ ਮਿਜ਼ਾਈਲ ਦਾ ਅਚਨਚੇਤ ਚੱਲ ਜਾਣਾ ਅਣਗਹਿਲੀ ਵਰਤੇ ਜਾਣ ਦਾ ਸੰਕੇਤ ਹੈ। ਪਾਕਿਸਤਾਨੀ ਸਰੋਤਾਂ ਅਨੁਸਾਰ ਇਹ ਮਿਜ਼ਾਈਲ 40,000 ਫੁੱਟ ਦੀ ਉਚਾਈ ’ਤੇ ਪਾਕਿਸਤਾਨ ਦੀ ਸਰਹੱਦ ਵਿਚ ਦਾਖ਼ਲ ਹੋਈ। ਇਕ ਸੁਰੱਖਿਆ ਮਾਹਿਰ ਅਨੁਸਾਰ ਬ੍ਰਹਮੋਸ ਮਿਜ਼ਾਈਲਾਂ ਭਾਰਤ ਦੀਆਂ ਤਿੰਨੇ ਸੈਨਾਵਾਂ ਭਾਵ ਥਲ ਸੈਨਾ, ਹਵਾਈ ਸੈਨਾ ਅਤੇ ਸਮੁੰਦਰੀ ਸੈਨਾ ਨੂੰ ਮੁਹੱਈਆ ਕਰਾਈਆਂ ਗਈਆਂ ਹਨ ਅਤੇ ਜ਼ਿਆਦਾ ਸੰਭਾਵਨਾ ਇਹ ਹੈ ਕਿ ਇਹ ਮਿਜ਼ਾਈਲ ਹਵਾਈ ਫ਼ੌਜ ਨੂੰ ਦਿੱਤੀਆਂ ਗਈਆਂ ਮਿਜ਼ਾਈਲਾਂ ਵਿਚੋਂ ਇਕ ਸੀ। ਸੁਰੱਖਿਆ ਅਤੇ ਕੂਟਨੀਤਕ ਮਾਹਿਰਾਂ ਅਨੁਸਾਰ ਮੀਡੀਆ ਵਿਚ ਅਜਿਹੀ ਬਹਿਸ ਤੋਂ ਬਚਣ ਲਈ ਭਾਰਤ ਸਰਕਾਰ ਨੂੰ ਲੋੜੀਂਦੇ ਵੇਰਵੇ ਮੀਡੀਆ ਸਾਹਮਣੇ ਰੱਖਣੇ ਚਾਹੀਦੇ ਹਨ ਅਤੇ ਇਸ ਘਟਨਾ ਲਈ ਜ਼ਿੰਮੇਵਾਰ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਦੀ ਜਵਾਬਦੇਹੀ ਯਕੀਨੀ ਬਣਾਉਣੀ ਚਾਹੀਦੀ ਹੈ। ਇਹ ਮਿਜ਼ਾਈਲਾਂ ਵੱਡਾ ਨੁਕਸਾਨ ਕਰ ਸਕਦੀਆਂ ਹਨ; ਇਸ ਘਟਨਾ ਵਿਚ ਨੁਕਸਾਨ ਇਸ ਲਈ ਨਹੀਂ ਹੋਇਆ ਕਿ ਮਿਜ਼ਾਈਲ ਨਾਲ ਕੋਈ ਧਮਾਕਾਖੇਜ਼ ਸਮੱਗਰੀ ਨਹੀਂ ਸੀ ਲਗਾਈ ਗਈ। ਇਹ ਇਕ ਗੰਭੀਰ ਘਟਨਾ ਹੈ ਅਤੇ ਕੇਂਦਰ ਸਰਕਾਰ ਅਤੇ ਸਬੰਧਿਤ ਸੀਨੀਅਰ ਅਧਿਕਾਰੀਆਂ ਨੂੰ ਇਸ ਵੱਲ ਵਿਸ਼ੇਸ਼ ਧਿਆਨ ਦੇਣਾ ਚਾਹੀਦਾ ਹੈ। ਕੂਟਨੀਤਕ ਪੱਧਰ ’ਤੇ ਪਾਕਿਸਤਾਨ ਦੇ ਅਧਿਕਾਰੀਆਂ ਨਾਲ ਗੱਲਬਾਤ ਕਰਦਿਆਂ ਇਹ ਸਹਿਮਤੀ ਬਣਾਉਣੀ ਜ਼ਰੂਰੀ ਹੈ ਕਿ ਕਿਸੇ ਅਜਿਹੀ ਦੁਰਘਟਨਾ ਜਾਂ ਹਾਦਸੇ ਸਮੇਂ ਦੋਹਾਂ ਦੇਸ਼ਾਂ ਦੇ ਸੀਨੀਅਰ ਅਧਿਕਾਰੀ ਇਕ-ਦੂਜੇ ਨਾਲ ਤੁਰੰਤ ਰਾਬਤਾ ਕਾਇਮ ਕਰਨ।