ਪੱਤਰ ਪ੍ਰੇਰਕ
ਮੋਰਿੰਡਾ, 24 ਅਕਤੂਬਰ
ਬੇ-ਮੌਸਮੀ ਬਾਰਸ਼ ਕਾਰਨ ਮੋਰਿੰਡਾ ਇਲਾਕੇ ਵਿੱਚ ਕਿਸਾਨਾਂ ਅਤੇ ਆੜ੍ਹਤੀਆਂ ਦਾ ਬਹੁਤ ਨੁਕਸਾਨ ਹੋਇਆ ਹੈ। 30 ਏਕੜ ਵਿੱਚ ਬਣੀ ਅਨਾਜ ਮੰਡੀ ਮੋਰਿੰਡਾ, ਫੋਕਲ ਪੁਆਇੰਟ ਰਸੂਲਪੁਰ ਅਤੇ ਚੱਕਲਾਂ ਵਿੱਚ ਪਈ ਜੀਰੀ ਪਾਣੀ ਵਿੱਚ ਡੁੱਬ ਗਈ। ਇਹੀ ਨਹੀਂ ਇਲਾਕੇ ਦੇ ਖੇਤਾਂ ’ਚ ਖੜ੍ਹੀ ਫਸਲ ਤੇਜ਼ ਮੀਂਹ ਅਤੇ ਹਵਾ ਨਾਲ ਡਿੱਗ ਕੇ ਪਾਣੀ ਵਿੱਚ ਡੁੱਬ ਗਈ। ਮੀਂਹ ਐਨਾ ਜ਼ਿਆਦਾ ਪਿਆ ਕਿ ਖੇਤ ਪਾਣੀ ਨਾਲ ਪੂਰੇ ਭਰ ਗਏ। ਸੰਯੁਕਤ ਕਿਸਾਨ ਮੋਰਚੇ ਦੇ ਆਗੂ ਪਰਮਿੰਦਰ ਸਿੰਘ ਚਲਾਕੀ, ਦਲਜੀਤ ਸਿੰਘ ਚਲਾਕੀ ਨੇ ਦੱਸਿਆ ਕਿ ਅਜੇ ਇਲਾਕੇ ’ਚ 50 ਪ੍ਰਤੀਸ਼ਤ ਤੋਂ ਵੀ ਜ਼ਿਆਦਾ ਜੀਰੀ ਦੀ ਕਟਾਈ ਹੋਣੋਂ ਰਹਿੰਦੀ ਹੈ। ਬੇ-ਮੌਸਮੀ ਵਰਖਾ ਨੇ ਕਿਸਾਨਾਂ ਦਾ ਬਹੁਤ ਵੱਡਾ ਨੁਕਸਾਨ ਕੀਤਾ ਹੈ। ਆੜ੍ਹਤੀ ਐਸੋਸੀਏਸ਼ਨ ਮੋਰਿੰਡਾ ਦੇ ਪ੍ਰਧਾਨ ਜੁਝਾਰ ਸਿੰਘ ਮਾਵੀ ਦਾ ਕਹਿਣਾ ਹੈ ਕਿ ਜਦੋਂ ਤੱਕ ਜੀਰੀ ਦੀ ਲਿਫਟਿੰਗ ਨਹੀਂ ਹੁੰਦੀ ਉੱਦੋਂ ਤੱਕ ਇਹ ਜੀਰੀ ਆੜ੍ਹਤੀਆਂ ਦੇ ਖਾਤੇ ਵਿੱਚ ਖੜ੍ਹੀ ਰਹਿੰਦੀ ਹੈ। ਭਾਵੇਂ ਆੜ੍ਹਤੀਆਂ ਨੇ ਬਹੁਤ ਕੋਸ਼ਿਸ਼ਾਂ ਕਰਕੇ ਤਰਪਾਲਾਂ ਦੇ ਕੇ ਜੀਰੀ ਨੂੰ ਢਕਿਆ ਹੈ, ਪ੍ਰੰਤੂ ਤੇਜ਼ ਹਵਾ ਚੱਲਣ ਨਾਲ ਕਈ ਜੀਰੀ ਦੀਆਂ ਢਾਗਾਂ ਤੋਂ ਤਰਪਾਲਾਂ ਵੀ ਉੱਡ ਗਈਆਂ ਤੇ ਬੋਰੀਆਂ ਵੀ ਭਿੱਜ ਗਈਆਂ। ਹੁਣ ਜਦੋਂ ਉਹ ਇਸ ਜੀਰੀ ਨੂੰ ਰਾਈਸ ਸ਼ੈਲਰਾਂ ਵਿੱਚ ਭੇਜਣਗੇ ਤਾਂ ਇਸ ਜੀਰੀ ਨੂੰ ਦੁਬਾਰਾ ਸੁਕਾਉਣਾ ਪਵੇਗਾ ਜਿਸ ’ਤੇ ਸੁਕਾਉਣ ਸਮੇਂ ਕਾਫੀ ਖਰਚਾ ਆਵੇਗਾ, ਦੂਜੇ ਇਸ ਦਾ ਭਾਰ ਵੀ ਘਟ ਜਾਵੇਗਾ। ਇਸੇ ਸਬੰਧ ਵਿੱਚ ਸੰਯੁਕਤ ਕਿਸਾਨ ਮੋਰਚਾ ਅਤੇ ਆੜ੍ਹਤੀ ਐਸੋਸੀਏਸ਼ਨ ਮੋਰਿੰਡਾ ਵਲੋਂ ਪੰਜਾਬ ਸਰਕਾਰ ਤੋਂ ਮੁਆਵਜ਼ੇ ਦੀ ਮੰਗ ਕੀਤੀ ਹੈ।
ਅਨਾਜ ਮੰਡੀ ਮੋਰਿੰਡਾ ਵਿੱਚ ਮੀਂਹ ਦੇ ਪਾਣੀ ਵਿੱਚ ਭਿੱਜ ਰਹੀਆਂ ਜੀਰੀ ਦੀਆਂ ਬੋਰੀਆਂ।