ਲਾਲੜੂ (ਸਰਬਜੀਤ ਸਿੰਘ ਭੱਟੀ): ਅੰਬਾਲਾ-ਚੰਡੀਗੜ੍ਹ ਮੁੱਖ ਮਾਰਗ ’ਤੇ ਸਥਿਤ ਆਈਟੀਆਈ ਚੌਕ ਵਿੱਚ ਸਵੇਰੇ ਤੂੜੀ ਨਾਲ ਲੱਦੀ ਹੋਈ ਇੱਕ ਟਰਾਲੀ ਪਲਟ ਗਈ ਜਿਸ ਦੌਰਾਨ ਵੱਡਾ ਹਾਦਸਾ ਹੋਣੋਂ ਬਚਾਅ ਹੋ ਗਿਆ। ਇਸ ਦੌਰਾਨ ਮੁੱਖ ਮਾਰਗ ਦੀ ਟਰੈਫਿਕ ਵਿੱਚ ਕਾਫ਼ੀ ਦੇਰ ਤੱਕ ਅੜਿੱਕਾ ਲੱਗਿਆ ਰਿਹਾ। ਇਸ ਮੌਕੇ ਟਰੈਕਟਰ-ਟਰਾਲੀ ਦੇ ਡਰਾਈਵਰ ਬਾਦਲ ਨੇ ਦੱਸਿਆ ਕਿ ਉਹ ਤੂੜੀ ਨਾਲ ਲੱਦੀ ਹੋਈ ਟਰਾਲੀ ਅੰਬਾਲੇ ਵੱਲੋਂ ਲੈ ਕੇ ਆ ਰਿਹਾ ਸੀ ਜੋ ਉਸ ਨੇ ਲਾਲੜੂ ਨੇੜੇ ਪੈਂਦੇ ਪਿੰਡ ਚਾਂਦਹੇੜੀ ਦੀ ਇੱਕ ਫੈਕਟਰੀ ਵਿੱਚ ਲੈ ਕੇ ਜਾਣੀ ਸੀ। ਜਿਵੇਂ ਹੀ ਸਵੇਰੇ ਪੌਣੇ ਸੱਤ ਵਜੇ ਉਹ ਆਈਟੀਆਈ ਚੌਕ ਪਾਰ ਕਰਨ ਲੱਗਾ ਤਾਂ ਟਰਾਲੀ ਦੀ ਹੁੱਕ ਟੁੱਟ ਜਾਣ ਕਾਰਨ ਸੰਤੁਲਨ ਵਿਗੜ ਕੇ ਟਰਾਲੀ ਸੜਕ ਦੇ ਵਿਚਕਾਰ ਪਲਟ ਗਈ। ਇਸ ਦੌਰਾਨ ਚੰਡੀਗੜ੍ਹ ਤੋਂ ਕਾਰ ਵਿੱਚ ਆ ਰਿਹਾ ਇੱਕ ਪੂਰਾ ਪਰਿਵਾਰ ਟਰਾਲੀ ਦੇ ਹੇਠਾਂ ਆਉਣ ਤੋਂ ਵਾਲ-ਵਾਲ ਬਚ ਗਿਆ।