Israel-Lebanon:ਦੱਖਣੀ ਲੈਬਨਾਨ ’ਚ ਇਜ਼ਰਾਇਲੀ ਗੋਲੀਬਾਰੀ ਵਿੱਚ ਦੋ ਹਲਾਕ

ਦੱਖਣੀ ਲੈਬਨਾਨ ਵਿੱਚ ਇਰਾਨ ਹਮਾਇਤੀ ਹਿਜ਼ਬੁੱਲਾ ਅਤੇ ਇਜ਼ਰਾਇਲੀ ਫ਼ੌਜਾਂ ਦਰਮਿਆਨ ਲੰਘੇ ਐਤਵਾਰ ਤੋਂ ਜੰਗਬੰਦੀ ਵੱਡੇ ਪੱਧਰ ’ਤੇ ਲਾਗੂ ਰਹੀ ਹੈ, ਜੋ ਅਮਰੀਕਾ-ਇਰਾਨ ਟਕਰਾਅ ਕਾਰਨ ਭੜਕੀ ਇਸ ਜੰਗ ਵਿੱਚ ਹੁਣ ਤੱਕ ਦੀ ਸਭ ਤੋਂ ਲੰਮੀ ਸ਼ਾਂਤੀ ਹੈ। ਲੈਬਨਾਨ ਦੀ ਸਰਕਾਰੀ ਖ਼ਬਰ ਏਜੰਸੀ ਐੱਨ ਐੱਨ ਏ ਨੇ ਰਿਪੋਰਟ ਦਿੱਤੀ ਕਿ ਇਜ਼ਰਾਇਲੀ ਸੈਨਿਕਾਂ ਨੇ ਦੱਖਣੀ ਲੈਬਨਾਨ ਦੇ ਨਬਾਤੀਹ ਅਲ-ਫੌਕਾ ਦੇ ਅਲ-ਦੀਰ ਇਲਾਕੇ ਵਿੱਚ ਸੜਕ ਸਾਫ਼ ਕਰ ਰਹੇ ਬੁਲਡੋਜ਼ਰ ਨੇੜੇ ਮੌਜੂਦ ਲੋਕਾਂ ਦੇ ਸਮੂਹ ’ਤੇ ਗੋਲੀਬਾਰੀ ਕੀਤੀ। ਉੱਧਰ ਇਜ਼ਰਾਇਲੀ ਫ਼ੌਜ ਨੇ ਕਿਹਾ ਕਿ ਉਨ੍ਹਾਂ ਦੱਖਣ ਦੇ ਅਲੀ ਅਲ-ਤਾਹਰ ਪਹਾੜੀ ਖੇਤਰ ਵਿੱਚ ‘ਹਥਿਆਰਬੰਦ ਅਤਿਵਾਦੀਆਂ ’ਤੇ ਹਮਲਾ ਕੀਤਾ ਹੈ ਜੋ ਸੈਨਿਕਾਂ ਲਈ ਖ਼ਤਰਾ ਸਨ’। ਇਹ ਤੁਰੰਤ ਸਪੱਸ਼ਟ ਨਹੀਂ ਹੋ ਸਕਿਆ ਕਿ ਕੀ ਇਹ ਦੋਵੇਂ ਇੱਕੋ ਹੀ ਘਟਨਾਵਾਂ ਸਨ।

ਦੂਜੇ ਪਾਸੇ ਇਰਾਨ ਨੇ ਜ਼ੋਰ ਦੇ ਕੇ ਕਿਹਾ ਹੈ ਕਿ ਪਿਛਲੇ ਹਫ਼ਤੇ ਅਮਰੀਕਾ ਨਾਲ ਹੋਏ ਅੰਤਰਿਮ ਸਮਝੌਤੇ ਦੇ ਹਿੱਸੇ ਵਜੋਂ ਇਜ਼ਰਾਈਲ, ਲੈਬਨਾਨ ਵਿੱਚ ਗੋਲੀਬਾਰੀ ਬੰਦ ਕਰੇ। ਇਸ ਤਾਜ਼ਾ ਘਟਨਾ ਬਾਰੇ ਪੁੱਛੇ ਜਾਣ ’ਤੇ ਜਨੇਵਾ ਵਿੱਚ ਸੰਯੁਕਤ ਰਾਸ਼ਟਰ ਵਿੱਚ ਇਰਾਨ ਦੇ ਰਾਜਦੂਤ ਅਲੀ ਬਹਿਰੀਨੀ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਲੈਬਨਾਨ ਵਿੱਚ ਸਹਿਮਤੀ ਪੱਤਰ ਦੀ ਕਿਸੇ ਵੀ ਤਰ੍ਹਾਂ ਦੀ ਉਲੰਘਣਾ ਸ਼ਾਂਤੀ ਵਾਰਤਾ ਲਈ ਚੁਣੌਤੀਆਂ ਪੈਦਾ ਕਰੇਗੀ। ਉਨ੍ਹਾਂ ਕਿਹਾ, ‘‘ਲੈਬਨਾਨ ਇਸ ਸਮਝੌਤੇ ਦਾ ਅਟੁੱਟ ਹਿੱਸਾ ਹੈ ਅਤੇ ਲੈਬਨਾਨ ਵਿੱਚ ਜੋ ਕੁਝ ਵੀ ਹੁੰਦਾ ਹੈ ਉਹ ਪੂਰੀ ਪ੍ਰਕਿਰਿਆ ਨੂੰ ਪ੍ਰਭਾਵਿਤ ਕਰਦਾ ਹੈ। ਇਹ ਅਮਰੀਕਾ ਹੀ ਹੈ ਜਿਸ ਨੂੰ ਲੈਬਨਾਨ ’ਤੇ ਹਮਲੇ ਰੋਕਣ ਲਈ ਇਜ਼ਰਾਈਲ ਵਿਰੁੱਧ ਆਪਣੇ ਸਾਰੇ ਪ੍ਰਭਾਵ ਦੀ ਵਰਤੋਂ ਕਰਨੀ ਚਾਹੀਦੀ ਹੈ।’’