15 ਸਾਲ ਤੱਕ ਜਿਸ ਨੂੰ ਬੰਨ੍ਹੀ ਰੱਖੜੀ, ਉਸੇ ਨਾਲ ਹੀ ਕਰਵਾਇਆ ਵਿਆਹ; ਪਰਿਵਾਰ ਵੱਲੋਂ ਜੀਉਂਦੇ ਜੀਅ ਅੰਤਿਮ ਸਸਕਾਰ
Woman marries brother: ਨਵ-ਵਿਆਹੀ ਜੋੜੀ ਨੇ ਆਪਣੀ ਮਰਜ਼ੀ ਨਾਲ ਵਿਆਹ ਕਰਨ ਦੀ ਗੱਲ ਕਹਿੰਦਿਆਂ ਸੁਰੱਖਿਆ ਦੀ ਅਪੀਲ ਕੀਤੀ
ਇੱਕ ਹੈਰਾਨੀਜਨਕ ਮਾਮਲੇ ਵਿੱਚ 20 ਸਾਲਾ ਲੜਕੀ ਨੇ ਉਸ ਨੌਜਵਾਨ ਨਾਲ ਵਿਆਹ ਕਰ ਲਿਆ ਜਿਸ ਨੂੰ ਉਹ ਪਿਛਲੇ 15 ਸਾਲਾਂ ਤੋਂ ਆਪਣਾ ਭਰਾ ਮੰਨ ਕੇ ਰੱਖੜੀ ਬੰਨ੍ਹਦੀ ਰਹੀ ਸੀ। ਇਸ ਘਟਨਾ ਤੋਂ ਬਾਅਦ ਲੜਕੀ ਦਾ ਪਰਿਵਾਰ ਐਨੇ ਗੁੱਸੇ ਵਿੱਚ ਆ ਗਿਆ ਕਿ ਪਰਿਵਾਰ ਨੇ ਉਸ ਦੇ ਅੰਤਿਮ ਸੰਸਕਾਰ ਦੀਆਂ ਰਸਮਾਂ ਕਰਕੇ ਉਸ ਨਾਲੋਂ ਸਾਰੇ ਸਬੰਧ ਤੋੜ ਲਏ ਹਨ।
ਹਾਲਾਂਕਿ ਦੂਜੇ ਪਾਸੇ ਨਵ-ਵਿਆਹੀ ਜੋੜੀ ਨੇ ਆਪਣੀ ਮਰਜ਼ੀ ਨਾਲ ਵਿਆਹ ਕਰਨ ਦੀ ਗੱਲ ਕਹਿੰਦਿਆਂ ਸੁਰੱਖਿਆ ਲਈ ਅਪੀਲ ਕੀਤੀ ਹੈ।
ਇਹ ਘਟਨਾ ਉੱਤਰ ਪ੍ਰਦੇਸ਼ ਦੇ ਪ੍ਰਯਾਗਰਾਜ ਵਿੱਚ ਵਾਪਰੀ ਜਿੱਥੇ ਇੱਕ 20 ਸਾਲਾ ਲੜਕੀ ਨੰਦਨੀ ਪਾਂਡੇ ਨੇ 22 ਸਾਲਾ ਸ਼ਾਸ਼ਵਤ ਗੁਪਤਾ ਨਾਲ ਵਿਆਹ ਕਰ ਲਿਆ ਜਿਸ ਨੂੰ ਉਹ ਲਗਪਗ 15 ਸਾਲਾਂ ਤੋਂ ਆਪਣਾ ਭਰਾ ਮੰਨਦੀ ਸੀ ਅਤੇ ਰੱਖੜੀ ਬੰਨ੍ਹਦੀ ਸੀ। ਇਹ ਜੋੜਾ 20 ਸਤੰਬਰ ਨੂੰ ਆਪਣੇ ਘਰੋਂ ਚਲਾ ਗਿਆ ਸੀ ਅਤੇ ਬਾਅਦ ਵਿੱਚ ਵਿਆਹ ਕਰ ਲਿਆ।
