ਪ੍ਰਮੋਦ ਕੁਮਾਰ ਸਿੰਗਲਾ/ਮਨੋਜ ਸ਼ਰਮਾ
ਸ਼ਹਿਣਾ/ਬਠਿੰਡਾ, 4 ਅਗਸਤ
ਕਸਬਾ ਸ਼ਹਿਣਾ ਦੀ ਮਨਿੰਦਰਜੀਤ ਕੌਰ ਗਿੱਲ ਨੇ ਸਿਵਿਲ ਸੇਵਾਵਾਂ ਪ੍ਰੀਖਿਆ ਵਿਚ 246ਵਾਂ ਰੈਂਕ ਹਾਸਲ ਕਰ ਕੇ ਕਸਬੇ ਦਾ ਨਾਮ ਰੌਸ਼ਨ ਕੀਤਾ ਹੈ। ਮਨਿੰਦਰਜੀਤ ਕੌਰ ਪਹਿਲਾਂ ਪੀਸੀਐੱਸ ਸੀ ਅਤੇ ਬਠਿੰਡਾ ਵਿਚ ਅਸਿਸਟੈਂਟ ਕਮਿਸ਼ਨਰ ਵਜੋਂ ਸੇਵਾ ਨਿਭਾ ਰਹੀ ਸੀ। ਉਸ ਦੇ ਮਾਤਾ ਬੇਅੰਤ ਕੌਰ ਸਿਹਤ ਵਿਭਾਗ ਵਿਚ ਮੁਲਾਜ਼ਮ ਹਨ। ਅੱਜ ਨਤੀਜਾ ਆਉਣ ’ਤੇ ਮਨਿੰਦਰਜੀਤ ਦੇ ਪਿਤਾ ਜਰਨੈਲ ਸਿੰਘ, ਪਰਿਵਾਰਕ ਮੈਂਬਰਾਂ ਤੇ ਕਸਬਾ ਵਾਸੀਆਂ ਨੇ ਖੁਸ਼ੀ ਦਾ ਇਜ਼ਹਾਰ ਕੀਤਾ। ਮਨਿੰਦਰਜੀਤ ਕਸਬਾ ਸ਼ਹਿਣਾ ’ਚੋਂ ਪਹਿਲੀ ਆਈ.ਏ.ਐੱਸ. ਬਣੀ ਹੈ। ਉਹ ਬਾਬਾ ਹੀਰਾ ਸਿੰਘ ਏਕਤਾ ਸਪੋਰਟਸ ਕਲੱਬ ਅਤੇ ਬਾਲ ਭਲਾਈ ਕਮੇਟੀ ਦੀ ਮੈਂਬਰ ਵੀ ਸੀ। ਕਸਬਾ ਸ਼ਹਿਣਾ ਦੀ ਸਰਪੰਚ ਮਲਕੀਤ ਕੌਰ ਨੇ ਮੁਬਾਰਕਬਾਦ ਦਿੱਤੀ।