ਦਰਸ਼ਨ ਸਿੰਘ ਸੋਢੀ
ਐਸ.ਏ.ਐਸ. ਨਗਰ (ਮੁਹਾਲੀ), 26 ਜੂਨ
ਮੁਹਾਲੀ ਪੁਲੀਸ ਨੇ ਲਾਂਡਰਾਂ ਵਿੱਚ ਸੁਨਿਆਰਾ ਤੇ ਸੋਹਾਣਾ ’ਚ ਮੈਡੀਕਲ ਸਟੋਰ ’ਤੇ ਲੁੱਟ-ਖੋਹ ਕਰਨ ਵਾਲੇ ਗਰੋਹ ਦਾ ਪਰਦਾਫਾਸ਼ ਕਰਕੇ ਤਿੰਨ ਮੁਲਜ਼ਮਾਂ ਹਰਦੀਪ ਸਿੰਘ ਉਰਫ਼ ਗਰੇਵਾਲ ਵਾਸੀ ਪਿੰਡ ਸ਼ੇਰਪੁਰ (ਸੰਗਰੂਰ), ਨੂਰਜੀਤ ਸਿੰਘ ਉਰਫ਼ ਨੂਰ ਤੇ ਜਗਜੀਤ ਸਿੰਘ ਉਰਫ਼ ਹੈਪੀ ਦੋਵੇਂ ਵਾਸੀ ਪਿੰਡ ਭਾਈ ਰੂਪਾ (ਬਠਿੰਡਾ) ਨੂੰ ਅਸਲੇ ਸਣੇ ਗ੍ਰਿਫ਼ਤਾਰ ਕੀਤਾ ਹੈ। ਅੱਜ ਇੱਥੇ ਮੁਹਾਲੀ ਦੇ ਐੱਸਐੱਸਪੀ ਵਿਵੇਕਸ਼ੀਲ ਸੋਨੀ ਨੇ ਦੱਸਿਆ ਕਿ ਮੁਲਜ਼ਮਾਂ ਕੋਲੋਂ .32 ਬੋਰ ਦਾ ਰਿਵਾਲਵਰ ਤੇ 5 ਜਿੰਦਾ ਕਾਰਤੂਸਾਂ ਸਣੇ 380 ਗਰਾਮ ਸੋਨਾ, ਸਾਢੇ 4 ਕਿੱਲੋ ਚਾਂਦੀ, ਇੱਕ ਲੱਖ ਦੀ ਨਗਦੀ ਤੇ ਦੋ ਕਾਰਾਂ (ਚਿੱਟੇ ਰੰਗ ਦੀ ਆਈ-20 ਤੇ ਵਰਨਾ ਕਾਰ) ਬਰਾਮਦ ਕੀਤੀਆਂ ਹਨ। ਐੱਸਐੱਸਪੀ ਸੋਨੀ ਨੇ ਦੱਸਿਆ ਕਿ ਬੀਤੀ 25 ਮਈ ਨੂੰ ਮੁਲਜ਼ਮਾਂ ਨੇ ਸੋਹਾਣਾ ਵਿੱਚ ਰਾਤ ਸਮੇਂ ਪਿਸਤੌਲ ਦਿਖਾ ਕੇ ਮਨੋਹਰ ਮੈਡੀਕਲ ਸਟੋਰ ਤੋਂ 40 ਹਜ਼ਾਰ ਰੁਪਏ ਲੁੱਟੇ ਸੀ। ਇੰਜ ਹੀ ਬੀਤੀ 11 ਜੂਨ ਨੂੰ ਲਾਂਡਰਾਂ ਮੇਨ ਬਾਜ਼ਾਰ ਵਿੱਚ ਪ੍ਰਵੀਨ ਜਿਊਲਰਜ਼ ਦੀ ਦੁਕਾਨ ’ਚੋਂ ਪ੍ਰਵੀਨ ਕੁਮਾਰ ਤੇ ਉਸ ਦੀ ਪਤਨੀ ਨੂੰ ਪਿਸਤੌਲ ਦਿਖਾ ਕੇ ਉਨ੍ਹਾਂ ਕੋਲੋਂ ਸੋਨਾ ਤੇ ਚਾਂਦੀ ਦੇ ਬੈਗ ਲੁੱਟੇ ਗਏ ਸੀ। ਇਨ੍ਹਾਂ ਦੋਵੇਂ ਮਾਮਲਿਆਂ ਸਬੰਧੀ ਧਾਰਾ 379ਬੀ, 34, 506 ਤੇ ਆਰਮਜ਼ ਐਕਟ ਤਹਿਤ ਸੋਹਾਣਾ ਥਾਣਾ ਵਿੱਚ ਕੇਸ ਦਰਜ ਕਰ ਕੇ ਡੀਐੱਸਪੀ (ਡੀ) ਕੁਲਜਿੰਦਰ ਸਿੰਘ, ਡੀਐੱਸਪੀ (ਸਿਟੀ-2) ਸੁਖਜੀਤ ਸਿੰਘ ਵਿਰਕ ਤੇ ਜ਼ਿਲ੍ਹਾ ਸੀਆਈਏ ਸਟਾਫ਼ ਮੁਹਾਲੀ ਦੇ ਇੰਚਾਰਜ ਸ਼ਿਵ ਕੁਮਾਰ ਤੇ ਸੋਹਾਣਾ ਥਾਣਾ ਦੇ ਐੱਸਐੱਚਓ ਇੰਸਪੈਕਟਰ ਗੁਰਜੀਤ ਸਿੰਘ ’ਤੇ ਆਧਾਰਤ ਵੱਖ-ਵੱਖ ਟੀਮਾਂ ਦਾ ਗਠਨ ਕਰਕੇ ਮੁਲਜ਼ਮਾਂ ਦੀ ਪੈੜ ਨੱਪਣੀ ਸ਼ੁਰੂ ਕਰ ਦਿੱਤੀ।
ਐੱਸਐੱਸਪੀ ਨੇ ਦੱਸਿਆ ਕਿ ਤਫ਼ਤੀਸ਼ ਦੌਰਾਨ ਪੁਲੀਸ ਨੇ ਇਨ੍ਹਾਂ ਦੋਵਾਂ ਵਾਰਦਾਤਾਂ ਨੂੰ ਸੁਲਝਾਉਂਦੇ ਹੋਏ ਲੁਟੇਰਾ ਗਰੋਹ ਦੇ ਤਿੰਨ ਮੈਂਬਰਾਂ ਹਰਦੀਪ ਸਿੰਘ ਉਰਫ਼ ਗਰੇਵਾਲ ਵਾਸੀ ਪਿੰਡ ਸ਼ੇਰਪੁਰ (ਸੰਗਰੂਰ), ਨੂਰਜੀਤ ਸਿੰਘ ਉਰਫ਼ ਨੂਰ ਤੇ ਜਗਜੀਤ ਸਿੰਘ ਉਰਫ਼ ਹੈਪੀ ਦੋਵੇਂ ਵਾਸੀ ਪਿੰਡ ਭਾਈ ਰੂਪਾ (ਬਠਿੰਡਾ) ਨੂੰ ਕਾਬੂ ਕਰਕੇ ਉਨ੍ਹਾਂ ਕੋਲੋਂ 380 ਗਰਾਮ ਸੋਨਾ, 4 ਕਿੱਲੋ 500 ਗਰਾਮ ਚਾਂਦੀ, 1 ਲੱਖ ਰੁਪਏ ਭਾਰਤੀ ਕਰੰਸੀ, ਇੱਕ .32 ਬੋਰ ਦਾ ਰਿਵਾਲਵਰ, 5 ਜਿੰਦਾ ਕਾਰਤੂਸ ਤੇ ਚਿੱਟੇ ਰੰਗ ਇੱਕ ਵਰਨਾ ਕਾਰ ਤੇ ਇੱਕ ਆਈ-20 ਕਾਰ ਬਰਾਮਦ ਕੀਤੀ। ਮੁਲਜ਼ਮ ਹਰਦੀਪ ਸਿੰਘ ਖਰੜ ’ਚ ਕਿਰਾਏ ਦੇ ਮਕਾਨ ’ਚ ਰਹਿੰਦਾ ਸੀ ਤੇ ਉਸ ਦੇ ਸਾਥੀ ਵੀ ਅਕਸਰ ਉਸ ਕੋਲ ਆਉਂਦੇ ਜਾਂਦੇ ਰਹਿੰਦੇ ਸੀ।