US-Iran peace deal: ਅਮਰੀਕਾ-ਇਰਾਨ ਅਮਨ ਸਮਝੌਤੇ ਨਾਲ ਸਿਆਸੀ ਮੁਸ਼ਕਲ ’ਚ ਫਸੇ ਨੇਤਨਯਾਹੂ

ਨੇਤਨਯਾਹੂ ਨੇ ਹੁਣ ਮੁਸ਼ਕਲ ਫ਼ੈਸਲੇ ਕਰਨੇ ਹਨ। ਕੀ ਉਹ ਚੋਣ ਸਾਲ ਵਿੱਚ ਅਮਰੀਕਾ, ਜੋ ਇਜ਼ਰਾਈਲ ਦਾ ਪੁਰਾਣਾ ਸਾਥੀ ਤੇ ਸੁਰੱਖਿਆ ਜ਼ਾਮਨ ਹੈ, ਅੱਗੇ ਝੁਕੇਗਾ? ਜਾਂ ਉਹ ਅਮਰੀਕਾ ਦੀ ਗੱਲ ਨਾ ਮੰਨ ਕੇ ਹਿਜ਼ਬੁੱਲਾ ਖ਼ਿਲਾਫ਼ ਇਜ਼ਰਾਈਲ ਵੱਲੋਂ ਫ਼ੌਜੀ ਹਮਲੇ ਜਾਰੀ ਰੱਖਣਗੇ? ਇਨ੍ਹਾਂ ਸਵਾਲਾਂ ਦਾ ਜਵਾਬ 19 ਜੂਨ ਨੂੰ ਕੁਝ ਹੱਦ ਤੱਕ ਮਿਲ ਗਿਆ ਸੀ ਜਦੋਂ ਇਜ਼ਰਾਈਲ ਤੇ ਹਿਜ਼ਬੁੱਲਾ ਇਕ ਹੋਰ ਗੋਲੀਬੰਦੀ ਲਈ ਰਾਜ਼ੀ ਹੋਏ ਸਨ; ਹਾਲਾਂਕਿ ਅਗਲੇ ਹੀ ਦਿਨ ਇਜ਼ਰਾਈਲ ਨੇ ਲੈਬਨਾਨ ’ਤੇ ਬੰਬਾਰੀ ਕੀਤੀ ਤੇ ਇਰਾਨ ਨੇ ਮੁੜ ਹਰਮੁਜ਼ ਜਲ ਮਾਰਗ ਨੂੰ ਬੰਦ ਕਰ ਦਿੱਤਾ।

ਇਜ਼ਰਾਈਲ ਵਿੱਚ ਆਮ ਚੋਣਾਂ ਅਕਤੂਬਰ ਵਿੱਚ ਹਨ, ਲਿਹਾਜ਼ਾ ਜੰਗ ਦੀ ਮਕਬੂਲੀਅਤ ਨੇਤਨਯਾਹੂ ਲਈ ਬਹੁਤ ਅਹਿਮ ਹੈ। ਉਹ ਪ੍ਰਧਾਨ ਮੰਤਰੀ ਵਜੋਂ ਇਕ ਹੋਰ ਕਾਰਜਕਾਲ ਜਿੱਤਣ ਲਈ ਤਰਲੋਮੱਛੀ ਹਨ, ਤਾਂ ਕਿ ਲੰਮੇ ਸਮੇਂ ਤੋਂ ਚੱਲ ਰਹੇ ਭ੍ਰਿਸ਼ਟਾਚਾਰ ਦੇ ਮੁਕੱਦਮੇ ਨੂੰ ਰੋਕਿਆ ਜਾ ਸਕੇ ਅਤੇ 7 ਅਕਤੂਬਰ ਨੂੰ ਹਮਾਸ ਦੇ ਤਬਾਹਕੁਨ ਹਮਲਿਆਂ ਲਈ ਇੰਟੈਲੀਜੈਂਸ ਦੀ ਨਾਕਾਮੀ ਵਿੱਚ ਆਪਣੀ ਜ਼ਿੰਮੇਵਾਰੀ ਉੱਤੇ ਹੋ ਰਹੀ ਬਹਿਸ ਨੂੰ ਦਬਾਇਆ ਜਾ ਸਕੇ। ਇਨ੍ਹਾਂ ਘਟਨਾਵਾਂ ਮਗਰੋਂ ਨੇਤਨਯਾਹੂ ਨੇ ਮੱਧ ਪੂਰਬ ਦੇ ਸਿਆਸੀ ਦ੍ਰਿਸ਼ ਨੂੰ ਬਦਲਣ ਦਾ ਅਹਿਦ ਲੈਂਦਿਆਂ ਹਮਾਸ, ਇਰਾਨ ਤੇ ਹਿਜ਼ਬੁੱਲਾ ਖ਼ਿਲਾਫ਼ ਹਮਲੇ ਕੀਤੇ। ਨੇਤਨਯਾਹੂ ਭਾਵੇਂ ਆਪਣੇ ਇਸ ਇਰਾਦੇ ’ਚ ਸਫਲ ਰਹੇ, ਪਰ ਇਨ੍ਹਾਂ ਹਮਲਿਆਂ ਨੇ ਇਜ਼ਰਾਈਲ ਨੂੰ ਹੀ ਵਧੇਰੇ ਅਸੁਰੱਖਿਅਤ ਬਣਾ ਦਿੱਤਾ। ਵਿਰੋਧੀ ਧਿਰ ਨੇ ਵੀ ਨੇਤਨਯਾਹੂ ਨੂੰ ਰੱਜ ਕੇ ਭੰਡਿਆ ਹੈ।

