Floating Island: ਕੈਨੇਡਾ ਦੀ ਝੀਲ ’ਚ ਤੈਰਦਾ ਟਾਪੂ 30 ਕਿਲੋਮੀਟਰ ਦੂਰ ਪੁੱਜਾ

21 ਜੁਲਾਈ ਨੂੰ ਯੂਰੋਪੀਅਨ ਸਪੇਸ ਏਜੰਸੀ ਦੇ ਸੈਂਟੀਨੇਲ-2 ਸੈਟੇਲਾਈਟ ਨੇ ਇਸ ਨੂੰ ਪਹਿਲੀ ਵਾਰ ਪਾਣੀ ਵਿੱਚ ਹਰੇ ਧੱਬੇ ਵਾਂਗ ਦਰਜ ਕੀਤਾ ਸੀ। ਉਸ ਵੇਲੇ ਇਹ ਡਬਲਿਊ ਏ ਸੀ ਬੈਨੇਟ ਡੈਮ ਤੋਂ ਤਕਰੀਬਨ 100 ਕਿਲੋਮੀਟਰ ਪੱਛਮ ਵੱਲ ਸੀ। ਬਾਅਦ ਵਿੱਚ ਇਹ ਨਜ਼ਰੋਂ ਓਹਲੇ ਹੋ ਗਿਆ। 31 ਅਗਸਤ ਨੂੰ ਇਹ ਓਸਪਿਕਾ ਦਰਿਆ ਨੇੜੇ ਮੁੜ ਦਿਖਾਈ ਦਿੱਤਾ। ਇਸ ਦੀਆਂ ਤਸਵੀਰਾਂ ਅਤੇ ਵੀਡੀਓ ਮੈਕੈਂਜ਼ੀ ਖੇਤਰ ਦੇ ਵਸਨੀਕ ਅਤੇ ਕਿਸ਼ਤੀ ਚਾਲਕ ਰੌਕੀ ਐਵਰੀ ਨੇ ਸੋਸ਼ਲ ਮੀਡੀਆ ’ਤੇ ਸਾਂਝੀਆਂ ਕੀਤੀਆਂ ਹਨ। ਵੀਡੀਓ ਵਿੱਚ ਕਿਸ਼ਤੀ ਦੀਆਂ ਲਹਿਰਾਂ ਨਾਲ ਇਹ ‘ਟਾਪੂ’ ਪਾਣੀ ਉੱਤੇ ਉੱਪਰ-ਹੇਠਾਂ ਹੁੰਦਾ ਦਿਖਾਈ ਦਿੰਦਾ ਹੈ।

ਬੀਸੀ ਹਾਈਡਰੋ ਦੇ ਬੌਬ ਗੇਮਰ ਮੁਤਾਬਕ ਸੰਭਾਵਨਾ ਹੈ ਕਿ ਇਹ ਸਮੱਗਰੀ ਕਈ ਸਾਲਾਂ ਤੋਂ ਕਿਸੇ ਸੁਰੱਖਿਅਤ ਖਾੜੀ ਵਿੱਚ ਕੰਢੇ ਨਾਲ ਇਕੱਠੀ ਹੋ ਰਹੀ ਸੀ। ਇਸ ਸਾਲ ਵਿਲਿਸਟਨ ਜਲ ਭੰਡਾਰ ਵਿੱਚ ਪਾਣੀ 14 ਸਾਲਾਂ ਵਿੱਚ ਪਹਿਲੀ ਵਾਰ ਪੂਰੀ ਸਮਰੱਥਾ ਤੱਕ ਪਹੁੰਚਿਆ। ਵਧੇ ਪਾਣੀ ਨੇ ਸ਼ਾਇਦ ਇਸ ਭਾਰੀ ਢੇਰ ਨੂੰ ਕੰਢੇ ਤੋਂ ਤੋੜ ਕੇ ਪਾਣੀ ਵਿੱਚ ਛੱਡ ਦਿੱਤਾ। ਤਕਰੀਬਨ 140 ਮੀਟਰ ਲੰਮੇ ਅਤੇ 70 ਮੀਟਰ ਚੌੜੇ ਇਸ ਤੈਰਦੇ ਢਾਂਚੇ ਬਾਰੇ ਹੁਣ ਸੁਰੱਖਿਆ ਚਿੰਤਾ ਵਧ ਗਈ ਹੈ। ਬੀ ਸੀ ਹਾਈਡਰੋ ਅਨੁਸਾਰ ਤੇਜ਼ ਹਵਾ, ਵੱਡੀਆਂ ਲਹਿਰਾਂ ਜਾਂ ਕਿਸੇ ਕਿਸ਼ਤੀ ਦੀ ਟੱਕਰ ਇਸ ਨੂੰ ਟੁਕੜਿਆਂ ਵਿੱਚ ਵੰਡ ਸਕਦੀ ਹੈ। ਇਸ ਲਈ ਉਸ ਨੇ ਲੋਕਾਂ ਨੂੰ ਸਲਾਹ ਦਿੱਤੀ ਹੈ ਕਿ ਉਹ ਅਜੀਬ ਤੈਰਦੇ ਟਾਪੂ ਨੂੰ ਦੂਰੋਂ ਦੇਖਣ ਪਰ ਕਿਸ਼ਤੀ ਲੈ ਕੇ ਇਸ ਦੇ ਨੇੜੇ ਜਾਣ ਜਾਂ ਇਸ ਉੱਤੇ ਚੜ੍ਹ ਕੇ ਇਸ ਦਾ ਭੇਤ ਜਾਣਨ ਦੀ ਕੋਸ਼ਿਸ਼ ਨਾ ਕਰਨ।