PPF Account Investment: ਪੀਪੀਐੱਫ ਸਕੀਮ ’ਚੋਂ ਹਰ ਮਹੀਨੇ 61 ਹਜ਼ਾਰ ਰੁਪਏ ਦੀ ਕਮਾਈ, ਜਾਣੋਂ ਕਿਵੇਂ
15+5+5 ਫਾਰਮੂਲੇ ਨਾਲ ਤਿਆਰ ਹੋਵੇਗਾ ₹1.03 ਕਰੋੜ ਦਾ ਫੰਡ
ਸਰਕਾਰ ਨੇ ਚਾਲੂ ਵਿੱਤੀ ਵਰ੍ਹੇ ਦੀ ਦੂਜੀ ਤਿਮਾਹੀ ਲਈ ਛੋਟੀਆਂ ਬੱਚਤਾਂ ਸਕੀਮਾਂ ਦੀਆਂ ਵਿਆਜ ਦਰਾਂ ਵਿੱਚ ਕੋਈ ਬਦਲਾਅ ਨਹੀਂ ਕੀਤਾ ਹੈ, ਜਿਸ ਨਾਲ ਪਬਲਿਕ ਪਰੌਵੀਡੈਂਟ ਫੰਡ (PPF) ਨਿਵੇਸ਼ਕਾਂ ਲਈ ਇੱਕ ਭਰੋਸੇਯੋਗ ਬਦਲ ਬਣਿਆ ਹੋਇਆ ਹੈ।
ਕੇਂਦਰ ਸਰਕਾਰ ਵਲੋਂ ਵਿੱਤੀ ਵਰ੍ਹੇ 2026-27 ਦੀ ਜੁਲਾਈ-ਸਤੰਬਰ ਤਿਮਾਹੀ ਲਈ ਛੋਟੀਆਂ ਬੱਚਤਾਂ ਯੋਜਨਾਵਾਂ ਦੀਆਂ ਵਿਆਜ ਦਰਾਂ ਸਥਿਰ ਰੱਖੀਆਂ ਗਈਆਂ ਹਨ। ਅਜਿਹੇ ਸਮੇਂ ਵਿੱਚ ਜੇਕਰ ਤੁਸੀਂ ਆਪਣੀ ਰਿਟਾਇਰਮੈਂਟ ਲਈ ਇੱਕ ਸੁਰੱਖਿਅਤ ਅਤੇ ਵੱਡਾ ਫੰਡ ਤਿਆਰ ਕਰਨਾ ਚਾਹੁੰਦੇ ਹੋ, ਤਾਂ ਪਬਲਿਕ ਪਰੌਵੀਡੈਂਟ ਫੰਡ (PPF) ਇੱਕ ਵਧੀਆ ਸਾਧਨ ਸਾਬਤ ਹੋ ਸਕਦਾ ਹੈ। 7.1 ਫੀਸਦੀ ਦੀ ਸਲਾਨਾ ਗਾਰੰਟੀਸ਼ੁਦਾ ਵਿਆਜ ਦਰ ਅਤੇ ਕੰਪਾਊਂਡਿੰਗ ਵਿਆਜ ਦੀ ਤਾਕਤ ਨਾਲ, ਤੁਸੀਂ 15+5+5 ਦੀ ਖਾਸ ਰਣਨੀਤੀ ਅਪਣਾ ਕੇ 25 ਸਾਲਾਂ ਵਿੱਚ 1.03 ਕਰੋੜ ਰੁਪਏ ਤੱਕ ਦਾ ਫੰਡ ਖੜ੍ਹਾ ਕਰ ਸਕਦੇ ਹੋ। ਇਸ ਤਿਆਰ ਫੰਡ ਤੋਂ ਬਾਅਦ ਵਿੱਚ ਹਰ ਮਹੀਨੇ ਲਗਭਗ 61,000 ਰੁਪਏ ਦੀ ਪੈਨਸ਼ਨ ਜਾਂ ਨਿਯਮਤ ਆਮਦਨ ਪ੍ਰਾਪਤ ਕੀਤੀ ਜਾ ਸਕਦੀ ਹੈ।
ਕੀ ਹੈ ਪੀਪੀਐੱਫ ਦਾ 15+5+5 ਫਾਰਮੂਲਾ?
