ਪੱਤਰ ਪ੍ਰੇਰਕ
ਲਾਲੜੂ, 17 ਅਪਰੈਲ
ਦੱਪਰ ਨੇੜੇ ਰੇਲਵੇ ਲਾਈਨਾਂ ਦੇ ਬਾਹਰਲੇ ਪਾਸੇ ਅੱਜ ਸਵੇਰੇ ਇੱਕ ਅਣਪਛਾਤਾ ਵਿਅਕਤੀ ਨੀਮ ਬੇਹੋਸ਼ੀ ਦੀ ਹਾਲਤ ਵਿੱਚ ਮਿਲਿਆ ਹੈ। ਰੇਲਵੇ ਪੁਲੀਸ ਚੌਕੀ ਲਾਲੜੂ ਦੇ ਇੰਚਾਰਜ ਮਨੋਹਰ ਲਾਲ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਦੱਪਰ ਨੇੜੇ ਰੇਲਵੇ ਲਾਈਨ ਤੋਂ ਇੱਕ ਪਾਸੇ ਇੱਕ ਨਾਮਲੂਮ ਵਿਅਕਤੀ ਜ਼ਖ਼ਮੀ ਹਾਲਤ ਵਿੱਚ ਪਿਆ ਹੈ, ਜਿਸ ਨੂੰ ਪੁਲੀਸ ਨੇ ਮੌਕੇ ’ਤੇ ਪਹੁੰਚ ਕੇ ਸਿਵਲ ਹਸਪਤਾਲ ਡੇਰਾਬਸੀ ਪਹੁੰਚਾਇਆ। ਉਸ ਨੂੰ ਬਾਅਦ ਵਿੱਚ ਸੈਕਟਰ 32 ਚੰਡੀਗੜ੍ਹ ਦੇ ਸਰਕਾਰੀ ਮੈਡੀਕਲ ਕਾਲਜ ਤੇ ਹਸਪਤਾਲ ਵਿੱਚ ਰੈਫਰ ਕਰ ਦਿੱਤਾ ਗਿਆ, ਜਿੱਥੇ ਉਹ ਜ਼ੇਰੇ ਇਲਾਜ ਹੈ। ਵਿਅਕਤੀ ਕੋਲੋਂ ਕੋਈ ਸ਼ਨਾਖਤੀ ਕਾਰਡ, ਮੋਬਾਈਲ ਜਾਂ ਨਗਦੀ ਵਗੈਰਾ ਨਹੀਂ ਮਿਲੀ। ਉਸ ਨੇ ਕਰੀਮ ਰੰਗ ਦੀ ਟੀ-ਸ਼ਰਟ ਪਾਈ ਹੋਈ ਹੈ ਅਤੇ ਸਿਰ ਤੋਂ ਮੋਨਾ ਹੈ। ਨੀਮ ਬੇਹੋਸ਼ੀ ਹਾਲਤ ਉਸ ਨੇ ਆਪਣਾ ਨਾਂ ਨਿੱਕੂ ਦੱਸਿਆ ਹੈ।