ਸਰਬਜੀਤ ਸਿੰਘ ਗਿੱਲ
ਫਿਲੌਰ, 28 ਅਕਤੂਬਰ
ਪੰਜਾਬ ਦੇ ਉੱਪ ਮੁੱਖ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਅੱਜ ਸਤਲੁਜ ਦਰਿਆ ਦੇ ਨਜ਼ਦੀਕ ਹਾਈਟੈੱਕ ਨਾਕੇ ’ਤੇ ਲੰਘਣ ਵੇਲੇ ਅਚਾਨਕ ਪੜਤਾਲ ਕੀਤੀ। ਪੜਤਾਲ ਕਰਨ ਮਗਰੋਂ ਜਲੰਧਰ ਦਿਹਾਤੀ ਪੁਲੀਸ ਦੇ ਮੁਖੀ ਨੂੰ ਫ਼ੋਨ ’ਤੇ ਤਿੰਨ ਪੁਲੀਸ ਮੁਲਾਜ਼ਮਾਂ ਨੂੰ ਡਿਊਟੀ ’ਚ ਕਥਿਤ ਤੌਰ ’ਤੇ ਕੀਤੀ ਕੁਤਾਹੀ ਕਾਰਨ ਮੁਅੱਤਲ ਕਰਨ ਨੂੰ ਕਿਹਾ। ਨਾਕੇ ’ਤੇ ਡਿਊਟੀ ਦੌਰਾਨ ਇਨ੍ਹਾਂ ਮੁਲਾਜ਼ਮਾਂ ਵਲੋਂ ਕਥਿਤ ਤੌਰ ’ਤੇ ਢਿੱਲ ਵਰਤੀ ਗਈ ਸੀ, ਜਿਸ ਕਾਰਨ ਡਿਪਟੀ ਸੀਐੱਮ ਨੇ ਮੁਅੱਤਲ ਕਰਨ ਨੂੰ ਕਿਹਾ। ਇਸ ਦੌਰਾਨ ਹਾਜ਼ਰ ਮੁਲਾਜ਼ਮ ਨੇ ਕਿਹਾ ਕਿ ਉਹ ਚੌਵੀਂ ਘੰਟੇ ਲਗਾਤਾਰ ਡਿਊਟੀ ਦਿੰਦੇ ਹਨ। ਅੱਜ ਜਦੋਂ ਪੰਜਾਬ ਦੇ ਉਪ ਮੁੱਖ ਮੰਤਰੀ ਪੜਤਾਲ ਕਰਨ ਪੁੱਜੇ ਤਾਂ ਉਹ ਸ਼ੂਗਰ ਦਾ ਮਰੀਜ਼ ਹੋਣ ਕਾਰਨ ਪਿਸ਼ਾਬ ਕਰਨ ਗਿਆ ਸੀ ਪਰ ਗੱਡੀਆਂ ਰੁਕਦੀਆਂ ਦੇਖ ਉਹ ਤੁਰੰਤ ਹਾਜ਼ਰ ਹੋ ਗਿਆ ਸੀ। ਇਸ ਦੌਰਾਨ ਹੀ ਇਕ ਹੋਰ ਮੁਲਾਜ਼ਮ ਆਪਣੀ ਡਿਊਟੀ ਖਤਮ ਕਰਕੇ ਆਪਣੀ ਗੱਡੀ ਦਾ ਸ਼ੀਸ਼ਾ ਸਾਫ ਕਰ ਰਿਹਾ ਸੀ। ਇਸ ਮੁਲਾਜ਼ਮ ਨੇ ਦੱਸਿਆ ਕਿ ਉਸ ਦੇ ਨਾਲ ਤਿੰਨ ਹੋਰ ਮੁਲਾਜ਼ਮ ਡਿਊਟੀ ’ਤੇ ਹਾਜ਼ਰ ਹੋਣੇ ਸਨ, ਜਿਨ੍ਹਾਂ ’ਚੋਂ ਇਕ ਛੁੱਟੀ ’ਤੇ ਹੈ, ਦੂਜਾ ਸ਼ਹਾਦਤ ’ਤੇ ਗਿਆ ਹੈ ਅਤੇ ਤੀਜਾ ਪੁਲੀਸ ਲਾਈਨ ’ਚ ਡਿਊਟੀ ਕਰ ਰਿਹਾ ਹੈ।