ਗੁਰਦੀਪ ਸਿੰਘ ਲਾਲੀ
ਸੰਗਰੂਰ, 4 ਜੁਲਾਈ
ਇੱਥੋਂ ਦੀ ਮਹਿਲ ਮੁਬਾਰਕ ਕਲੋਨੀ ’ਚ ਸਥਿਤ ਮਕਾਨ ਦੇ ਅੰਦਰੋਂ ਬਜ਼ੁਰਗ ਜੋੜੇ ਦੀਆਂ ਲਾਸ਼ਾਂ ਮਿਲੀਆਂ ਹਨ। ਬਜ਼ੁਰਗ ਜੋੜਾ ਘਰ ਵਿੱਚ ਇਕੱਲਾ ਰਹਿੰਦਾ ਸੀ। ਪੁਲੀਸ ਨੇ ਮੌਕੇ ’ਤੇ ਪੁੱਜ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪ੍ਰਾਪਤ ਜਾਣਕਾਰੀ ਅਨੁਸਾਰ ਧੂਰੀ ਰੋਡ ’ਤੇ ਸਥਿਤ ਮੈਕਸ ਆਟੋਜ਼ ਦੇ ਪਿਛਲੇ ਪਾਸੇ ਮਹਿਲ ਮੁਬਾਰਕ ਕਲੋਨੀ ਦੇ ਪੁਰਾਣੇ ਮਕਾਨ ’ਚ ਪ੍ਰੀਤਮ ਸਿੰਘ (85) ਅਤੇ ਉਸ ਦੀ ਪਤਨੀ ਸੁਰਜੀਤ ਕੌਰ (82) ਰਹਿੰਦੇ ਸਨ। ਅੱਜ ਸਵੇਰੇ ਦੋਧੀ ਜਦੋਂ ਘਰ ਦੁੱਧ ਪਾਉਣ ਲਈ ਆਇਆ ਤਾਂ ਦਰਵਾਜ਼ਾ ਖੜਕਾਉਣ ’ਤੇ ਅੰਦਰੋਂ ਨਾ ਖੁੱਲ੍ਹਿਆ। ਗੁਆਂਢੀਆਂ ਨੇ ਪੁਲੀਸ ਨੂੰ ਇਸ ਦੀ ਸੂਚਨਾ ਦਿੱਤੀ। ਥਾਣਾ ਸਿਟੀ ਪੁਲੀਸ ਦੇ ਇੰਚਾਰਜ ਗੁਰਭਜਨ ਸਿੰਘ ਸਮੇਤ ਪੁਲੀਸ ਪਾਰਟੀ ਮੌਕੇ ’ਤੇ ਪੁੱਜੇ ਅਤੇ ਲੋਕਾਂ ਦੀ ਹਾਜ਼ਰੀ ’ਚ ਮਕਾਨ ਦਾ ਗੇਟ ਖੋਲ੍ਹਿਆ ਗਿਆ ਤਾਂ ਅੰਦਰ ਬਜ਼ੁਰਗ ਜੋੜੀ ਮ੍ਰਿਤਕ ਮਿਲੀ।
ਪ੍ਰੀਤਮ ਸਿੰਘ ਦੀ ਮ੍ਰ੍ਰਿਤਕ ਦੇਹ ਕਮਰੇ ਅੰਦਰ ਫਰਸ਼ ’ਤੇ ਪਈ ਸੀ ਜਦੋਂ ਕਿ ਸੁਰਜੀਤ ਕੌਰ ਦੀ ਲਾਸ਼ ਮੰਜੇ ’ਤੇ ਪਈ ਸੀ। ਦੋਵਾਂ ਦੇ ਸਰੀਰ ’ਤੇ ਕੋਈ ਜ਼ਖ਼ਮ ਆਦਿ ਨਹੀਂ ਸੀ ਅਤੇ ਨਾ ਹੀ ਮਕਾਨ ਅੰਦਰ ਕੋਈ ਵਗੈਰਾ ਖਿੱਲਰਿਆ ਹੋਇਆ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਬਜ਼ੁਰਗ ਜੋੜੇ ਦੇ ਕੋਈ ਔਲਾਦ ਨਹੀਂ ਸੀ ਅਤੇ ਘਰ ਵਿੱਚ ਇਕੱਲੇ ਹੀ ਰਹਿੰਦੇ ਸੀ। ਪੁਲੀਸ ਵਲੋਂ ਜ਼ੇਰੇ ਦਫ਼ਾ 174 ਤਹਿਤ ਕਾਰਵਾਈ ਕੀਤੀ ਗਈ ਹੈ। ਡੀਐੱਸਪੀ ਸੱਤਪਾਲ ਸ਼ਰਮਾ ਦਾ ਕਹਿਣਾ ਹੈ ਕਿ ਸਿਵਲ ਹਸਪਤਾਲ ਵਿੱਚ ਡਾਕਟਰਾਂ ਦੇ ਇੱਕ ਬੋਰਡ ਵੱਲੋਂ ਦੋਵੇਂ ਮ੍ਰਿਤਕ ਦੇਹਾਂ ਦਾ ਪੋਸਟ ਮਾਰਟਮ ਕਰਵਾਇਆ ਜਾ ਰਿਹਾ ਹੈ।ਸ।