ਖੇਤਰੀ ਪ੍ਰਤੀਨਿਧ
ਚੰਡੀਗੜ੍ਹ, 16 ਅਗਸਤ
ਚੰਡੀਗੜ੍ਹ ਹਾਊਸਿੰਗ ਬੋਰਡ ਦੇ ਸੈਕਟਰ 9 ਸਥਿਤ ਦਫ਼ਤਰ ਵਿਖੇ ਵਿਜ਼ੀਟਰਾਂ ਅਤੇ ਹੋਰ ਬਿਨੈਕਾਰਾਂ ਦਾ ਰਿਸੈਪਸ਼ਨ ਵਿਖੇ ਕਿਸੇ ਫਾਈਵ ਸਟਾਰ ਹੋਟਲ ਵਾਂਗ ਸਵਾਗਤ ਕੀਤਾ ਜਾਵੇਗਾ। ਚੰਡੀਗੜ੍ਹ ਹਾਊਸਿੰਗ ਬੋਰਡ ਦਫ਼ਤਰ ਵਿਖੇ ਆਪਣੇ ਕਾਰਜਾਂ ਲਈ ਪੁੱਜਣ ਵਾਲੇ ਵਿਜ਼ਿਟਰਾਂ ਅਤੇ ਹੋਰ ਬਿਨੈਕਾਰਾਂ ਨੂੰ ਚਾਹ ਪਾਣੀ ਦੇ ਨਾਲ ਨਾਲ ਬਿਸਕੁਟ ਅਤੇ ਟੌਫ਼ੀਆਂ ਆਦਿ ਦੀ ਪੇਸ਼ਕਸ਼ ਕੀਤੀ ਜਾਵੇਗੀ।
ਚੰਡੀਗੜ੍ਹ ਹਾਊਸਿੰਗ ਬੋਰਡ ਵਲੋਂ ਇੱਕ ਤਜ਼ਰਬੇ ਦੇ ਅਧਾਰ ‘ਤੇ ਇਹ ਫੈਸਲਾ ਕੀਤਾ ਗਿਆ ਹੈ ਜੋ ਕਿ ਅਗਲੇ ਤਿੰਨ ਮਹੀਨਿਆਂ ਲਈ ਜਾਰੀ ਰਹੇਗਾ। ਬੋਰਡ ਦੇ ਸੀਈਓ ਯਸ਼ਪਾਲ ਗਰਗ ਨੇ ਦੱਸਿਆ ਕਿ ਉਪਰੋਕਤ ਪਹਿਲਕਦਮੀ ਨੂੰ ਲਾਗੂ ਕਰਨ ਲਈ ਆਉੂਟਸੋਰਸਿੰਗ ਏਜੰਸੀ ਰਾਹੀਂ ਇਥੇ ਬੋਰਡ ਦਫ਼ਤਰ ਦੇ ਰਿਸੈਪਸ਼ਨ ਏਰੀਆ ਵਿਖੇ ਇੱਕ ਵੇਟਰ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਚੰਡੀਗੜ੍ਹ ਪ੍ਰਸ਼ਾਸਨ ਦਾ ਪ੍ਰਾਹੁਣਚਾਰੀ ਵਿਭਾਗ ਨੂੰ ਇਥੇ ਲਗਾਏ ਗਏ ਵੇਟਰ ਦੀ ਵਰਦੀ ਸਮੇਤ ਹੋਰ ਲੋੜੀਂਦੇ ਸਿਖਲਾਈ ਪ੍ਰਬੰਧ ਕਰਨ ਵਿੱਚ ਸਹਾਇਤਾ ਲਈ ਕਿਹਾ ਗਿਆ ਹੈ। ਫਿਲਹਾਲ ਇਹ ਵਿਵਸਥਾ ਤਜ਼ਰਬੇ ਦੇ ਤੌਰ ’ਤੇ ਤਿੰਨ ਮਹੀਨੇ ਲਈ ਸ਼ੁਰੂ ਕੀਤੀ ਗਈ ਹੈ।