ਚਰਨਜੀਤ ਸਿੰਘ ਢਿੱਲੋਂ
ਜਗਰਾਉਂ ,11 ਜੂਨ
ਇੱਥੇ 15 ਜੂਨ ਨੂੰ ਦਾਣਾ ਮੰਡੀ ਵਿੱਚ ਏਐੱਸਆਈ. ਭਗਵਾਨ ਸਿੰਘ ਅਤੇ ਏਐੱਸਆਈਅ ਦਲਵਿੰਦਰਜੀਤ ਸਿੰਘ ਨੂੰ ਗੋਲੀਆਂ ਮਾਰ ਕੇ ਕਤਲ ਕਰਨ ਦੇ ਮਾਮਲੇ ਵਿੱਚ ਗ੍ਰਿਫਤਾਰ ਗੈਂਗਸਟਰ ਦਰਸ਼ਨ ਸਿੰਘ ਸਹੌਲੀ ਅਤੇ ਬਲਜਿੰਦਰ ਸਿੰਘ ਬੱਬੀ ਨੂੰ ਰਾਏਕੋਟ ਥਾਣੇ ਵਿੱਚ ਦਰਜ ਭੁੱਕੀ ਦੇ ਕੇਸ ਸਬੰਧੀ ਪੁੱਛ-ਗਿੱਛ ਕੀਤੀ ਜਾਵੇਗੀ । ਇਸ ਸਬੰਧੀ ਥਾਣਾ ਸਦਰ ਰਾਏਕੋਟ ਦੀ ਪੁਲੀਸ ਨੇ ਦੋਵਾਂ ਮੁਲਜ਼ਮਾਂ ਨੂੰ ਇੱਥੇ ਅਦਾਲਤ ਵਿੱਚ ਪੇਸ਼ ਕਰਕੇ 15 ਜੂਨ ਤੱਕ ਰਿਮਾਂਡ ਹਾਸਲ ਕਰ ਲਿਆ ਹੈ ਅਤੇ ਡਾਬਰਾ ਵਿੱਚ ਦੋਵਾਂ ਨੂੰ ਪਨਾਹ ਦੇਣ ਵਾਲੇ ਹਰਚਰਨ ਸਿੰਘ ਨੂੰ ਜੇਲ੍ਹ ਭੇਜਣ ਦੇ ਹੁਕਮ ਦਿੱਤੇ ਹਨ । ਇਸ ਮਾਮਲੇ ਵਿੱਚ ਪੁੱਛ-ਗਿੱਛ ਦੌਰਾਨ ਮਨਜੀਤ ਸਿੰਘ ਉਰਫ ਫੌਜੀ ਅਤੇ ਪਾਲਾ ਸਿੰਘ ਵਾਸੀ ਬੁਰਜ ਨਕਲੀਆਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਸਾਹਮਣੇ ਆਇਆ ਸੀ ਕਿ ਦਰਸ਼ਨ ਸਹੌਲੀ ਮਨਜੀਤ ਫੌਜ਼ੀ ਦੀ ਭੂਆ ਦਾ ਲੜਕਾ ਹੈ । ਫੌਜੀ ਨੇ ਹੀ ਪੁਲੀਸ ਕੋਲ ਖੁਲਾਸਾ ਕੀਤਾ ਕਿ ਪੁਲੀਸ ਥਾਣੇਦਾਰਾਂ ਨੂੰ ਮਾਰਨ ਵੇਲੇ ਵਰਤੀ ਗਈ ਕੈਂਟਰ ਝਾਰਖੰਡ ਤੋਂ ਲਿਆਦੀ ਗਈ ਸੀ । ਸਹੌਲੀ ਅਤੇ ਬੱਬੀ ਨਸ਼ਾ ਤਸਕਰੀ ਦਾ ਧੰਦਾ ਵੀ ਕਰਦੇ ਹਨ । ਥਾਣਾ ਮੁਖੀ ਅਜੈਬ ਸਿੰਘ ਨੇ ਦੱਸਿਆ ਕਿ ਰਿਮਾਂਡ ਦੌਰਾਨ ਦੋਵਾਂ ਤੋਂ ਨਸ਼ਾ ਲੈ ਕੇ ਆਉਣ ਅਤੇ ਸਪਲਾਈ ਬਾਰੇ ਜਾਣਕਾਰੀ ਹਾਸਲ ਕੀਤੀ ਜਾਵੇਗੀ।
