ਸੰਜੇ ਲੀਲਾ ਭੰਸਾਲੀ ਦੀ ਫ਼ਿਲਮ ’ਚ ਸਾਰਾ ਅਰਜੁਨ ਬਣੇਗੀ ‘ਮਧੂਬਾਲਾ’
‘ਡਾਰਲਿੰਗਜ਼’ ਫੇਮ ਜਸਮੀਤ ਰੀਨ ਕਰਨਗੇ ਨਿਰਦੇਸ਼ਨ
ਬਾਲੀਵੁੱਡ ਦੀ ਦਿੱਗਜ ਅਦਾਕਾਰਾ ਮਧੂਬਾਲਾ ਦੀ ਜ਼ਿੰਦਗੀ ’ਤੇ ਬਣਨ ਵਾਲੀ ਫ਼ਿਲਮ ਨੂੰ ਲੈ ਕੇ ਚੱਲ ਰਹੀਆਂ ਅਟਕਲਾਂ ਹੁਣ ਖ਼ਤਮ ਹੋ ਗਈਆਂ ਹਨ। ਇਹ ਪੁਸ਼ਟੀ ਹੋ ਗਈ ਹੈ ਕਿ ‘ਧੁਰੰਧਰ’ ਫੇਮ ਅਦਾਕਾਰਾ ਸਾਰਾ ਅਰਜੁਨ ਇਸ ਬਾਇਓਪਿਕ ਵਿੱਚ ਮੁੱਖ ਭੂਮਿਕਾ ਨਿਭਾਏਗੀ। ਇਸ ਫ਼ਿਲਮ ਦਾ ਨਿਰਮਾਣ ਮਸ਼ਹੂਰ ਫ਼ਿਲਮਸਾਜ਼ ਸੰਜੇ ਲੀਲਾ ਭੰਸਾਲੀ ਕਰ ਰਹੇ ਹਨ ਅਤੇ ਇਸ ਦਾ ਨਿਰਦੇਸ਼ਨ ਜਸਮੀਤ ਕੇ. ਰੀਨ (ਜਿਨ੍ਹਾਂ ਨੇ ਆਲੀਆ ਭੱਟ ਨਾਲ ‘ਡਾਰਲਿੰਗਜ਼’ ਬਣਾਈ ਸੀ) ਵੱਲੋਂ ਕੀਤਾ ਜਾਵੇਗਾ।
ਸੂਤਰਾਂ ਅਨੁਸਾਰ, ਕਈ ਨੌਜਵਾਨ ਅਦਾਕਾਰਾਵਾਂ ਦੇ ਨਾਮ ’ਤੇ ਵਿਚਾਰ ਕਰਨ ਤੋਂ ਬਾਅਦ ਭੰਸਾਲੀ ਨੇ ਸਾਰਾ ਅਰਜੁਨ ਦੇ ਨਾਮ ’ਤੇ ਮੋਹਰ ਲਗਾਈ। ਭੰਸਾਲੀ ਦਾ ਮੰਨਣਾ ਹੈ ਕਿ ਸਾਰਾ ਵਿੱਚ ਉਹ ਖ਼ਾਸ ਖਿੱਚ, ਗੰਭੀਰਤਾ ਅਤੇ ਮਧੂਬਾਲਾ ਵਰਗੀ ਨਜ਼ਾਕਤ ਹੈ ਜੋ ਇਸ ਕਿਰਦਾਰ ਲਈ ਬੇਹੱਦ ਜ਼ਰੂਰੀ ਹੈ।
ਇਸ ਫ਼ਿਲਮ ਦਾ ਮੁੱਖ ਮਕਸਦ ਅੱਜ ਦੀ ਨਵੀਂ ਪੀੜ੍ਹੀ ਨੂੰ ਉਸ ਮਹਾਨ ਅਦਾਕਾਰਾ ਨਾਲ ਜਾਣੂ ਕਰਵਾਉਣਾ ਹੈ, ਜਿਸ ਨੇ ਮਹਿਜ਼ 36 ਸਾਲ ਦੀ ਉਮਰ ਵਿੱਚ ਦੁਨੀਆ ਨੂੰ ਅਲਵਿਦਾ ਕਹਿ ਦਿੱਤਾ ਸੀ, ਪਰ ਸਿਨੇਮਾ ’ਤੇ ਆਪਣੀ ਅਮਿੱਟ ਛਾਪ ਛੱਡੀ।
