ਝੰਡੀ ਦੀਆਂ ਕੁਸ਼ਤੀਆਂ ਬਰਾਬਰੀ ’ਤੇ ਰਹੀਆਂ
ਮੁੱਲਾਂਪੁਰ ਗ਼ਰੀਬਦਾਸ (ਪੱਤਰ ਪੇ੍ਰਕ): ਨੇੜਲੇ ਪਿੰਡ ਨਾਡਾ ਵਿਖੇ ਗੁੱਗਾ ਜ਼ਾਹਰ ਪੀਰ ਦੇ ਮੇਲੇ ਮੌਕੇ ਕੁਸ਼ਤੀ ਦੰਗਲ ਦੌਰਾਨ ਪਹਿਲੀ ਝੰਡੀ ਦੇ ਪ੍ਰਸਿੱਧ ਪਹਿਲਵਾਨ ਪ੍ਰਿਤਪਾਲ ਫਗਵਾੜਾ ਤੇ ਧਰਮਿੰਦਰ ਕੁਹਾਲੀ ਦਰਮਿਆਨ 20 ਮਿੰਟ ਦਾ ਗਹਿਗੱਚ ਮੁਕਾਬਲਾ ਬਰਾਬਰ ਰਿਹਾ। ਦੂੂਜੀ ਝੰਡੀ ਵਿੱਚ ਪ੍ਰਿੰਸ ਕੁਹਾਲੀ ਤੇ ਉਮੇਸ਼ ਮਥਰਾ ਵੀ ਬਰਾਬਰ ਰਹੇ। ਤੀਜੀ ਝੰਡੀ ਵਿੱਚ ਅਜੈ ਬਾਰਨ ਨੇ ਭਰਤ ਮਹਾਰਾਸ਼ਟਰ ਨੂੰ ਚਿੱਤ ਕੀਤਾ। ਪਹਿਲਵਾਨ ਸੋਮਵੀਰ ਰੋਹਤਕ, ਕਾਲਾ ਬਾਰਨ, ਛੋਟਾ ਸਦਾਮ, ਰਾਹੁਲ ਨਾਡਾ, ਅਮਰੀਕ ਪੜਛ ਨੇ ਮੁਕਾਬਲੇ ਜਿੱਤੇ। ਨਾਮੀ ਪਹਿਲਵਾਨ ਬਾਜ਼ ਰੌਣੀ ਤੇ ਵਿੱਕੀ ਚੰਡੀਗੜ੍ਹ,ਸਾਹਿਲ ਕੁਹਾਲੀ ਤੇ ਅਮਿਤ ਚੰਡੀਗੜ੍ਹ, ਸੰਦੀਪ ਘੋੜਾ ਡੂਮਛੇੜੀ ਤੇ ਅੰਕਿਤ ਮਥਰਾ ਦਰਮਿਆਨ ਮੁਕਾਬਲੇ ਬਰਾਬਰ ਰਹੇ। ਸਾਬਕਾ ਕੌਂਸਲਰ ਮਹਿੰਦਰ ਬੈਹਿੜਾ ਤੇ ਹੇਮੂ ਨੇ ਦੱਸਿਆ ਕਿ ਸਾਰੇ ਪ੍ਰਬੰਧਕਾਂ ਨੇ ਕੁਸ਼ਤੀਆਂ ਦੀਆਂ ਹੱਥਜੋੜੀਆਂ ਕਰਵਾਈਆਂ।
