Nepal Floods: ਲਾਪਤਾ ਆਪਣਿਆਂ ਦੀ ਭਾਲ ਕਰ ਰਹੇ ਪਰਿਵਾਰਾਂ ਲਈ ਆਖ਼ਰੀ ਉਮੀਦ ਹੈ DNA ਜਾਂਚ
ਪੁਲੀਸ ਹੁਣ ਤੱਕ ਇਕੱਠੇ ਕਰ ਚੁੱਕੀ ਹੈ 2,272 ਡੀ ਐੱਨ ਏ ਨਮੂਨੇ: ਰਿਪੋਰਟ
ਜਦੋਂ ਅੰਮ੍ਰਿਤ ਦਿਆਲੀ ਨਾਮ ਦੇ ਇੱਕ ਵਿਅਕਤੀ ਨੇ ਹੜ੍ਹ ਦੇ ਪਾਣੀ ਵਿੱਚ ਇੱਕ ਇਨਸਾਨ ਦਾ ਹੱਥ ਦੇਖਿਆ ਤਾਂ ਉਸ ਨੂੰ ਲੱਗਿਆ ਕਿ ਉਹ ਉਸ ਦੇ ਛੋਟੇ ਭਾਈ ਰਾਜਕੁਮਾਰ ਦੇ ਹੱਥ ਵਰਗਾ ਹੈ। ਰਾਜਕੁਮਾਰ ਆਪਣੀ ਪਤਨੀ ਅਤੇ ਚਾਰ ਸਾਲ ਦੇ ਬੇਟੇ ਨਾਲ ਨੇਪਾਲ ਵਿੱਚ ਆਏ ਭਿਆਨਕ ਹੜ੍ਹ ਤੋਂ ਬਾਅਦ ਤੋਂ ਲਾਪਤਾ ਹਨ।
'ਦਿ ਕਾਠਮੰਡੂ ਪੋਸਟ' ਅਨੁਸਾਰ, ਅੰਮ੍ਰਿਤ ਦੇ ਭਤੀਜੇ ਅਵਿਨਾਸ਼ ਨੇ ਕੱਟੇ ਹੋਏ ਹੱਥ ਦੀ ਤਸਵੀਰ ਭੇਜਦਿਆਂ ਉਸ ਨੂੰ ਕਿਹਾ, "ਮੈਨੂੰ ਇੱਕ ਅਜਿਹਾ ਹੱਥ ਮਿਲਿਆ ਹੈ ਜੋ ਬਿਲਕੁਲ ਚਾਚਾ ਦੇ ਹੱਥ ਵਰਗਾ ਲੱਗਦਾ ਹੈ।"
ਅੰਮ੍ਰਿਤ ਲਈ ਇਹ ਖੋਜ ਉਮੀਦ ਅਤੇ ਡਰ ਦੋਵੇਂ ਲੈ ਕੇ ਆਈ। ਹੁਣ ਡੀ ਐੱਨ ਏ ਜਾਂਚ ਹੀ ਪਰਿਵਾਰ ਲਈ ਇਹ ਪਤਾ ਲਗਾਉਣ ਦਾ ਇੱਕੋ-ਇੱਕ ਰਸਤਾ ਹੈ ਕਿ ਬਰਾਮਦ ਹੋਏ ਲਾਸ਼ ਦੇ ਟੁਕੜੇ ਉਨ੍ਹਾਂ ਦੇ ਭਰਾ ਦੇ ਹਨ ਜਾਂ ਨਹੀਂ।
