ਜਸਬੀਰ ਸਿੰਘ ਚਾਨਾ
ਫਗਵਾੜਾ, 29 ਜੂਨ
ਸਫ਼ਾਈ ਕਰਮਚਾਰੀ ਯੂਨੀਅਨ (ਆਜ਼ਾਦ) ਤੇ ਮਿਊਂਸਪਲ ਸਫ਼ਾਈ ਕਰਮਚਾਰੀ ਯੂਨੀਅਨ (ਇੰਟਕ) ਵਲੋਂ ਬਣਾਏ ਗਏ ਏਕਤਾ ਮੰਚ ਨਗਰ ਨਿਗਮ ਨੇ ਸਮੂਹ ਪੱਕੇ, ਕੱਚੇ ਤੇ ਠੇਕੇਦਾਰੀ ਅਧੀਨ ਕੰਮ ਕਰਦੇ ਸਫ਼ਾਈ ਕਾਮਿਆਂ ਵੱਲੋਂ ਅੱਜ ਨਗਰ ਨਿਗਮ ਦਫ਼ਤਰ ਦੇ ਬਾਹਰ ਧਰਨਾ ਲਗਾਇਆ ਜਿਸ ’ਚ ਉਨ੍ਹਾਂ ਨਿਗਮ ਖਿਲਾਫ਼ ਨਾਅਰੇਬਾਜ਼ੀ ਕੀਤੀ।
ਧਰਨੇ ਨੂੰ ਸੰਬੋਧਨ ਕਰਦਿਆਂ ਸਫ਼ਾਈ ਕਰਮਚਾਰੀ ਯੂਨੀਅਨ ਏਕਤਾ ਮੰਚ ਦੇ ਆਗੂ ਰਜੇਸ਼ ਕੁਮਾਰ ਪ੍ਰਧਾਨ ਸਫ਼ਾਈ ਕਰਮਚਾਰੀ ਯੂਨੀਅਨ (ਆਜ਼ਾਦ), ਕੁਲਵੰਤ ਰਾਏ ਸੌਂਧੀ ਪ੍ਰਧਾਨ, ਵਿਸ਼ਾਲ ਘਈ, ਸੁਦੇਸ ਕੁਮਾਰ ਮੱਟੂ, ਜੋਤੀ ਬਘਾਣੀਆ, ਦਰਸ਼ਨ ਲਾਲ, ਜੋਗਾ ਨਾਹਰ, ਪਦਮ ਕੁਮਾਰ ਨੇ ਕਿਹਾ ਕਿ ਨਗਰ ਨਿਗਮ ਦੀ ਅਫ਼ਸਰਸ਼ਾਹੀ ਸਫ਼ਾਈ ਕਰਮਚਾਰੀਆਂ ਦੇ ਹਿੱਤਾਂ ਦਾ ਲਗਾਤਾਰ ਨੁਕਸਾਨ ਕਰ ਰਹੀ ਹੈ ਤੇ ਜਿਥੇ ਇਹ ਸਫ਼ਾਈ ਕਰਮਚਾਰੀਆਂ ਦੀਆਂ ਮੰਗਾਂ ਨੂੰ ਅਣਗੋਲਿਆਂ ਕਰ ਰਹੀ ਹੈ ਉੱਥੇ ਡਰਾ ਧਮਕਾ ਤੇ ਬੇਇੱਜ਼ਤ ਵੀ ਕਰ ਰਹੀ ਹੈ। ਆਗੂਆਂ ਨੇ ਕਿਹਾ ਕਿ ਉਨ੍ਹਾਂ ਦੀਆਂ ਮੁੱਖ ਮੰਗਾਂ ’ਚ ਸਫ਼ਾਈ ਕਾਮਿਆਂ ਦੇ ਹਿੱਤਾਂ ਨੂੰ ਨੁਕਸਾਨ ਪਹੁੰਚਾਉਣ ਲਈ ਲੰਬੇ ਸਮੇਂ ਤੋਂ ਕਾਮਿਆਂ ਦੀਆਂ ਮੰਗਾਂ ਜਿਵੇਂ ਤਰਸ ਆਧਾਰਿਤ ਨੌਕਰੀਆਂ ਦੇਣ, ਪੰਜ ਦਿਨ ਦਾ ਹਫ਼ਤਾ ਲਾਗੂ ਕਰਕੇ ਸ਼ਨੀ-ਐਤਵਾਰ ਦੀ ਛੁੱਟੀ ਲਾਗੂ ਕਰਨ, ਸਾਰੀਆਂ ਗਜ਼ਟਿਡ ਛੁੱਟੀਆ ਲਾਗੂ ਕਰਨ, ਬੈਂਕ ਲੋਨ ਲਈ ਸਫ਼ਾਈ ਕਰਮਚਾਰੀਆਂ ਤੇ ਬੈਂਕ ਦਰਮਿਆਨ ਲੋਕ ਐਗਰੀਮੈਂਟ ਦੀ ਕਨਫ਼ਰਮੇਸ਼ਨ ਨਿਗਮ ਦਫ਼ਤਰ ਵਲੋਂ ਸਾਈਨ ਕਰਨਾ, ਠੇਕੇਦਾਰੀ ਪ੍ਰਥਾ ਖਤਮ ਕਰਕੇ ਠੇਕੇਦਾਰ ਅਧੀਨ ਕੰਮ ਕਰਦੇ ਸਫ਼ਾਈ ਕਾਮਿਆਂ ਨੂੰ ਨਗਰ ਨਿਗਮ ਆਪਣੇ ਅਧੀਨ ਲੈਣ ਆਦਿ ਮੰਗਾਂ ਸ਼ਾਮਿਲ ਹਨ। ਇਸ ਮੌਕੇ ਤਰਕਸ਼ੀਲ ਸੁਸਾਇਟੀ ਦੇ ਆਗੂ ਸੁਖਦੇਵ ਫਗਵਾੜਾ, ਸਾਧੂ ਸਿੰਘ ਜੱਸਲ, ਹੰਸ ਰਾਜ ਬੰਗ਼ੜ, ਅਨੂ ਸਹੋਤਾ, ਅਸ਼ਵਨੀ ਸਹੋਤਾ ਨੇ ਸੰਬੋਧਨ ਕਰਦਿਆਂ ਕਿਹਾ ਕਿ ਨਗਰ ਨਿਗਮ ਸਫ਼ਾਈ ਕਰਮਚਾਰੀਆਂ ਦੇ ਸੰਘਰਸ਼ ਦੀ ਉਹ ਡੱਟ ਕੇ ਹਮਾਇਤ ਕਰਦੇ ਹਨ।