ਪੀਪੀਐੱਫ ਖਾਤੇ ਦੀ ਮੂਲ ਮਿਆਦ (ਲੌਕ-ਇਨ ਪੀਰੀਅਡ) 15 ਸਾਲ ਦੀ ਹੁੰਦੀ ਹੈ। ਇਸ ਮਿਆਦ ਦੇ ਪੂਰੇ ਹੋਣ ਤੋਂ ਬਾਅਦ ਨਿਵੇਸ਼ਕ ਕੋਲ ਖਾਤਾ ਬੰਦ ਕਰਕੇ ਪੂਰਾ ਪੈਸਾ ਕੱਢਵਾਉਣ ਜਾਂ ਫਿਰ 5-5 ਸਾਲਾਂ ਦੇ ਬਲਾਕਾਂ ਵਿੱਚ ਇਸ ਦਾ ਵਿਸਥਾਰ ਕਰਨ ਦਾ ਵਿਕਲਪ ਹੁੰਦਾ ਹੈ।
15+5+5 ਫਾਰਮੂਲੇ ਦੇ ਤਹਿਤ, ਤੁਸੀਂ 15 ਸਾਲਾਂ ਦੇ ਮੂਲ ਕਾਰਜਕਾਲ ਤੋਂ ਬਾਅਦ ਖਾਤੇ ਨੂੰ 5-5 ਸਾਲਾਂ ਲਈ ਦੋ ਵਾਰ ਅੱਗੇ ਵਧਾਉਂਦੇ ਹੋ, ਜਿਸ ਨਾਲ ਕੁੱਲ ਨਿਵੇਸ਼ ਦਾ ਸਮਾਂ 25 ਸਾਲ ਹੋ ਜਾਂਦਾ ਹੈ। ਜੇਕਰ ਤੁਸੀਂ ਇਸ 25 ਸਾਲਾਂ ਦੌਰਾਨ ਹਰ ਸਾਲ ਅਧਿਕਤਮ 1.5 ਲੱਖ ਰੁਪਏ (ਯਾਨੀ 37.5 ਲੱਖ ਰੁਪਏ ਕੁੱਲ) ਨਿਵੇਸ਼ ਕਰਦੇ ਰਹਿੰਦੇ ਹੋ, ਤਾਂ ਕੰਪਾਊਂਡਿੰਗ ਦੇ ਪ੍ਰਭਾਵ ਨਾਲ 65.58 ਲੱਖ ਰੁਪਏ ਸਿਰਫ਼ ਵਿਆਜ ਦੇ ਰੂਪ ਵਿੱਚ ਜੁੜ ਜਾਂਦੇ ਹਨ। ਇਸ ਨਾਲ 25 ਸਾਲਾਂ ਬਾਅਦ ਤੁਹਾਡਾ ਕੁੱਲ ਫੰਡ 1.03 ਕਰੋੜ ਰੁਪਏ ਹੋ ਜਾਂਦਾ ਹੈ।
61,000 ਰੁਪਏ ਦੀ ਮਹੀਨਾਵਾਰ ਆਮਦਨ ਦਾ ਗਣਿਤ
25 ਸਾਲਾਂ ਵਿੱਚ 1.03 ਕਰੋੜ ਰੁਪਏ ਦਾ ਫੰਡ ਬਣਨ ਤੋਂ ਬਾਅਦ, ਤੁਸੀਂ ਇਸ ਰਕਮ ਨੂੰ ਪੀਪੀਐੱਫ ਖਾਤੇ ਵਿੱਚ ਹੀ ਬਣਾਏ ਰੱਖ ਸਕਦੇ ਹੋ। 