ਪੱਤਰ ਪ੍ਰੇਰਕ
ਨਵੀਂ ਦਿੱਲੀ, 10 ਜੂਨ
ਦਿੱਲੀ ਦੇ ਵਾਤਾਵਰਨ ਮੰਤਰੀ ਗੋਪਾਲ ਰਾਏ ਨੇ ਕਿਹਾ ਕਿ ਕੋਵਿਡ ਮਹਾਮਾਰੀ ਕਾਰਨ ਦਿੱਲੀ ਦੇ ਕਨਾਟ ਪਲੈਸ ’ਚ ਲਾਏ ਜਾਣ ਵਾਲੇ ਸਮੋਗ ਟਾਵਰ ਨੂੰ ਬਣਾਉਣ ਵਿੱਚ ਦੇਰੀ ਹੋਈ ਹੈ ਅਤੇ ਹੁਣ ਇਹ 15 ਅਗਸਤ ਤੱਕ ਬਣ ਕੇ ਤਿਆਰ ਹੋ ਜਾਵੇਗਾ। ਰਾਏ ਨੇ ਕਨਾਟ ਪਲੈਸ ਵਿੱਚ ਬਣਨ ਵਾਲੇ ਇਸ 25 ਮੀਟਰ ਟਾਵਰ ਦੇ ਕੰਮ ਦਾ ਜਾਇਜ਼ਾ ਲਿਆ। ਉਨ੍ਹਾਂ ਕਿਹਾ ਕਿ ਦੇਸ਼ ਦਾ ਪਹਿਲਾ ਸਮੋਗ ਟਾਵਰ ਪਾਇਲਟ ਪ੍ਰਾਜੈਕਟ ਹੈ ਪਰ ਕਰੋਨਾ ਮਹਾਮਾਰੀ ਕਾਰਨ ਇਸ ਦੇ ਕੰਮ ਹੌਲੀ ਹੋ ਗਏ ਸਨ ਪਰ ਹੁਣ ਤੇਜ਼ੀ ਲਿਆਂਦੀ ਜਾ ਰਹੀ ਹੈ ਤੇ ਜੇ ਇਹ ਸਫਲ ਰਿਹਾ ਤਾਂ ਹੋਰ ਅਜਿਹੇ ਟਾਵਰ ਵੀ ਲਾਏ ਜਾਣਗੇ। ਇਹ ਪ੍ਰਾਜੈਕਟ ਟਾਟਾ ਵੱਲੋਂ 20 ਕਰੋੜ ਦੀ ਲਾਗਤ ਨਾਲ ਸੁਪਰੀਮ ਕੋਰਟ ਦੇ ਹੁਕਮਾਂ ’ਤੇ ਬਣਾਇਆ ਜਾ ਰਿਹਾ ਹੈ, ਜਿਸ ਨੂੰ ਦਿੱਲੀ ਸਰਕਾਰ ਨੇ ਫੰਡ ਦਿੱਤੇ ਹਨ। ਇਕ ਹੋਰ ਟਾਵਰ ਆਨੰਦ ਵਿਹਾਰ ਇਲਾਕੇ ਵਿੱਚ ਕੇਂਦਰ ਸਰਕਾਰ ਵੱਲੋਂ ਫੰਡ ਦੇ ਕੇ ਕੇਂਦਰੀ ਪ੍ਰਦੂਸ਼ਣ ਕੰਟਰੋਲ ਨੂੰ ਨੋਡਲ ਏਜੰਸੀ ਬਣਾ ਕੇ ਸਥਾਪਤ ਕੀਤਾ ਜਾ ਰਿਹਾ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਪੀਐੱਮ 2.5 ਨੂੰ ਇੱਕ ਕਿਲੋਮੀਟਰ ਘੇਰੇ ਵਿੱਚ ਲੈ ਕੇ ਸ਼ੁੱਧ ਕਰੇਗਾ। ਇਸ ਦੇ 40 ਪੱਖੇ ਹਨ ਤੇ ਐਨੇ ਹੀ ਸ਼ੋਰ ਪ੍ਰਦੂਸ਼ਣ ਰੋਕਣ ਦੇ ਯੰਤਰ ਲਾਏ ਹੋਏ ਹਨ। ਠੰਢ ਦੇ ਮੌਸਮ ਵਿੱਚ ਧੂੰਆਂਖੀ ਧੁੰਦ ਕਾਰਨ ਦਿੱਲੀ ਦੇ ਲੋਕਾਂ ਦਾ ਦਮ ਘੁਟਣ ਲੱਗਦਾ ਹੈ ਤੇ ਹਵਾ ਪ੍ਰਦੂਸ਼ਣ ਖ਼ਤਰਨਾਕ ਸ਼੍ਰੇਣੀ ਤੱਕ ਪੁੱਜ ਜਾਂਦਾ ਹੈ।