ਪੇਈਚਿੰਗ, 3 ਜੁਲਾਈ
ਦੱਖਣੀ ਚੀਨ ਦੇ ਗੁਆਂਗਡੌਂਗ ਸੂਬੇ ਦੇ ਤੱਟ ’ਤੇ ਚਾਬਾ ਤੂਫ਼ਾਨ ਦੀ ਲਪੇਟ ’ਚ ਆਉਣ ਤੋਂ ਬਾਅਦ ਇੱਕ ਕਰੇਨ ਡੁੱਬ ਗਈ ਅਤੇ ਉਸ ’ਤੇ ਸਵਾਰ ਘੱਟ ਤੋਂ ਘੱਟ 27 ਵਿਅਕਤੀ ਲਾਪਤਾ ਹੋ ਗਏ ਹਨ। ਸੂਬਾਈ ਸਮੁੰਦਰੀ ਖੋਜ ਦੇ ਬਚਾਅ ਕੇਂਦਰ ਨੇ ਅੱਜ ਇਹ ਜਾਣਕਾਰੀ ਦਿੱਤੀ। ਬਚਾਅ ਲਈ ਭੇਜੇ ਗਏ 38 ਜਹਾਜ਼ਾਂ ਨੇ ਲਾਪਤਾ ਲੋਕਾਂ ਦੀ ਭਾਲ ਲਈ 14 ਚੱਕਰ ਲਾਏ ਹਨ। ਯਾਂਗਜਿਆਂਗ ਸ਼ਹਿਰ ਕੋਲ ਚਾਬਾ ਤੂਫ਼ਾਨ ਤੋਂ ਬਚਾਅ ਕਰਦੇ ਸਮੇਂ ਇਸ ਦੇ ਲੰਗਰ ਦੀ ਚੇਨ ਟੁੱਟ ਗਈ ਸੀ ਅਤੇ ਨਿਗਰਾਨੀ ਪ੍ਰਣਾਲੀ ਰਾਹੀਂ ਕਰੇਨ ਖਤਰੇ ’ਚ ਮਹਿਸੂਸ ਕੀਤੀ ਗਈ ਸੀ। ਇਸ ਮਗਰੋਂ ਬੀਤੇ ਦਿਨ ਕਰੇਨ ਪਾਣੀ ’ਚ ਡੁੱਬ ਗਈ। ਸਰਕਾਰੀ ਨਿਊਜ਼ ਏਜੰਸੀ ਸ਼ਿਨਹੂਆ ਨੇ ਬਚਾਅ ਕੇਂਦਰ ਦੇ ਹਵਾਲੇ ਨਾਲ ਕਿਹਾ ਕਿ ਹੁਣ ਤੱਕ ਤਿੰਨ ਲੋਕਾਂ ਨੂੰ ਬਚਾਇਆ ਗਿਆ ਹੈ ਤੇ 27 ਹੋਰ ਲਾਪਤਾ ਹਨ। -ਪੀਟੀਆਈ