ਹਰਜੀਤ ਸਿੰਘ
ਡੇਰਾਬੱਸੀ, 19 ਮਈ
ਪਿੰਡ ਜਨੇਤਪੁਰ ਵਿੱਚ ਖੇਤਾਂ ਵਿੱਚ ਕੰਮ ਕਰਦੇ ਮਜ਼ਦੂਰਾਂ ਅਤੇ ਔਰਤਾਂ ਨੇ ਅੱਜ ਇਲਾਕੇ ਵਿੱਚ ਤੇਂਦੁਏ ਵਰਗਾ ਜੰਗਲੀ ਜਾਨਵਰ ਵੇਖਣ ਦਾ ਦਾਅਵਾ ਕੀਤਾ ਹੈ। ਮਾਮਲਾ ਸਾਹਮਣੇ ਆਉਣ ਮਗਰੋਂ ਜੰਗਲਾਤ ਵਿਭਾਗ ਨੇ ਤੇਂਦੁਏ ਨੂੰ ਫੜਨ ਲਈ ਖੇਤਾਂ ਵਿੱਚ ਪਿੰਜਰਾ ਲਗਾ ਦਿੱਤਾ ਹੈ। ਪੁਲੀਸ ਨੇ ਮੌਕੇ ’ਤੇ ਪਹੁੰਚ ਕੇ ਹਾਲਾਤ ਦਾ ਜਾਇਜ਼ਾ ਲਿਆ ਪਰ ਕੋਈ ਜੰਗਲੀ ਜਾਨਵਰ ਨਜ਼ਰ ਨਾ ਆਇਆ।
ਮਾਮਲੇ ਦੀ ਜਾਣਕਾਰੀ ਦਿੰਦਿਆਂ ਏਐੱਸਆਈ ਬਰਜਿੰਦਰ ਸਿੰਘ ਨੇ ਦੱਸਿਆ ਕਿ ਪਿੰਡ ਜਨੇਤਪੁਰ ਨੇੜੇ ਖੇਤਾਂ ਵਿੱਚ ਕੰਮ ਕਰਦੀ ਬਜ਼ੁਰਗ ਔਰਤ ਕਮਲਾ ਮੁਤਾਬਕ ਉਸ ਨੇ ਪਹਿਲਾਂ ਸ਼ੇਰ ਵਰਗੇ ਜਾਨਵਰ ਦੀ ਆਵਾਜ਼ ਸੁਣੀ ਜਿਸ ਤੋਂ ਬਾਅਦ ਇਕ ਜੰਗਲੀ ਜਾਨਵਰ ਛਲਾਂਗ ਮਾਰ ਕੇ ਦੂਜੇ ਖੇਤਾਂ ਵਿੱਚ ਵੜ ਗਿਆ। ਕਮਲਾ ਤੇ ਉਸ ਨਾਲ ਮੌਜੂਦ ਹੋਰ ਲੋਕ ਡਰ ਕੇ ਉਥੋਂ ਭੱਜ ਗਏ। ਇਸ ਤੋਂ ਇਲਾਵਾ ਨੇੜਲੇ ਖੇਤ ਵਿੱਚ ਖਰਬੂਜੇ ਤੋੜਦੇ ਪਰਵਾਸੀ ਮਜ਼ਦੂਰ ਨੇ ਵੀ ਜੰਗਲੀ ਜਾਨਵਰ ਵੇਖਣ ਦਾ ਦਾਅਵਾ ਕੀਤਾ। ਇਸ ਤੋਂ ਬਾਅਦ ਪੁਲੀਸ ਮੌਕੇ ’ਤੇ ਪਹੁੰਚੀ ਤੇ ਟਰੈਕਟਰ ’ਤੇ ਬੈਠ ਕੇ ਸੂਰਜਮੁਖੀ ਦੇ ਖੇਤਾਂ ਦੀ ਭਾਲ ਕੀਤੀ ਗਈ ਪਰ ਕੁਝ ਨਹੀਂ ਮਿਲਿਆ। ਜੰਗਲਾਤ ਵਿਭਾਗ ਦੇ ਮੁਲਾਜ਼ਮਾਂ ਨੇ ਵੀ ਮੌਕੇ ਦਾ ਦੌਰਾ ਕਰਦਿਆਂ ਇਕ ਪਿੰਜਰਾ ਖੇਤਾਂ ਵਿੱਚ ਲਗਾ ਦਿੱਤਾ ਹੈ। ਇਲਾਕੇ ਦੇ ਮਜ਼ਦੂਰਾਂ ਨੇ ਦੱਸਿਆ ਕਿ ਤੇਂਦੁਏ ਨੂੰ ਫੜਨ ਲਈ ਜਿਥੇ ਪਿੰਜਰਾ ਲਾਇਆ ਗਿਆ ਹੈ, ਉਸ ਦੇ ਨੇੜੇ ਹੀ ਉਹ ਰਹਿੰਦੇ ਹਨ ਅਤੇ ਜੇਕਰ ਤੇਂਦੁਆ ਸੱਚ ਵਿੱਚ ਹੋਇਆ ਤਾਂ ਉਨ੍ਹਾਂ ਦੇ ਪਰਿਵਾਰਾਂ ਲਈ ਖ਼ਤਰੇ ਵਾਲੀ ਗੱਲ ਹੋ ਸਕਦੀ ਹੈ।
ਪਿੰਡ ਵਾਸੀ ਚੌਕਸ ਰਹਿਣ: ਸਰਪੰਚ
ਪਿੰਡ ਦੇ ਸਾਬਕਾ ਸਰਪੰਚ ਬਲਬੀਰ ਸਿੰਘ ਬੱਲਾ ਨੇ ਦੱਸਿਆ ਕਿ ਪਿੰਡ ਵਾਸੀਆਂ ਨੂੰ ਚੌਕਸ ਰਹਿਣ ਲਈ ਆਖਿਆ ਗਿਆ ਹੈ। ਉਨ੍ਹਾਂ ਹੈਰਾਨੀ ਪ੍ਰਗਟਾਈ ਕਿ ਤੇਂਦੁਏ ਨੂੰ ਫੜਨ ਲਈ ਜਿਹੜਾ ਪਿੰਜਰਾ ਲਾਇਆ ਗਿਆ ਹੈ, ਉਸ ਵਿੱਚ ਮੀਟ, ਮਾਸ ਜਾਂ ਕੋਈ ਛੋਟਾ ਜਾਨਵਰ ਨਹੀਂ ਰੱਖਿਆ ਗਿਆ ਜਿਸ ਦੇ ਲਾਲਚ ਵਿੱਚ ਆ ਕੇ ਤੇਂਦੁਆ ਪਿੰਜਰੇ ਵਿੱਚ ਕੈਦ ਹੋ ਸਕੇ। ਤੇਂਦੁਆ ਵਿਖਾਈ ਦੇਣ ਤੋਂ ਬਾਅਦ ਪਿੰਡ ਵਿੱਚ ਦਹਿਸ਼ਤ ਫੈਲ ਗਈ ਹੈ।