European union: Iceland ਵਿੱਚ ਮੈਂਬਰਸ਼ਿਪ ਬਾਰੇ ਰਾਇਸ਼ੁਮਾਰੀ ਲਈ ਵੋਟਿੰਗ

ਆਈਸਲੈਂਡ ਦੇ ਲੋਕਾਂ ਨੇ ਅੱਜ ਇਸ ਗੱਲ ’ਤੇ ਵੋਟ ਪਾਈ ਕਿ ਕੀ ਮੁਲਕ ਨੂੰ ਯੂਰੋਪੀਅਨ ਯੂਨੀਅਨ ਨਾਲ ਮੈਂਬਰਸ਼ਿਪ ਬਾਰੇ ਗੱਲਬਾਤ ਮੁੜ ਸ਼ੁਰੂ ਕਰਨੀ ਚਾਹੀਦੀ ਹੈ ਜਾਂ ਨਹੀਂ। ਰਹਿਣ-ਸਹਿਣ ਦੇ ਖ਼ਰਚੇ, ਸੁਰੱਖਿਆ, ਪ੍ਰਭੂਸੱਤਾ ਅਤੇ ਮੱਛੀ ਫੜਨ ਵਾਲੇ ਪਾਣੀਆਂ ’ਤੇ ਕੰਟਰੋਲ ਦੇ ਮੁੱਦਿਆਂ ਉੱਤੇ ਚੱਲੀ ਮੁਹਿੰਮ ਕਾਰਨ ਦੇਸ਼ ਦੇ ਲੋਕ ਦੋ ਹਿੱਸਿਆਂ ਵਿੱਚ ਵੰਡੇ ਨਜ਼ਰ ਆਏ। ਇਹ ਮੁਕਾਬਲਾ ਐਨਾ ਸਖ਼ਤ ਹੈ ਕਿ ਅੰਦਾਜ਼ਾ ਲਗਾਉਣਾ ਔਖਾ ਹੈ। ਸ਼ੁੱਕਰਵਾਰ ਨੂੰ ਆਏ ਇੱਕ ਸਰਵੇਖਣ ਮੁਤਾਬਕ, ਮਾਮੂਲੀ ਬਹੁਮਤ ਨੇ ਸਰਕਾਰ ਦੀ ਉਸ ਤਜਵੀਜ਼ ਦਾ ਵਿਰੋਧ ਕੀਤਾ ਜਿਸ ਵਿੱਚ ਗੱਲਬਾਤ ਮੁੜ ਸ਼ੁਰੂ ਕਰਨ ਦੀ ਮੰਗ ਕੀਤੀ ਗਈ ਹੈ। ਇਹ ਪਹਿਲੇ ਸਰਵੇਖਣਾਂ ਤੋਂ ਥੋੜਾ ਉਲਟ ਹੈ, ਜਿਨ੍ਹਾਂ ਵਿੱਚ ਗੱਲਬਾਤ ਦੇ ਸਮਰਥਕਾਂ ਦੀ ਮਾਮੂਲੀ ਲੀਡ ਦਿਖਾਈ ਗਈ ਸੀ।

ਗੱਲਬਾਤ ਦੇ ਹੱਕ ਵਿੱਚ ‘ਹਾਂ’ ਕਹਿਣ ਵਾਲੇ ਪ੍ਰਚਾਰਕਾਂ ਦਾ ਕਹਿਣਾ ਹੈ ਕਿ ਯੂਨੀਅਨ ਵਿੱਚ ਸ਼ਾਮਲ ਹੋਣ ਨਾਲ ਉੱਚ ਵਿਆਜ ਦਰਾਂ ਤੋਂ ਰਾਹਤ ਮਿਲ ਸਕਦੀ ਹੈ ਅਤੇ ਯੂਕਰੇਨ ਦੀ ਜੰਗ ਤੇ ਅਮਰੀਕੀ ਰਾਸ਼ਟਰਪਤੀ ਡੋਨਲਡ ਟਰੰਪ ਵੱਲੋਂ ਆਰਕਟਿਕ ਦੇ ਇੱਕ ਹੋਰ ਟਾਪੂ ਗਰੀਨਲੈਂਡ ਬਾਰੇ ਦਿੱਤੀਆਂ ਗਈਆਂ ਧਮਕੀਆਂ ਕਾਰਨ ਅਸਥਿਰ ਹੋਏ ਸੰਸਾਰ ਵਿੱਚ ਵਧੇਰੇ ਸੁਰੱਖਿਆ ਮਿਲ ਸਕਦੀ ਹੈ। ‘ਨਹੀਂ’ ਕਹਿਣ ਵਾਲੇ ਪ੍ਰਚਾਰਕਾਂ ਦਾ ਤਰਕ ਹੈ ਕਿ ਯੂਰੋਪੀਅਨ ਯੂਨੀਅਨ ਦੀ ਮੈਂਬਰਸ਼ਿਪ ਟਾਪੂ ਦੀ ਪ੍ਰਭੂਸੱਤਾ ਅਤੇ ਮੱਛੀ ਫੜਨ ਵਾਲੇ ਪਾਣੀਆਂ ਲਈ ਖ਼ਤਰਾ ਬਣ ਸਕਦੀ ਹੈ। ਮੁਲਕ ਦੀ ਪ੍ਰਧਾਨ ਮੰਤਰੀ ਕ੍ਰਿਸਟਰੂਨ ਫਰੋਸਟਾਡੋਟਿਰ ਨੇ ਅੱਜ ਰਾਜਧਾਨੀ ਵਿੱਚ ਆਪਣੀ ਵੋਟ ਪਾਉਣ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਰਾਇਸ਼ੁਮਾਰੀ ਦੀ ਇਸ ਮੁਹਿੰਮ ਨੇ ਦੁਨੀਆ ਵਿੱਚ ਆਈਸਲੈਂਡ ਦੀ ਸਥਿਤੀ ਬਾਰੇ ਬਹਿਸ ਨੂੰ ਛੇੜ ਦਿੱਤਾ ਹੈ।