7.1 ਫੀਸਦੀ ਸਲਾਨਾ ਵਿਆਜ ਦਰ ਦੇ ਹਿਸਾਬ ਨਾਲ, 1.03 ਕਰੋੜ ਰੁਪਏ ਦੀ ਰਾਸ਼ੀ ਉੱਤੇ ਹਰ ਸਾਲ ਲਗਭਗ 7.31 ਲੱਖ ਰੁਪਏ ਦਾ ਵਿਆਜ ਬਣੇਗਾ। ਜੇਕਰ ਇਸ ਸਲਾਨਾ ਵਿਆਜ ਨੂੰ 12 ਮਹੀਨਿਆਂ ਵਿੱਚ ਵੰਡਿਆ ਜਾਵੇ, ਤਾਂ ਹਰ ਮਹੀਨੇ ਲਗਭਗ 60,941 (ਲਗਭਗ 61,000) ਰੁਪਏ ਦੀ ਨਿਯਮਤ ਕਮਾਈ ਹੁੰਦੀ ਰਹੇਗੀ। ਸਭ ਤੋਂ ਮਹੱਤਵਪੂਰਨ ਗੱਲ ਇਹ ਹੈ ਕਿ ਤੁਹਾਡਾ ਮੂਲ 1.03 ਕਰੋੜ ਰੁਪਏ ਦਾ ਫੰਡ ਪੂਰੀ ਤਰ੍ਹਾਂ ਸੁਰੱਖਿਅਤ ਅਤੇ ਜਿਓਂ ਦਾ ਤਿਓਂ ਬਣਿਆ ਰਹੇਗਾ।
ਟੈਕਸ ਮੁਕਤ ਲਾਭ ਅਤੇ ਨਿਯਮ
ਪੀਪੀਐੱਫ ਨਿਵੇਸ਼ ਦੀਆਂ ਮੁੱਖ ਵਿਸ਼ੇਸ਼ਤਾਵਾਂ ਵਿੱਚ EEE (Exempt-Exempt-Exempt) ਟੈਕਸ ਸਥਿਤੀ ਸ਼ਾਮਲ ਹੈ। ਇਸ ਦਾ ਮਤਲਬ ਹੈ ਕਿ ਇਨਕਮ ਟੈਕਸ ਐਕਟ ਦੀ ਧਾਰਾ 80C ਦੇ ਤਹਿਤ ਸਲਾਨਾ 1.5 ਲੱਖ ਰੁਪਏ ਤੱਕ ਦੇ ਨਿਵੇਸ਼ ਉੱਤੇ ਛੋਟ ਮਿਲਦੀ ਹੈ, ਇਸ ’ਤੇ ਮਿਲਣ ਵਾਲਾ ਵਿਆਜ ਅਤੇ ਮੈਚਿਓਰਿਟੀ ਰਕਮ ਪੂਰੀ ਤਰ੍ਹਾਂ ਟੈਕਸ-ਫ੍ਰੀ ਹੁੰਦੀ ਹੈ।
ਇਸ ਖਾਤੇ ਨੂੰ ਸਾਲਾਨਾ ਘੱਟੋ-ਘੱਟ 500 ਰੁਪਏ ਨਾਲ ਸ਼ੁਰੂ ਕੀਤਾ ਜਾ ਸਕਦਾ ਹੈ। ਇਹ ਯੋਜਨਾ ਨੌਕਰੀਪੇਸ਼ਾ, ਛੋਟੇ ਕਾਰੋਬਾਰੀਆਂ ਅਤੇ ਗ੍ਰਹਿਣੀਆਂ ਸਭ ਲਈ ਢੁਕਵੀਂ ਹੈ। ਹਾਲਾਂਕਿ, 15 ਸਾਲਾਂ ਤੋਂ ਪਹਿਲਾਂ ਪੂਰਾ ਪੈਸਾ ਨਹੀਂ ਕੱਢਵਾਇਆ ਜਾ ਸਕਦਾ, ਪਰ 7ਵੇਂ ਸਾਲ ਤੋਂ 50 ਫੀਸਦੀ ਤੱਕ ਦੀ ਅੰਸ਼ਕ ਨਿਕਾਸੀ ਦੀ ਇਜਾਜ਼ਤ ਹੁੰਦੀ ਹੈ। ਦੇਸ਼ ਦਾ ਕੋਈ ਵੀ ਨਾਗਰਿਕ ਬੈਂਕ ਜਾਂ ਡਾਕਘਰ ਵਿੱਚ ਆਪਣੇ ਜਾਂ ਆਪਣੇ ਨਾਬਾਲਗ ਬੱਚੇ ਦੇ ਨਾਂ ’ਤੇ ਇਹ ਖਾਤਾ ਖੋਲ੍ਹ ਸਕਦਾ ਹੈ।