ਇਹ ਮਾਮਲਾ ਨੇਪਾਲ ਦੇ ਸਾਹਮਣੇ ਮੌਜੂਦ ਵੱਡੀ ਚੁਣੌਤੀ ਨੂੰ ਦਰਸਾਉਂਦਾ ਹੈ, ਜਿੱਥੇ ਅਧਿਕਾਰੀ 26 ਅਗਸਤ ਨੂੰ ਆਏ ਹੜ੍ਹ ਤੋਂ ਬਾਅਦ ਬਰਾਮਦ ਸੈਂਕੜੇ ਲਾਸ਼ਾਂ ਦੀ ਪਛਾਣ ਕਰਨ ਅਤੇ ਲਾਪਤਾ ਲੋਕਾਂ ਦੇ ਪਰਿਵਾਰਾਂ ਤੱਕ ਪਹੁੰਚਣ ਲਈ ਡੀ ਐੱਨ ਏ ਜਾਂਚ ਦਾ ਸਹਾਰਾ ਲੈ ਰਹੇ ਹਨ।
'ਦਿ ਕਾਠਮੰਡੂ ਪੋਸਟ' ਅਨੁਸਾਰ, ਪੁਲੀਸ ਹੁਣ ਤੱਕ 2,272 ਡੀ ਐੱਨ ਏ ਨਮੂਨੇ ਇਕੱਠੇ ਕਰ ਚੁੱਕੀ ਹੈ। ਇਨ੍ਹਾਂ ਵਿੱਚ 1,260 ਨਮੂਨੇ ਲਾਸ਼ਾਂ ਤੋਂ ਅਤੇ 1,012 ਨਮੂਨੇ ਪਰਿਵਾਰਕ ਮੈਂਬਰਾਂ ਤੋਂ ਲਏ ਗਏ ਹਨ, ਤਾਂ ਜੋ ਆਫ਼ਤ ਵਿੱਚ ਮਾਰੇ ਗਏ ਲੋਕਾਂ ਦੀ ਪਛਾਣ ਕੀਤੀ ਜਾ ਸਕੇ।
ਅਧਿਕਾਰੀਆਂ ਨੇ ਦੱਸਿਆ ਕਿ ਡੀ ਐੱਨ ਏ ਨਮੂਨੇ ਲੈਣ ਅਤੇ ਪਛਾਣ ਨਾਲ ਜੁੜੀਆਂ ਹੋਰ ਪ੍ਰਕਿਰਿਆਵਾਂ ਪੂਰੀਆਂ ਕਰਨ ਤੋਂ ਬਾਅਦ 1,030 ਲਾਸ਼ਾਂ ਨੂੰ ਦਫ਼ਨਾਇਆ ਜਾ ਚੁੱਕਾ ਹੈ। ਇਨ੍ਹਾਂ ਵਿੱਚ 222 ਔਰਤਾਂ ਦੀਆਂ, 355 ਪੁਰਸ਼ਾਂ ਦੀਆਂ ਅਤੇ 453 ਅਜਿਹੀਆਂ ਲਾਸ਼ਾਂ ਸ਼ਾਮਲ ਹਨ, ਜਿਨ੍ਹਾਂ ਦੀ ਲਿੰਗ ਪਛਾਣ ਨਹੀਂ ਹੋ ਸਕੀ।
ਹਾਲਾਂਕਿ ਅੰਮ੍ਰਿਤ ਦਿਆਲੀ ਵਰਗੇ ਪਰਿਵਾਰਾਂ ਲਈ ਪਛਾਣ ਦੀ ਇਹ ਪ੍ਰਕਿਰਿਆ ਸਿਰਫ਼ ਫਾਰੈਂਸਿਕ ਜਾਂਚ ਨਹੀਂ ਹੈ, ਸਗੋਂ ਇਹ ਕਈ ਦਿਨਾਂ ਤੋਂ ਜਾਰੀ ਅਨਿਸ਼ਚਿਤਤਾ ਨੂੰ ਖ਼ਤਮ ਕਰਨ ਅਤੇ ਆਪਣੇ ਜੀਆਂ ਦਾ ਅੰਤਿਮ ਸੰਸਕਾਰ ਕਰਨ ਦਾ ਰਸਤਾ ਵੀ ਹੈ।
