ਦੇਵਿੰਦਰ ਸਿੰਘ ਜੱਗੀ
ਪਾਇਲ, 26 ਨਵੰਬਰ
ਨੇੜਲੇ ਪਿੰਡ ਧਮੋਟ ਕਲਾਂ ਦੀ ਜੰਮਪਲ ਜਸ਼ਨਦੀਪ ਕੌਰ ਗਿੱਲ ਪੁੱਤਰੀ ਪਰਮਿੰਦਰ ਸਿੰਘ ਰਵੀ ਗਿੱਲ ਨੇ ਇਟਲੀ ਵਿੱਚ ਬੀਤੇ ਦਿਨੀਂ ਹੋਈਆਂ ਘੋੜ ਸਵਾਰੀ ਦੌੜਾਂ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਇਸ ਮਿਸਾਲੀ ਜਿੱਤ ਵਿੱਚ ਪਿੰਡ ਵਾਸੀਆਂ ਤੇ ਸਪੋਰਟਸ ਕਲੱਬ ਨੇ ਖੁਸ਼ੀ ਦਾ ਇਜ਼ਹਾਰ ਕੀਤਾ। ਪਰਮਿੰਦਰ ਸਿੰਘ ਰਵੀ ਨੇ ਦੱਸਿਆ ਕਿ ਉਸ ਦੀ ਧੀ ਜਸ਼ਨਦੀਪ ਕੌਰ ਗਿੱਲ ਸਾਲ 2013 ਵਿੱਚ ਇਟਲੀ ਆਈ ਸੀ, ਜਿਸ ਨੇ ਪੜ੍ਹਾਈ ਦੇ ਨਾਲ-ਨਾਲ 2015 ਵਿੱਚ ਘੋੜ ਸਵਾਰੀ ਦੀ ਪੀਏਤਰੋ ਮੋਨੇਤਾ ਤੇ ਸਾਰਾ ਗੁਸੋਨੀ ਤੋਂ ਕੋਚਿੰਗ ਲੈਣੀ ਸ਼ੁਰੂ ਕੀਤੀ। ਗਿੱਲ ਨੇ ਸਖਤ ਅਭਿਆਸ ਦੌਰਾਨ ਸਾਲ 2017 ਵਿੱਚ ਪਹਿਲੀ ਵਾਰ 30 ਕਿਲੋਮੀਟਰ ਦੀ ਘੋੜ ਸਵਾਰੀ ਦੌੜ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਇਸ ਤੋਂ ਬਾਅਦ 2019-20 ਵਿੱਚ ਲਗਾਤਾਰ 30, 60 ਅਤੇ 90 ਕਿਲੋਮੀਟਰ ਘੋੜ ਸਵਾਰੀ ਮੁਕਾਬਲਿਆਂ ਵਿੱਚ ਨਾਮਣਾ ਖੱਟਿਆ। ਰਵੀ ਗਿੱਲ ਨੇ ਅੱਗੇ ਦੱਸਿਆ ਕਿ 15 ਨਵੰਬਰ 2020 ਨੂੰ ਇਟਲੀ ਵਿੱਚ ਹੋਈਆਂ 60 ਕਿਲੋਮੀਟਰ ਘੋੜ ਸਵਾਰੀ ਦੌੜ ਵਿੱਚ ਪਹਿਲਾ ਸਥਾਨ ਪ੍ਰਾਪਤ ਕੀਤਾ। ਉਨ੍ਹਾਂ ਕਿਹਾ ਕਿ ਜਸ਼ਨਦੀਪ ਕੌਰ ਨੇ ਖੇਡਾਂ ਤੋਂ ਇਲਾਵਾ ਪੰਜ ਭਾਸ਼ਾਵਾਂ ਇਟਾਲੀਅਨ, ਫਰੈਂਚ, ਅੰਗਰੇਜ਼ੀ, ਜਰਮਨੀ ਤੇ ਸਪੈਨਿਸ਼ ਵਿੱਚ ਵੀ ਡਿਪਲੋਮਾ ਪ੍ਰਾਪਤ ਕੀਤਾ।
