ਸੰਯੁਕਤ ਰਾਸ਼ਟਰ, 24 ਸਤੰਬਰ
ਰੂਸ ਦੇ ਵਿਦੇਸ਼ ਮੰਤਰੀ ਸਰਗੇਈ ਲੈਵਰੋਵ ਨੇ ਸੰਯੁਕਤ ਰਾਸ਼ਟਰ ਮਹਾਸਭਾ ਵਿਚ ਦਿੱਤੇ ਭਾਸ਼ਣ ’ਚ ਅਮਰੀਕਾ ਤੇ ਹੋਰਾਂ ਪੱਛਮੀ ਮੁਲਕਾਂ ਦੀ ਸਖ਼ਤ ਨਿਖੇਧੀ ਕੀਤੀ, ਪਰ ਉਨ੍ਹਾਂ ਯੂਕਰੇਨ ’ਚ ਆਪਣੇ ਮੁਲਕ ਵੱਲੋਂ ਛੇੜੀ ਜੰਗ ਦਾ ਜ਼ਿਕਰ ਨਹੀਂ ਕੀਤਾ।
ਰੂਸੀ ਆਗੂ ਨੇ ਕਿਹਾ, ‘ਅਮਰੀਕਾ ਤੇ ਇਸ ਦੇ ਪੱਛਮੀ ਸਾਥੀ ਲਗਾਤਾਰ ਟਕਰਾਅ ਨੂੰ ਸ਼ਹਿ ਦੇ ਰਹੇ ਹਨ, ਜਿਸ ਨਾਲ ਮਨੁੱਖਤਾ ਨਕਲੀ ਢੰਗ ਨਾਲ ਵੰਡੀ ਜਾ ਰਹੀ ਹੈ ਤੇ ਨਵੀਆਂ ਧੜੇਬੰਦੀਆਂ ਬਣ ਰਹੀਆਂ ਹਨ। ਇਸ ਨਾਲ ਕੁਝ ਹਾਸਲ ਨਹੀਂ ਹੋ ਰਿਹਾ। ਅਸਲ ਵਿਚ ਬਹੁ-ਧਰੁਵੀ ਆਲਮੀ ਢਾਂਚੇ ਦੀ ਸਥਾਪਤੀ ਨੂੰ ਰੋਕਣ ਲਈ, ਅਮਰੀਕਾ ਤੇ ਇਸ ਦੇ ਸਾਥੀ ਦੇਸ਼, ਜੋ ਹੋ ਸਕਦਾ ਹੈ, ਕਰ ਰਹੇ ਹਨ।’
ਸਰਗੇਈ ਨੇ ਕਿਹਾ ਕਿ ‘ਅਮਰੀਕਾ ਤੇ ਪੱਛਮੀ ਦੇਸ਼ ਫਿੱਕੇ ਪੈ ਰਹੇ ਤਾਕਤ ਦੇ ਕੌਮਾਂਤਰੀ ਢਾਂਚੇ ਦੇ ‘ਆਪੂੰ ਰਾਖੇ ਬਣੇ ਹੋਏ ਹਨ’, ਤੇ ਰੂਸ ਇਨ੍ਹਾਂ ਦੀ ਭੂਮਿਕਾ ਨੂੰ ਸਿਰੇ ਤੋਂ ਨਕਾਰਦਾ ਹੈ’।
ਉਨ੍ਹਾਂ ਕਿਹਾ ਕਿ ਇਹ ਦੇਸ਼ ਦੁਨੀਆ ਨੂੰ ਆਪਣੇ ਵੱਲੋਂ ਬਣਾਏ ਨੇਮਾਂ ਮੁਤਾਬਕ ਚਲਾਉਣਾ ਚਾਹੁੰਦੇ ਹਨ। ਰੂਸੀ ਵਿਦੇਸ਼ ਮੰਤਰੀ ਨੇ ਆਪਣੇ ਭਾਸ਼ਣ ਵਿਚ 1991 ਵਿਚ ਸੋਵੀਅਤ ਸੰਘ ਦੇ ਟੁੱਟਣ ਦਾ ਵੀ ਜ਼ਿਕਰ ਕੀਤਾ, ਤੇ ਅਸਿੱਧੇ ਰੂਪ ਵਿਚ ਪੱਛਮੀ ਮੁਲਕਾਂ ਵੱਲੋਂ ਯੂਕਰੇਨ ਨੂੰ ਦਿੱਤੀ ਜਾ ਰਹੀ ਮਦਦ ਵੱਲ ਵੀ ਇਸ਼ਾਰਾ ਕੀਤਾ।
