ਨਵੀਂ ਦਿੱਲੀ, 6 ਅਗਸਤ
ਦਿੱਲੀ ਦੇ ਉਪ ਮੁੱਖ ਮੰਤਰੀ ਮਨੀਸ਼ ਸਿਸੋਦੀਆ ਨੇ ਸਾਬਕਾ ਉਪ ਰਾਜਪਾਲ ਅਨਿਲ ਬੈਜਲ ‘ਤੇ ਗ਼ੈਰਕਾਨੂੰਨੀ ਇਲਾਕਿਆਂ ‘ਚ ਸ਼ਰਾਬ ਦੇ ਠੇਕੇ ਖੋਲ੍ਹਣ ਦੇ ਮੁੱਦੇ ‘ਤੇ ਆਪਣਾ ਰੁਖ਼ ਬਦਲਣ ਦਾ ਦੋਸ਼ ਲਗਾਇਆ ਹੈ। ਇਥੇ ਪੱਤਰਕਾਰਾਂ ਨਾਲ ਗੱਲ ਕਰਦਿਆਂ ਉਨ੍ਹਾਂ ਦੱਸਿਆ ਕਿ ਬੈਜਲ ਵੱਲੋਂ ਰੁਖ਼ ਬਦਲਣ ਦੇ ਕਾਰਨਾਂ ਦੀ ਜਾਂਚ ਲਈ ਸੀਬੀਆਈ ਨੂੰ ਪੱਤਰ ਭੇਜਿਆ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੇ ਮਈ 2021 ਵਿੱਚ ਨਵੀਂ ਆਬਕਾਰੀ ਨੀਤੀ ਪਾਸ ਕੀਤੀ ਸੀ। ਇਸ ਨੀਤੀ ਤਹਿਤ ਨਾਜਾਇਜ਼ ਖੇਤਰਾਂ ਵਿੱਚ ਵੀ ਠੇਕੇ ਵੰਡੇ ਜਾਣੇ ਸਨ, ਜਿਸ ‘ਤੇ ਉਪ ਰਾਜਪਾਲ ਨੇ ਕੋਈ ਇਤਰਾਜ਼ ਨਹੀਂ ਕੀਤਾ ਪਰ ਜਦੋਂ ਠੇਕਿਆਂ ਦੀ ਫਾਈਲ ਉਨ੍ਹਾਂ ਕੋਲ ਗਈ ਤਾਂ ਉਨ੍ਹਾਂ ਆਪਣਾ ਮਨ ਬਦਲ ਲਿਆ। ਉਪ ਰਾਜਪਾਲ ਨੇ ਨਵੀਂ ਸ਼ਰਤ ਰੱਖੀ ਕਿ ਅਜਿਹੇ ਖੇਤਰਾਂ ’ਚ ਠੇਕੇ ਖੋਲ੍ਹਣ ਲਈ ਡੀਡੀਏ ਅਤੇ ਐੱਮਸੀਡੀ ਦੀ ਇਜਾਜ਼ਤ ਲਈ ਜਾਵੇ। ਇਸ ਕਾਰਨ ਅਣ-ਅਧਿਕਾਰਤ ਖੇਤਰ ਵਿੱਚ ਠੇਕੇ ਨਹੀਂ ਖੁੱਲ੍ਹ ਸਕੇ ਅਤੇ ਅਦਾਲਤ ਦੇ ਫੈਸਲੇ ਕਾਰਨ ਨਵੇਂ ਲਾਇਸੈਂਸ ਲੈਣ ਵਾਲਿਆਂ ਨੂੰ ਰਿਆਇਤ ਦੇਣੀ ਪਈ ਅਤੇ ਸਰਕਾਰ ਨੂੰ ਹਜ਼ਾਰਾਂ ਕਰੋੜਾਂ ਦਾ ਨੁਕਸਾਨ ਹੋਇਆ।