ਮੁੰਬਈ, 29 ਜੁਲਾਈ
‘ਬਿੱਗ ਬੌਸ 13’ ਦੇ ਸਾਬਕਾ ਉਮੀਦਵਾਰ ਅਤੇ ਅਦਾਕਾਰ ਪਾਰਸ ਛਾਬੜਾ ਨੇ ਅੱਜ ਇੱਥੇ ਖੁਲਾਸਾ ਕਰਦਿਆਂ ਦੱਸਿਆ ਕਿ ਉਹ ਇਸ ਸਾਲ ਰਿਐਲਿਟੀ ਸ਼ੋਅ ‘ਖਤਰੋਂ ਕੇ ਖਿਲਾੜੀ’ ਵਿੱਚ ਹਿੱਸਾ ਕਿਉਂ ਨਹੀਂ ਲੈ ਸਕਿਆ। ਇਸ ਬਾਰੇ ਗੱਲ ਕਰਦਿਆਂ ਪਾਰਸ ਨੇ ਕਿਹਾ, ‘‘ਮੇਰੇ ਤੱਕ ‘ਖਤਰੋਂ ਕੇ ਖਿਲਾੜੀ’ ਲਈ ਪਹੁੰਚ ਕੀਤੀ ਗਈ ਪਰ ਉਸ ਵੇਲੇ ਹਾਲਾਤ ਬਦਤਰ ਸਨ ਅਤੇ ਇਹ ਸੁਰੱਖਿਅਤ ਨਹੀਂ ਸੀ। ਕਰੋਨਾ ਮਹਾਮਾਰੀ ਕਾਰਨ ਮੈਂ ਇਸ ਨੂੰ ਸਵੀਕਾਰ ਨਹੀਂ ਕਰ ਸਕਿਆ। ਮੇਰੀ ਮਾਂ ਉਸ ਮੁਸ਼ਕਲ ਸਮੇਂ ਦੌਰਾਨ ਮੇਰੇ ਲਈ ਕਾਫ਼ੀ ਡਰ ਗਈ ਸੀ ਅਤੇ ਉਨ੍ਹਾਂ ਮੈਨੂੰ ਜਾਣ ਦੀ ਆਗਿਆ ਨਹੀਂ ਦਿੱਤੀ।’’ ਭਾਵੇਂ ਕਿ ਅਦਾਕਾਰ ਨੇ ਕਿਹਾ ਕਿ ਉਹ ਅਗਲੇ ਸਾਲ ਇਸ ਰਿਐਲਿਟੀ ਸ਼ੋਅ ਦਾ ਹਿੱਸਾ ਬਣਨ ਲਈ ਬੇਤਾਬ ਹੈ ਅਤੇ ਉਸ ਨੂੰ ਭਰੋਸਾ ਹੈ ਕਿ ਉਹ ਸ਼ੋਅ ਜਿੱਤ ਲਵੇਗਾ। ਪਾਰਸ ਨੇ ਕਿਹਾ, ‘‘ਜੇਕਰ ਮੈਨੂੰ ਅਗਲੇ ਸਾਲ ‘ਖਤਰੋਂ ਕੇ ਖਿਲਾੜੀ’ ਵਿੱਚ ਜਾਣ ਦਾ ਮੌਕਾ ਮਿਲਿਆ ਤਾਂ ਮੈਂ ਇਹ ਕਰਾਂਗਾ ਅਤੇ ਯਕੀਨੀ ਤੌਰ ’ਤੇ ਸ਼ੋਅ ਜਿੱਤਾਂਗਾ।’’ ਰਿਐਲਿਟੀ ਸ਼ੋਅ ‘ਖਤਰੋਂ ਕੇ ਖਿਲਾੜੀ’ ਵਿੱਚ ਉਮੀਦਵਾਰਾਂ ਨੂੰ ਡਰ ’ਚੋਂ ਬਾਹਰ ਨਿਕਲਣ ਲਈ ਚੁਣੌਤੀਆਂ ਦਿੱਤੀਆਂ ਜਾਂਦੀਆਂ ਹਨ ਪਰ ਪਾਰਸ ਦਾ ਕਹਿਣਾ ਹੈ ਕਿ ਉਹ ਕਿਸੇ ਚੀਜ਼ ਤੋਂ ਨਹੀਂ ਡਰਦਾ। ਕੰਮ ਦੀ ਗੱਲ ਕਰੀਏ ਤਾਂ ਪਾਰਸ ਪਿਛਲੀ ਵਾਰ ‘ਬਿੱਗ ਬੌਸ 13’ ਦੀ ਸਾਬਕਾ ਉਮੀਦਵਾਰ ਮਾਹਿਰਾ ਸ਼ਰਮਾ ਨਾਲ ‘ਨਜ਼ਾਰਾ’ ਦੀ ਮਿਊਜ਼ਿਕ ਵੀਡੀਓ ਵਿੱਚ ਦਿਖਾਈ ਦਿੱਤਾ ਸੀ। ਇਹ ਗਾਣਾ ਉਸਤਾਦ ਪੂਰਨ ਚੰਦ ਵਡਾਲੀ ਅਤੇ ਲਖਵਿੰਦਰ ਵਡਾਲੀ ਨੇ ਗਾਇਆ ਹੈ, ਜੋ ਮਈ ਵਿੱਚ ਰਿਲੀਜ਼ ਹੋਇਆ ਸੀ। -ਆਈਏਐੱਨਐੱਸ
