ਇਕੁਆਡੋਰ ਤੇ ਪੇਰੂ ਵਿੱਚ ਭੂਚਾਲ ਕਾਰਨ 14 ਮੌਤਾਂ; 380 ਜ਼ਖ਼ਮੀ

ਕੁਇਟੋ (ਇਕੁਆਡੋਰ), 19 ਮਾਰਚ

ਦੱਖਣੀ ਇਕੁਆਡੋਰ ਅਤੇ ਉੱਤਰੀ ਪੇਰੂ ਵਿੱਚ ਸ਼ਨਿਚਰਵਾਰ ਨੂੰ ਆਏ ਜ਼ਬਰਦਸਤ ਭੂਚਾਲ ਵਿੱਚ ਘੱਟੋ-ਘੱਟ 14 ਲੋਕਾਂ ਦੀ ਮੌਤ ਹੋ ਗਈ ਜਦਕਿ 380 ਜ਼ਖ਼ਮੀ ਹੋਏ ਹਨ। ਭੂਚਾਲ ਕਾਰਨ ਕਈ ਲੋਕ ਮਲਬੇ ਹੇਠਾਂ ਦੱਬ ਗਏ ਹਨ, ਜਿਨ੍ਹਾਂ ਨੂੰ ਬਚਾਉਣ ਲਈ ਰਾਹਤ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ ਗਏ ਹਨ। ਭੂਚਾਲ ਕਾਰਨ ਕਈ ਇਮਾਰਤਾਂ ਨੂੰ ਵੀ ਨੁਕਸਾਨ ਪੁੱਜਿਆ ਹੈ। ‘ਅਮਰੀਕੀ ਭੂ-ਵਿਗਿਆਨ ਸਰਵੇਖਣ’ ਨੇ ਦੱਸਿਆ ਕਿ ਭੂਚਾਲ ਦੀ ਤੀਬਰਤਾ 6.8 ਮਾਪੀ ਗਈ ਹੈ। ਭੂਚਾਲ ਦਾ ਕੇਂਦਰ ਇਕੁਆਡੋਰ ਦੇ ਦੂਜੇ ਸਭ ਤੋਂ ਵੱਡੇ ਸ਼ਹਿਰ ਗੁਆਯਾਕਿਲ ਤੋਂ ਲਗਪਗ 50 ਮੀਲ (80 ਕਿਲੋਮੀਟਰ) ਦੱਖਣ ਵਿਚ ਸੀ। ਅਧਿਕਾਰੀਆਂ ਨੇ ਦੱਸਿਆ ਕਿ ਭੂਚਾਲ ਕਾਰਨ ਪੇਰੂ ਵਿੱਚ ਇੱਕ ਵਿਅਕਤੀ ਦੀ ਮੌਤ ਹੋਈ ਜਦਕਿ ਇਕੁਆਡੋਰ ਵਿੱਚ 13 ਵਿਅਕਤੀ ਮਾਰੇ ਗਏ। ਉਨ੍ਹਾਂ ਕਿਹਾ ਕਿ 380 ਹੋਰ ਜ਼ਖਮੀ ਹੋਏ ਹਨ। ਲਾਸੋ ਦਫ਼ਤਰ ਨੇ ਇਕ ਬਿਆਨ ਵਿਚ ਕਿਹਾ ਕਿ ਭੂਚਾਲ ਕਾਰਨ 11 ਲੋਕਾਂ ਦੀ ਮੌਤ ਤੱਟਵਰਤੀ ਰਾਜ ਐਲ ਓਰੋ ਵਿਚ ਅਤੇ ਦੋ ਦੀ ਮੌਤ ਪਹਾੜੀ ਰਾਜ ਅਜੁਏ ਵਿੱਚ ਹੋਈ। ਪੇਰੂ ਦੇ ਪ੍ਰਧਾਨ ਮੰਤਰੀ ਅਲਬਰਟੋ ਓਟਾਰੋਲਾ ਨੇ ਕਿਹਾ ਕਿ ਇਕਵਾਡੋਰ ਦੀ ਸਰਹੱਦ ’ਤੇ ਟੁੰਬੇਸ ਖੇਤਰ ਵਿਚ ਇਕ ਘਰ ਢਹਿਣ ਕਾਰਨ ਸਿਰ ’ਤੇ ਸੱਟ ਲੱਗਣ ਕਾਰਨ ਚਾਰ ਵਰ੍ਹਿਆਂ ਦੀ ਬੱਚੀ ਦੀ ਮੌਤ ਹੋ ਗਈ। -ਏਪੀ