ਇਜ਼ਰਾਈਲ ਤੇ ਅਮਰੀਕਾ ਭਾਵੇਂ ਭਾਈਵਾਲ ਹਨ, ਪਰ ਇਹ ਬਰਾਬਰੀ ਦਾ ਰਿਸ਼ਤਾ ਨਹੀਂ ਹੈ। ਇਜ਼ਰਾਈਲ ਆਪਣੀ ਸੁਰੱਖਿਆ ਲਈ ਅਮਰੀਕਾ ਦੀ ਵਿੱਤੀ ਤੇ ਫ਼ੌਜੀ ਹਮਾਇਤ ਉੱਤੇ ਟੇਕ ਰੱਖਦਾ ਹੈ। ਇਜ਼ਰਾਈਲ ਨੂੰ ਯੂ ਐਨ ਸਲਾਮਤੀ ਕੌਂਸਲ ਵਿੱਚ ਕਿਸੇ ਵੀ ਭਵਿੱਖੀ ਪਾਬੰਦੀ ਤੋਂ ਬਚਣ ਲਈ ਅਮਰੀਕੀ ਕੂਟਨੀਤਕ ਹਮਾਇਤ ਦੀ ਲੋੜ ਹੈ।

ਪੈਂਟਾਗਨ ਨੇ ਸੰਸਦ ਤੋਂ 80 ਅਰਬ ਡਾਲਰ ਮੰਗੇ

ਵਾਸ਼ਿੰਗਟਨ: ਪੈਂਟਾਗਨ ਨੇ ਅਮਰੀਕੀ ਸੰਸਦ ਤੋਂ 80 ਅਰਬ ਡਾਲਰ ਮੰਗੇ ਹਨ ਤਾਂ ਕਿ ਇਸ ਨਾਲ ਇਰਾਨ ਖ਼ਿਲਾਫ਼ ਅਮਰੀਕੀ ਜੰਗ ਦੇ ਖ਼ਰਚਿਆਂ ਨੂੰ ਪੂਰਾ ਕੀਤਾ ਜਾ ਸਕੇ। ਪ੍ਰਬੰਧਨ ਤੇ ਬਜਟ ਬਾਰੇ ਵ੍ਹਾਈਟ ਹਾਊਸ ਦਫ਼ਤਰ ਨੇ ਹਾਲਾਂਕਿ ਅਜੇ ਤੱਕ ਸੰਸਦ ਨੂੰ ਇਸ ਬਾਰੇ ਕੋਈ ਰਸਮੀ ਗੁਜ਼ਾਰਿਸ਼ ਨਹੀਂ ਕੀਤੀ। ਰੱਖਿਆ ਮੰਤਰੀ ਪੀਟ ਹੈਗਸੇਥ ਹਾਲਾਂਕਿ ਸੋਮਵਾਰ ਸ਼ਾਮ ਤੋਂ ਕੈਪੀਟਲ ਹਿੱਲ (ਅਮਰੀਕੀ ਸੰਸਦ) ਦੇ ਚੱਕਰ ਜ਼ਰੂਰ ਮਾਰ ਰਹੇ ਹਨ। ਉਪ ਰੱਖਿਆ ਮੰਤਰੀ ਨੇ ਸੈਨੇਟਰਾਂ ਨੂੰ ਇਰਾਨ ਫੰਡਿੰਗ ਅਪੀਲ ਬਾਰੇ ਪਿਛਲੇ ਹਫ਼ਤੇ ਦੱਸਿਆ ਸੀ। ਵਾਲ ਸਟਰੀਟ ਜਨਰਲ ਨੇ ਸਭ ਤੋਂ ਪਹਿਲਾਂ ਇਨ੍ਹਾਂ ਦਾਅਵਿਆਂ ਦੀ ਪੁਸ਼ਟੀ ਕੀਤੀ ਹੈ। -ਏਪੀ