ਉੱਤਰੀ ਗਾਜ਼ਾ ਵਿੱਚ ਮਸਜਿਦ ਤੇ ਸਕੂਲ ’ਤੇ ਇਜ਼ਰਾਇਲੀ ਹਮਲੇ ’ਚ 24 ਹਲਾਕ

93 ਵਿਅਕਤੀ ਜ਼ਖ਼ਮੀ; ਇਜ਼ਰਾਈਲ ਨੇ ਮਸਜਿਦ ਤੇ ਸਕੂਲ ’ਚ ਹਮਾਸ ਦਾ ਕਮਾਂਡ ਤੇ ਕੰਟਰੋਲ ਸੈਂਟਰ ਹੋਣ ਦਾ ਕੀਤਾ ਦਾਅਵਾ, ਹਮਾਸ ਵੱਲੋਂ ਦੋਸ਼ਾਂ ਤੋਂ ਇਨਕਾਰ

Tribune News Service

12:30 PM Oct 06, 2024 IST

ਗਾਜ਼ਾ ਪੱਟੀ ਦੇ ਅਸ਼ਕੈਲੋਨ ’ਚ ਇਜ਼ਾਰਾਈਲ ਦੇ ਹਮਲਿਆਂ ਦੌਰਾਨ ਇਕ ਔਰਤ ਤੇ ਉਸ ਬੱਚੇ ਨੂੰ ਸੁਰੱਖਿਅਤ ਥਾ ਵੱਲ ਲਿਜਾਂਦੇ ਹੋਏ ਸੁਰੱਖਿਆ ਮੁਲਾਜ਼ਮ। ਫੋਟੋ: -ਏਪੀ/ਪੀਟੀਆਈ

ਡੀਰ ਅਲ-ਬਲਾਹ(ਗਾਜ਼ਾ ਪੱਟੀ)/ਕਾਹਿਰਾ, 6 ਅਕਤੂਬਰ

ਇਜ਼ਰਾਈਲ ਵੱਲੋਂ ਐਤਵਾਰ ਵੱਡੇ ਤੜਕੇ ਗਾਜ਼ਾ ਪੱਟੀ ਵਿਚ ਇਕ ਮਸਜਿਦ ਤੇ ਸਕੂਲ ’ਤੇ ਕੀਤੇ ਹਮਲੇ ਵਿਚ ਘੱਟੋ-ਘੱਟ 24 ਵਿਅਕਤੀਆਂ ਦੀ ਮੌਤ ਤੇ 93 ਹੋਰ ਜ਼ਖ਼ਮੀ ਹੋ ਗਏ। ਫ਼ਲਸਤੀਨ ਦੇ ਸਿਹਤ ਅਧਿਕਾਰੀਆਂ ਨੇ ਕਿਹਾ ਕਿ ਉੱਤਰੀ ਗਾਜ਼ਾ ਵਿਚ ਸ਼ਨਿੱਚਰਵਾਰ ਰਾਤ ਤੋਂ 20 ਹੋਰ ਵਿਅਕਤੀ ਮਾਰੇ ਗਏ ਹਨ। ਇਜ਼ਰਾਈਲ ਨੇ ਉੱਤਰੀ ਗਾਜ਼ਾ ਤੇ ਲਿਬਨਾਨ ਦੀ ਰਾਜਧਾਨੀ ਬੈਰੂਤ ਦੇ ਦੱਖਣੀ ਹਿੱਸੇ ਵਿਚ ਬੰਬਾਰੀ ਤੇਜ਼ ਕਰ ਦਿੱਤੀ ਹੈ। ਇਜ਼ਰਾਈਲ ਨੇ ਜਿਸ ਸ਼ੁਹਾਦਾ ਅਲ-ਅਕਸਾ ਮਸਜਿਦ ਤੇ ਇਬਨ ਰੁਸ਼ਦ ਸਕੂਲ ਨੂੰ ਨਿਸ਼ਾਨਾ ਬਣਾਇਆ। ਉਹ ਕੇਂਦਰੀ ਕਸਬੇ ਡੀਰ ਅਲ-ਬਲਾਹ ਵਿਚ ਮੁੱਖ ਹਸਪਤਾਲ ਦੇ ਬਿਲਕੁਲ ਨਾਲ ਹਨ। ਇਨ੍ਹਾਂ ਵਿਚ ਘਰੋਂ ਬੇਘਰ ਲੋਕਾਂ ਨੇ ਪਨਾਹ ਲਈ ਹੋਈ ਸੀ। ਇਜ਼ਰਾਈਲ ਨੇ ਦਾਅਵਾ ਕੀਤਾ ਕਿ ਮਸਜਿਦ ਤੇ ਸਕੂਲ ਵਿਚ ਹਮਾਸ ਦਾ ਕਮਾਂਡ ਤੇ ਕੰਟਰੋਲ ਸੈਂਟਰ ਮੌਜੂਦ ਸੀ। ਹਮਾਸ ਨੇ ਹਾਲਾਂਕਿ ਇਨ੍ਹਾਂ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ। -ਏਪੀ/ਰਾਇਟਰਜ਼