ਰੂਸੀ ਵਿਦੇਸ਼ ਮੰਤਰੀ ਦੇ ਭਾਸ਼ਣ ਦੌਰਾਨ ਅਸੈਂਬਲੀ ਹਾਲ ਵਿਚ ਯੂਕਰੇਨ ਲਈ ਰੱਖੀਆਂ ਗਈਆਂ ਸੀਟਾਂ ਖਾਲੀ ਰਹੀਆਂ। ਭਾਸ਼ਣ ਵਿਚ ਰੂਸੀ ਵਿਦੇਸ਼ ਮੰਤਰੀ ਨੇ ਅਮਰੀਕਾ ਨੂੰ ਉੱਤਰੀ ਕੋਰੀਆ ਦੇ ਮੁੱਦੇ ਉਤੇ ਵੀ ਨਿਸ਼ਾਨਾ ਬਣਾਇਆ। ਉਨ੍ਹਾਂ ਕਿਹਾ ਕਿ ‘ਅਮਰੀਕਾ ਇਸ ਮਾਮਲੇ ਵਿਚ ਬੇਵਜ੍ਹਾ ਰੌਲਾ ਪਾ ਰਿਹਾ ਹੈ।’ -ਏਪੀ
ਰੂਸ ਵੱਲੋਂ ਯੂਕਰੇਨ ਵਿੱਚ ਹਵਾਈ ਹਮਲੇ, ਦੋ ਮੌਤਾਂ
ਕੀਵ: ਰੂਸ ਵੱਲੋਂ ਅੱਜ ਕੀਤੇ ਹਵਾਈ ਹਮਲਿਆਂ ਵਿਚ ਦੋ ਯੂਕਰੇਨੀ ਮਾਰੇ ਗਏ ਹਨ ਤੇ ਤਿੰਨ ਹੋਰ ਫੱਟੜ ਹੋ ਗਏ ਹਨ। ਇਹ ਹਮਲੇ ਖੇਰਸਾਨ ਖੇਤਰ ਵਿਚ ਹੋਏ ਹਨ। ਰੂਸੀ ਸੈਨਾ ਨੇ ਅੱਜ ਬੇਰੀਸਲਾਵ ਸ਼ਹਿਰ ਨੂੰ ਨਿਸ਼ਾਨਾ ਬਣਾਇਆ। ਇੱਥੇ ਹਮਲੇ ਵਿਚ ਕਈ ਘਰ ਤਬਾਹ ਹੋ ਗਏ ਹਨ। ਇਕ ਔਰਤ ਦੀ ਮੌਤ ਹੋਈ ਹੈ ਤੇ ਤਿੰਨ ਹੋਰ ਜ਼ਖ਼ਮੀ ਹੋ ਗਏ ਹਨ। ਇਸੇ ਦੌਰਾਨ ਰੂਸ ਵਿਚ ਯੂਕਰੇਨੀ ਡਰੋਨਾਂ ਨੇ ਕੁਰਸਕ ਸ਼ਹਿਰ ਵਿਚ ਇਕ ਪ੍ਰਸ਼ਾਸਕੀ ਇਮਾਰਤ ਨੂੰ ਨਿਸ਼ਾਨਾ ਬਣਾਇਆ ਹੈ। ਇੱਥੇ ਜਾਨੀ ਨੁਕਸਾਨ ਹੋਣ ਬਾਰੇ ਅਜੇ ਕੋਈ ਸੂਚਨਾ ਨਹੀਂ ਹੈ। ਮੀਡੀਆ ਰਿਪੋਰਟਾਂ ਮੁਤਾਬਕ ਇਹ ਇਮਾਰਤ ਰੂਸ ਦੀ ਸੁਰੱਖਿਆ ਏਜੰਸੀ ‘ਐਫਐੱਸਬੀ’ ਦੀ ਸ਼ਾਖਾ ਹੈ। -ਏਪੀ
‘ਰੂਸ ਨਾਲ ਸਿੱਧੀ ਜੰਗ ਲੜ ਰਿਹੈ ਅਮਰੀਕਾ’
ਇਕ ਪ੍ਰੈੱਸ ਕਾਨਫਰੰਸ ਵਿਚ ਰੂਸ ਦੇ ਵਿਦੇਸ਼ ਮੰਤਰੀ ਸਰਗੇਈ ਲੈਵਰੋਵ ਨੇ ਕਿਹਾ, ‘ਅਮਰੀਕਾ ਨੇ ਯੂਕਰੇਨ ਨੂੰ ਚਾਰੇ ਵਾਂਗ ਵਰਤ ਕੇ ਸਾਡੇ ਨਾਲ ਸਿੱਧੀ ਦੁਸ਼ਮਣੀ ਮੁੱਲ ਲੈ ਲਈ ਹੈ। ਹੁਣ ਤੁਸੀਂ ਇਸ ਨੂੰ ਜੋ ਮਰਜ਼ੀ ਕਹੋ, ਅਮਰੀਕਾ ਸਾਡੇ ਨਾਲ ਸਿੱਧੀ ਜੰਗ ਲੜ ਰਿਹਾ ਹੈ। ਅਸੀਂ ਇਸ ਨੂੰ ਹਾਈਬ੍ਰਿਡ ਜੰਗ ਕਹਾਂਗੇ।’