ਨੰਦਨੀ ਦੇ ਪਰਿਵਾਰ ਨੇ ਦਾਅਵਾ ਕੀਤਾ ਕਿ ਸ਼ਾਸ਼ਵਤ ਕਈ ਸਾਲਾਂ ਤੋਂ ਉਨ੍ਹਾਂ ਦੇ ਘਰ ਆਉਂਦਾ-ਜਾਂਦਾ ਰਿਹਾ ਸੀ ਅਤੇ ਨੰਦਨੀ ਉਸ ਨੂੰ ਭਰਾ ਵਜੋਂ ਮੰਨਦੀ ਸੀ। ਉਸਦੀ ਮਾਂ ਨੇ ਕਿਹਾ ਕਿ ਨੰਦਨੀ ਨੇ ਉਸਨੂੰ ਲਗਪਗ 15 ਸਾਲਾਂ ਤੱਕ ਰੱਖੜੀ ਬੰਨ੍ਹੀ ਸੀ। ਪਰਿਵਾਰ ਨੇ ਇਹ ਵੀ ਜੋੜਿਆ ਕਿ ਉਹ ਇਸ ਗੱਲ ਤੋਂ ਅਣਜਾਣ ਸਨ ਕਿ ਉਨ੍ਹਾਂ ਦਾ ਰਿਸ਼ਤਾ ਅਸਲ ਵਿੱਚ ਕੀ ਹੈ, ਜਦੋਂ ਤੱਕ ਦੋਵੇਂ ਘਰੋਂ ਚਲੇ ਨਹੀਂ ਗਏ ਅਤੇ ਵਿਆਹ ਨਹੀਂ ਕਰ ਲਿਆ।
ਹਾਲਾਂਕਿ, ਦੂਜੇ ਪਾਸੇ ਨੰਦਨੀ ਨੇ ਬਹੁਤ ਵੱਖਰਾ ਬਿਆਨ ਦਿੱਤਾ ਹੈ। ਵਿਆਹ ਤੋਂ ਬਾਅਦ ਜਾਰੀ ਕੀਤੀ ਗਈ ਇੱਕ ਵੀਡੀਓ ਵਿੱਚ ਉਸ ਨੇ ਕਿਹਾ ਕਿ ਉਹ ਅਤੇ ਸ਼ਾਸ਼ਵਤ ਪਿਆਰ ਵਿੱਚ ਸਨ ਅਤੇ ਉਨ੍ਹਾਂ ਨੇ ਆਪਸੀ ਸਹਿਮਤੀ ਨਾਲ ਵਿਆਹ ਕੀਤਾ ਹੈ।
ਉਸ ਨੇ ਆਪਣੇ ਪਰਿਵਾਰ ਅਤੇ ਹੋਰਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਜੋੜੇ ਨੂੰ ਪਰੇਸ਼ਾਨ ਨਾ ਕਰਨ ਅਤੇ ਕਿਹਾ ਕਿ ਉਹ ਆਪਣੇ ਪਤੀ ਨਾਲ ਖੁਸ਼ ਹੈ ਅਤੇ ਇਸ ਸਮੇਂ ਉਸ ਦੇ ਨਾਲ ਰਹਿ ਰਹੀ ਹੈ।
ਨੰਦਨੀ ਨੇ ਦਾਅਵਾ ਕੀਤਾ ਕਿ ਉਸ ਦੇ ਪਿਤਾ ਨੇ ਉਸ ਨੂੰ ਸਰੀਰਕ ਅਤੇ ਮਾਨਸਿਕ ਤੌਰ 'ਤੇ ਪਰੇਸ਼ਾਨ ਕੀਤਾ ਸੀ ਅਤੇ ਦਾਅਵਾ ਕੀਤਾ ਕਿ ਉਹ ਬਿਨਾਂ ਕਿਸੇ ਉਚਿਤ ਡਾਕਟਰੀ ਦੇਖਭਾਲ ਦੇ ਲੰਬੇ ਸਮੇਂ ਤੋਂ ਬਿਮਾਰ ਸੀ। ਨੰਦਨੀ ਨੇ ਜ਼ਿਕਰ ਕੀਤਾ ਕਿ ਵਿਆਹ ਤੋਂ ਬਾਅਦ ਉਸਦਾ ਪਤੀ ਅਤੇ ਸਹੁਰਾ ਪਰਿਵਾਰ ਉਸਦੀ ਦੇਖਭਾਲ ਕਰ ਰਹੇ ਹਨ ਅਤੇ ਇਹ ਯਕੀਨੀ ਬਣਾ ਰਹੇ ਹਨ ਕਿ ਉਸਨੂੰ ਇਲਾਜ ਮਿਲੇ।
