ਕਾਬੁਲ, 13 ਜੁਲਾਈ
ਊੱਤਰੀ ਅਫ਼ਗ਼ਾਨਿਸਤਾਨ ਦੇ ਸਮਾਂਗਨ ਸੂਬੇ ਵਿੱਚ ਕਾਰ ਵਿੱਚ ਸਵਾਰ ਖੁਦਕੁਸ਼ ਬੰਬਾਰ ਨੇ ਧਮਾਕਾ ਕਰ ਦਿੱਤਾ। ਧਮਾਕੇ ਵਿੱਚ ਕੁਝ ਜਾਨਾਂ ਜਾਣ ਦੀਆਂ ਰਿਪੋਰਟਾਂ ਹਨ, ਪਰ ਅਸਲ ਗਿਣਤੀ ਬਾਰੇ ਅਜੇ ਕੁਝ ਵੀ ਸਪਸ਼ਟ ਨਹੀਂ। ਧਮਾਕੇ ਤੋਂ ਫੌਰੀ ਮਗਰੋਂ ਅਫ਼ਗ਼ਾਨ ਬਲਾਂ ਤੇ ਹਮਲਾਵਰਾਂ ਵਿਚਾਲੇ ਦੁਵੱਲੀ ਫਾਇਰਿੰਗ ਵੀ ਹੋਈ। ਤਾਲਿਬਾਨ ਨੇ ਹਮਲੇ ਦੀ ਜ਼ਿੰਮੇਵਾਰੀ ਲਈ ਹੈ। ਸੂਬਾਈ ਹਸਪਤਾਲ ਦੇ ਮੁਖੀ ਅਬਦੁਲ ਖ਼ਲੀਲ ਮੁਸਾਦਿਕ ਨੇ ਕਿਹਾ ਕਿ ਧਮਾਕੇ ਕਰਕੇ ਘੱਟੋ ਘੱਟ 43 ਵਿਅਕਤੀ ਜ਼ਖ਼ਮੀ ਹੋ ਗਏ, ਜਿਨ੍ਹਾਂ ਵਿੱਚੋਂ ਵੱਡੀ ਗਿਣਤੀ ਆਮ ਨਾਗਰਿਕ ਤੇ ਬੱਚੇ ਹਨ। ਸੂਬਾਈ ਕੌਂਸਲ ਦੇ ਉਪ ਮੁਖੀ ਮੁਹੰਮਦ ਹਾਸ਼ਿਮ ਸਰਵਾਰੀ ਨੇ ਕਿਹਾ ਕਿ ਫਿਦਾਈਨ ਦਾ ਮੁੱਖ ਨਿਸ਼ਾਨਾ ਸੂਬਾਈ ਰਾਜਧਾਨੀ ਐਬਕ ਵਿਚਲਾ ਇੰਟੈਲੀਜੈਂਸ ਸੇਵਾ ਵਿਭਾਗ ਸੀ। ਉਨ੍ਹਾਂ ਕਿਹਾ ਕਿ ਧਮਾਕਾ ਇੰਨਾ ਜ਼ੋਰਦਾਰ ਸੀ ਕਿ ਇਸ ਦੀ ਗੂੰਜ ਕਈ ਮੀਲਾਂ ਤਕ ਸੁਣਾਈ ਦਿੱਤੀ ਤੇ ਇਸ ਨਾਲ ਕਈ ਇਮਾਰਤਾਂ ਤੇ ਘਰਾਂ ਨੂੰ ਵੀ ਨੁਕਸਾਨ ਪੁੱਜਾ।