Millionaire Beggar- ‘ਭਿਖਾਰੀ ਮੁਕਤ’ ਸ਼ਹਿਰ ’ਚੋਂ ਲੱਭਾ ਲੱਖਪਤੀ ਮੰਗਤਾ
ਲੋਕਾਂ ਨੂੰ ਦਿੰਦਾ ਸੀ ਵਿਆਜੀ ਪੈਸਾ; ਕਾਰ ’ਚ ਬੈਠ ਕੇ ਜਾਂਦਾ ਸੀ ਭੀਖ ਮੰਗਣ
ਇੰਦੌਰ ਵਿੱਚ ਇੱਕ ਭਿਖਾਰੀ ਲੱਖਾਂ ਦੀ ਜਾਇਦਾਦ ਦਾ ਮਾਲਕ ਹੈ। 50 ਸਾਲਾ ਵਿਅਕਤੀ ਜਿਸ ਨੂੰ ਕੋਹੜ ਹੈ ਅਤੇ ਜੋ ਭੀਖ ਮੰਗ ਕੇ ਗੁਜ਼ਾਰਾ ਕਰਦਾ ਸੀ, ਉਹ ਸ਼ੁਰੂਆਤੀ ਜਾਂਚ ਵਿੱਚ ਲੱਖਪਤੀ ਨਿਕਲਿਆ ਹੈ। ਅਧਿਕਾਰੀਆਂ ਮੁਤਾਬਕ ਇਸ ਵਿਅਕਤੀ ਕੋਲ ਤਿੰਨ ਪੱਕੇ ਮਕਾਨ, ਇੱਕ ਕਾਰ ਅਤੇ ਤਿੰਨ ਆਟੋ ਰਿਕਸ਼ਾ ਹਨ, ਜਿਨ੍ਹਾਂ ਨੂੰ ਉਸ ਨੇ ਕਿਰਾਏ ’ਤੇ ਦਿੱਤਾ ਹੋਇਆ ਹੈ। ਮਹਿਲਾ ਅਤੇ ਬਾਲ ਵਿਕਾਸ ਵਿਭਾਗ ਦੇ ਅਧਿਕਾਰੀ ਦਿਨੇਸ਼ ਮਿਸ਼ਰਾ ਨੇ ਦੱਸਿਆ ਕਿ ਆਮ ਲੋਕਾਂ ਦੀ ਸੂਚਨਾ ’ਤੇ ਸਰਾਫ਼ਾ ਇਲਾਕੇ ਤੋਂ ਇਸ ਭਿਖਾਰੀ ਨੂੰ ਬਚਾਇਆ ਗਿਆ ਹੈ।
ਉਨ੍ਹਾਂ ਕਿਹਾ ਕਿ ਵਿਅਕਤੀ ਕੋਲ ਤਿੰਨ ਮੰਜ਼ਿਲਾਂ ਇਮਾਰਤ ਸਮੇਤ ਤਿੰਨ ਘਰ ਹਨ। ਇਸ ਤੋਂ ਇਲਾਵਾ ਉਹ ਕਾਰ ਵਿੱਚ ਬੈਠ ਕੇ ਭੀਖ ਮੰਗਣ ਜਾਂਦਾ ਸੀ, ਜਿਸ ਲਈ ਉਸ ਨੇ ਡਰਾਈਵਰ ਵੀ ਰੱਖਿਆ ਸੀ। ਇਹ ਵਿਅਕਤੀ ਵ੍ਹੀਲ-ਚੇਅਰ ’ਤੇ ਬੈਠ ਕੇ ਭੀਖ ਮੰਗਦਾ ਸੀ ਅਤੇ ਸਾਲ 2021-22 ਤੋਂ ਇਸ ਪਾਸੇ ਸਰਗਰਮ ਸੀ।
ਜਾਂਚ ਦੌਰਾਨ ਪਤਾ ਲੱਗਾ ਕਿ ਉਸ ਨੇ ਸਰਾਫ਼ਾ ਇਲਾਕੇ ਦੇ ਲੋਕਾਂ ਨੂੰ ਚਾਰ ਤੋਂ ਪੰਜ ਲੱਖ ਰੁਪਏ ਵਿਆਜੀ ਦਿੱਤੇ ਹੋਏ ਸਨ। ਉਹ ਰੋਜ਼ਾਨਾ ਵਿਆਜ ਵਸੂਲਦਾ ਸੀ ਤੇ ਉਸ ਨੂੰ ਰੋਜ਼ਾਨਾ ਲਗਪਗ 1,000 ਤੋਂ 2,000 ਰੁਪਏ ਦੀ ਕਮਾਈ ਸੀ। ਭੀਖ ਮੰਗ ਕੇ 400 ਤੋਂ 500 ਰੁਪਏ ਦੀ ਦਿਹਾੜੀ ਵੱਖਰੀ ਬਣਾਉਂਦਾ ਸੀ।
ਜ਼ਿਲ੍ਹਾ ਕੁਲੈਕਟਰ ਸ਼ਿਵਮ ਵਰਮਾ ਨੇ ਕਿਹਾ ਕਿ ਇੰਦੌਰ ਨੂੰ ‘ਭਿਖਾਰੀ ਮੁਕਤ ਸ਼ਹਿਰ’ ਐਲਾਨਿਆ ਗਿਆ ਹੈ ਅਤੇ ਕਿਸੇ ਵੀ ਭਿਖਾਰੀ ਦੀ ਸੂਚਨਾ ਮਿਲਣ ’ਤੇ ਤੁਰੰਤ ਉਸ ਦੇ ਮੁੜਵਸੇਬੇ ਲਈ ਚਾਰਾਜੋਈ ਕੀਤੀ ਜਾਂਦੀ ਹੈ। ਉਨ੍ਹਾਂ ਦੱਸਿਆ ਕਿ ਪੂਰੀ ਜਾਂਚ ਤੋਂ ਬਾਅਦ ਇਸ ਲੱਖਪਤੀ ਮੰਗਤੇ ਖਿਲਾਫ਼ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
ਦੂਜੇ ਪਾਸੇ ਭਿਖਾਰੀਆਂ ਨੂੰ ਬਚਾਉਣ ਵਾਲੀ ਐਨਜੀਓ ‘ਪ੍ਰਵੇਸ਼’ ਦੀ ਪ੍ਰਧਾਨ ਰੂਪਾਲੀ ਜੈਨ ਨੇ ਕਿਹਾ ਕਿ ਇਸ ਮਾਮਲੇ ਨੂੰ ਮਾਨਵੀ ਨਜ਼ਰੀਏ ਤੋਂ ਦੇਖਣ ਦੀ ਲੋੜ ਹੈ। ਉਨ੍ਹਾਂ ਮੁਤਾਬਕ, ਇਹ ਵਿਅਕਤੀ ਪਹਿਲਾਂ ਮਿਸਤਰੀ ਵਜੋਂ ਕੰਮ ਕਰਦਾ ਸੀ, ਪਰ ਕੋਹੜ ਹੋਣ ਮਗਰੋਂ ਕੰਮ ਨਾ ਕਰ ਸਕਣ ਕਰਕੇ ਭੀਖ ਮੰਗਣ ਲੱਗਾ ਸੀ।