ਉਸਨੇ ਆਪਣੇ ਪਰਿਵਾਰ ਦੇ ਉਸ ਦੋਸ਼ ਨੂੰ ਵੀ ਨਕਾਰ ਦਿੱਤਾ ਕਿ ਉਹ 2 ਲੱਖ ਰੁਪਏ ਲੈ ਕੇ ਘਰੋਂ ਭੱਜੀ ਸੀ, ਇਹ ਕਹਿੰਦਿਆਂ ਕਿ ਉਸ ਦੇ ਪਰਿਵਾਰ ਕੋਲ ਇੰਨੀ ਵੱਡੀ ਰਕਮ ਨਹੀਂ ਸੀ।
ਇਸ ਦੌਰਾਨ ਨੰਦਨੀ ਦੇ ਪਿਤਾ ਨੂੰ 21 ਸਤੰਬਰ ਨੂੰ ਵਿਆਹ ਬਾਰੇ ਪਤਾ ਲੱਗਾ। ਇਸ ਤੋਂ ਬਾਅਦ ਪਰਿਵਾਰ ਨੇ ਗੁੱਸੇ ਵਿੱਚ ਆ ਕੇ ਉਸ ਦਾ ਪੁਤਲਾ ਬਣਾ ਕੇ ਅੰਤਿਮ ਸਸਕਾਰ ਦੀਆਂ ਸਾਰੀਅ ਰਸਮਾਂ ਕਰ ਦਿੱਤੀਆਂ ਅਤੇ ਉਸ ਨਾਲ ਇਸ ਤਰ੍ਹਾਂ ਵਿਵਹਾਰ ਕੀਤਾ ਜਿਵੇਂ ਉਹ ਮਰ ਚੁੱਕੀ ਹੋਵੇ।
ਉਸਦੀ ਮਾਂ ਨੇ ਕਿਹਾ ਕਿ ਪਰਿਵਾਰ ਨੇ ਨੰਦਨੀ ਨਾਲ ਸਾਰੇ ਸਬੰਧ ਤੋੜ ਲਏ ਹਨ, ਜਦੋਂ ਕਿ ਪਰਿਵਾਰ ਨੇ ਵਿਆਹ ਦੇ ਭਵਿੱਖ 'ਤੇ ਵੀ ਸਵਾਲ ਉਠਾਏ ਅਤੇ ਉਸਦੀ ਸੁਰੱਖਿਆ ਬਾਰੇ ਚਿੰਤਾ ਪ੍ਰਗਟ ਕੀਤੀ।
ਪਰਿਵਾਰ ਨੇ ਦਾਅਵਾ ਕੀਤਾ ਕਿ ਸ਼ਾਸ਼ਵਤ ਨੰਦਨੀ ਨੂੰ ਗੁਮਰਾਹ ਕਰਕੇ ਲੈ ਗਿਆ, ਜਦੋਂ ਕਿ ਨੰਦਨੀ ਨੇ ਕਿਹਾ ਕਿ ਉਹ ਆਪਣੀ ਮਰਜ਼ੀ ਨਾਲ ਗਈ ਅਤੇ ਆਪਣੀ ਪਸੰਦ ਨਾਲ ਉਸ ਨਾਲ ਵਿਆਹ ਕੀਤਾ। ਇਸ ਲਈ ਦੋਵਾਂ ਪੱਖਾਂ ਨੇ ਇਸ ਬਾਰੇ ਬਹੁਤ ਵੱਖੋ-ਵੱਖਰੇ ਬਿਆਨ ਪੇਸ਼ ਕੀਤੇ ਹਨ ਕਿ ਵਿਆਹ ਕਿਸ ਕਾਰਨ ਹੋਇਆ।
ਸਰਕਾਰੀ ਤੱਥਾਂ ਅਤੇ ਪੁਲੀਸ ਦੀ ਜਾਂਚ ਸਾਹਮਣੇ ਆਉਣ 'ਤੇ ਹੋਰ ਸਪੱਸ਼ਟਤਾ ਆਉਣ ਦੀ ਉਮੀਦ ਹੈ।
